Geez - Deuteronomy - 18

18:1  ወአልቦሙ ፡ መክፈልተ ፡ ካህናት ፡ ወሌዋውያን ፡ ወኵሉ ፡ ሕዝበ ፡ ሌዊ ፡ ምስለ ፡ እስራኤል ፤ መባኡ ፡ ለእግዚአብሔር ፡ ክፍሎሙ ፡ ወኪያሁ ፡ ይሴሰዩ ።

18:2  ወክፍለ ፡ ባሕቱ ፡ አልቦሙ ፡ በውስተ ፡ አኀዊሆሙ ፡ እስመ ፡ እግዚአብሔር ፡ ውእቱ ፡ ክፍሉ ፡ በከመ ፡ ይቤሎ ።

18:3  ወዝንቱ ፡ ውእቱ ፡ ሕጎሙ ፡ ለካህናት ፡ ዘእምኀበ ፡ ሕዝብ ፡ እለ ፡ ይጠብኁ ፡ ጥብኀ ፡ እመኒ ፡ ላህመ ፡ ወእመኒ ፡ በግዐ ፡ ዘይሁብዎ ፡ ለካህን ፡ መዝራዕተ ፡ ወሕልቀ ፡ ወቈስጤ ።

18:4  ወቀዳሜ ፡ እክልከ ፡ ወቀዳሜ ፡ ወይንከ ፡ ወቀዳሜ ፡ ቅብእከ ፡ ወእምነ ፡ ዘቀረፅከ ፡ አባግዒከ ፡ ትሁቦ ።

18:5  እስመ ፡ ኀር[ዮ] ፡ እግዚአብሔር ፡ አምላክነ ፡ እምውስተ ፡ ኵሉ ፡ ሕዘቢከ ፡ ከመ ፡ ይቁም ፡ ቅድሜሁ ፡ ለእግዚአብሔር ፡ አምላክከ ፡ ወይትለአኮ ፡ ወይባርክ ፡ በስመ ፡ ዚአሁ ፡ ውእቱ ፡ ወደቂቁ ፡ በኵሉ ፡ መዋዕል ።

18:6  ወለእመ ፡ መጽአ ፡ ሌዋዊ ፡ እምውስተ ፡ አህጉሪክሙ ፡ ዘእምነ ፡ ኵሉ ፡ ደቂቀ ፡ እስራኤል ፡ ዘኀበ ፡ ይነብር ፡ ውእቱ ፡ እስመ ፡ ፈተወ ፡ በነፍሱ ፡ ከመ ፡ ይትለአክ ፡ በውእቱ ፡ መካን ፡ ኀበ ፡ ኀርየ ፡ እግዚአብሔር ፡ አምላክከ ፤

18:7  ወይትቀነይ ፡ ለስመ ፡ እግዚአብሔር ፡ አምላኩ ፡ ከመ ፡ ኵሉ ፡ አኀዊሁ ፡ ሌዋውያን ፡ እለ ፡ ይቀውሙ ፡ ህየ ፡ ቅድመ ፡ እግዚአብሔር ።

18:8  ይትከፈል ፡ መክፈልቶ ፡ ወይሴሰይ ፡ ዘእንበለ ፡ ዘበ ፡ ሢመቱ ፡ ዘበ ፡ ሀገሩ ።

18:9  ወለእመ ፡ ቦእከ ፡ ውስተ ፡ ምድር ፡ እንተ ፡ ይሁበከ ፡ እግዚአብሔር ፡ አምላክከ ፡ ኢትትመሀር ፡ ገቢረ ፡ ከመ ፡ ርኵሶሙ ፡ ለውእቶሙ ፡ አሕዛብ ።

18:10  ወኢይትረከብ ፡ በውስቴትክሙ ፡ ዘይሠውዕ ፡ ወልዶ ፡ አው ፡ ወለቶ ፡ በእሳት ፡ ወዘያስተቀስም ፡ መቅሰመ ፡ ወዘያስተሰግል ፡ ወዘይጤየር ፤

18:11  ወዘሥራይ ፡ ወዘሐርስ ፡ ወዘበፃውዕ ፡ ወዘያነቅህ ፡ ምውተ ፡ ወዘያስተሰግል ፡ በዖፍ ።

18:12  እስመ ፡ ርኩስ ፡ ውእቱ ፡ ኵሉ ፡ ዘይገብሮ ፡ ለዝንቱ ፡ በኀበ ፡ እግዚአብሔር ፡ እስመ ፡ በበይነ ፡ ዝንቱ ፡ ርኵሶሙ ፡ ያጠፍኦሙ ፡ እግዚአብሔር ፡ እምኔከ ።

18:13  ወኩን ፡ ፍጹመ ፡ ቅድመ ፡ እግዚአብሔር ፡ አምላክከ ።

18:14  እስመ ፡ እልክቱ ፡ አሕዛብ ፡ እለ ፡ አንተ ፡ ትትወረሶሙ ፡ እሙንቱ ፡ ያስተሰግሉ ፡ ወያጸምኡ ፡ መቅሰመ ፡ ወለከሰ ፡ አኮ ፡ ከማሁ ።

18:15  ነቢየ ፡ ወሀበከ ፡ እግዚአብሔር ፡ አምላክከ ፡ እምውስተ ፡ አኀዊከ ፡ ዘከማየ ፡ ወያነሥእ ፡ ለከ ፡ እግዚአብሔር ፡ አምላክከ ፡ ወሎቱ ፡ ስምዕዎ ፡ በኵሉ ።

18:16  ወኵሉ ፡ ዘሰአልካሁ ፡ ለእግዚአብሔር ፡ አምላክከ ፡ በኮሬብ ፡ አመ ፡ ዕለተ ፡ ተጋባእክሙ ፡ ወትቤሉ ፡ ኢንድግም ፡ እንከ ፡ ሰሚዖተ ፡ ቃሎ ፡ ለእግዚአብሔር ፡ አምላክነ ፡ ወዛቲኒ ፡ እሳት ፡ ዐባይ ፡ ኢንርአያ ፡ እንከ ፡ ከመ ፡ ኢንሙት ።

18:17  ወይቤለኒ ፡ እግዚአብሔር ፡ አማን ፡ ኵሉ ፡ ዘይቤሉ ።

18:18  ነቢየ ፡ ኣነሥእ ፡ ሎሙ ፡ እምውስተ ፡ አኀዊሆሙ ፡ ዘከማከ ፡ ወእሁብ ፡ ቃልየ ፡ ውስተ ፡ አፉሁ ፡ ወይነግሮሙ ፡ ዘከመ ፡ አዘዝክዎ ።

18:19  ወብእሲ ፡ ዘኢይሰምዖ ፡ ለውእቱ ፡ ነቢይ ፡ በኵሉ ፡ ዘነገረ ፡ በስመ ፡ ዚአየ ፡ አነ ፡ እትቤቀል ፡ እምኔሁ ።

18:20  ወባሕቱ ፡ ነቢይ ፡ ዘይኤብስ ፡ ወይነብብ ፡ ቃለ ፡ በስምየ ፡ ዘኢአዘዝክዎ ፡ ይንብብ ፡ ወዘነበበሂ ፡ በስመ ፡ ባዕድ ፡ አማልክት ፡ ለይሙት ፡ ውእቱ ፡ ነቢይ ።

18:21  ወለእመ ፡ ትብል ፡ በልብከ ፡ እፎ ፡ ኣአምር ፡ ቃለ ፡ ዘኢይቤ ፡ እግዚአብሔር ፤

18:22  እምነ ፡ ኵሉ ፡ ዘነበበ ፡ ነቢይ ፡ በስመ ፡ እግዚአብሔር ፡ እምከመ ፡ ኢበጽሐ ፡ ቃሉ ፡ ወኢኮነ ፡ በከመ ፡ [ይቤ ፡] ኢነበቦ ፡ እግዚአብሔር ፡ ለውእቱ ፡ ቃል ፡ ወበሐሰት ፡ ነበበ ፡ ውእቱ ፡ ነቢይ ፡ ወኢትስምዕዎ ።