Geez - Deuteronomy - 24

24:1  ወለእመቦ ፡ ዘነሥአ ፡ ብእሲተ ፡ ወነበረ ፡ ምስሌሃ ፡ ወእምዝ ፡ ለእመ ፡ ኢረከበት ፡ ሞገሰ ፡ በኀቤሁ ፡ እስመ ፡ ረከበ ፡ ዘኮነ ፡ ኀፍረተ ፡ ላዕሌሃ ፡ ይጽሐፍ ፡ ላቲ ፡ መጽሐፈ ፡ ኅድጋቲሃ ፡ ወይመጥዋ ፡ ውስተ ፡ እደዊሃ ፡ ወያወጽኣ ፡ እምነ ፡ ቤቱ ።

24:2  ወሖረት ፡ ወአውሰበት ፡ ካልአ ፡ ብእሴ ።

24:3  ወእምዝ ፡ ጸልኣ ፡ ውእቱኒ ፡ ብእሲ ፡ ደኃሪ ፡ ወጸሐፈ ፡ ላቲ ፡ መጽሐፈ ፡ ኅድጋቲሃ ፡ ወመጠዋ ፡ ውስተ ፡ እደዊሃ ፡ ወያወፅኣ ፡ እምነ ፡ ቤቱ ፡ ወለእመኒ ፡ ሞተ ፡ ውእቱ ፡ ብእሲ ፡ ደኃሪ ፡ ዘነሥአ ፡ ሎቱ ፡ ትኩኖ ፡ ብእሲተ ፤

24:4  ኢይከውኖ ፡ ለዝክቱ ፡ ብእሲ ፡ ቀዳማዊ ፡ ዘአውፅኣ ፡ ከመ ፡ ይግባእ ፡ ላዕሌሃ ፡ ወይንሥኣ ፡ ሎቱ ፡ ትኩኖ ፡ ብእሲተ ፡ እምድኅረ ፡ ረኵሰት ፡ እስመ ፡ ርኩስ ፡ ውእቱ ፡ ዝንቱ ፡ ነገር ፡ በኀበ ፡ እግዚአብሔር ፡ አምላክከ ፡ ወኢታርኵሱ ፡ ምድረ ፡ እንተ ፡ ይሁበክሙ ፡ እግዚአብሔር ፡ አምላክክሙ ፡ መክፈልተክሙ ።

24:5  ወለእመቦ ፡ ዘነሥአ ፡ ብእሲተ ፡ ኢይወፅእ ፡ ፀብአ ፡ ወአልቦ ፡ ምንተኒ ፡ ዘያቀትውዎ ፡ ድኁን ፡ ውእቱ ፡ [ውስተ ፡] ቤቱ ፡ አሐተ ፡ ዓመተ ፡ ከመ ፡ ይት[ፈ]ሣሕ ፡ ምስለ ፡ ብእሲቱ ፡ እንተ ፡ አውሰበ ።

24:6  ወኢትትአኀዘ ፡ ማሕረፀ ፡ ወኢመድሔ ፡ ማሕረፅ ፡ እስመ ፡ መብዐለ ፡ ነፍስ ፡ ውእቱ ፡ ወኢይትአኀዝዎ ።

24:7  ወለእመቦ ፡ ዘ[ተረክ]በ ፡ ብእሲ ፡ ዘሰረቀ ፡ ነፍሰ ፡ እምውስተ ፡ አኀዊሁ ፡ እምነ ፡ ደቂቀ ፡ እስራኤል ፡ ወተአገሎ ፡ ወሤጦ ፡ ለይቅትልዎ ፡ ለውእቱ ፡ ሰራቂ ፡ ወታሴስሉ ፡ እኩየ ፡ እምውስቴትክሙ ።

24:8  ወዑቅ ፡ ርእሰከ ፡ በእንተ ፡ ትእምርተ ፡ ለምጽ ፡ ተዓቀብ ፡ ጥቀ ፡ ከመ ፡ ትግበር ፡ ኵሎ ፡ ሕገ ፡ ዘይቤሉክሙ ፡ ካህናት ፡ ወሌዋውያን ፡ በከመ ፡ አዘዝኩክሙ ፡ ተዓቀቡ ፡ ዘትገብሩ ።

24:9  ወተዘከር ፡ ኵሎ ፡ ዘገብረ ፡ እግዚአብሔር ፡ አምላክከ ፡ ላዕለ ፡ ማርያ ፡ በፍኖት ፡ ወፂአክሙ ፡ እምነ ፡ ግብጽ ።

24:10  ወለእመቦ ፡ ዘይፈድየከ ፡ ካልእከ ፡ ዕደ ፡ ዘኮነ ፡ ኢትበውእ ፡ ውስተ ፡ ቤቱ ፡ ከመ ፡ ትትአኀዝ ፡ አኅዘከ ።

24:11  አፍአ ፡ ትቀውም ፡ ወብእሴ ፡ ዕዳከ ፡ ዝክቱ ፡ ዘይፈድየከ ፡ ለሊሁ ፡ ያወፅእ ፡ አኅዘከ ፡ አፍአ ፡ ኀቤከ ።

24:12  ወለእመ ፡ ብእሲ ፡ ነዳይ ፡ ውእቱ ፡ ኢታበይት ፡ አኅዞ ፡ ኀቤከ ።

24:13  ታገብእ ፡ ሎት ፡ አኅዞ ፡ ዐሪቦ ፡ ፀሐይ ፡ ወይበይት ፡ በልብሱ ፡ ወትትባረክ ፡ ወይከውነከ ፡ ምጽዋተ ፡ ቅድመ ፡ እግዚአብሔር ፡ አምላክከ ።

24:14  ወኢተዐምፆ ፡ ዐስቦ ፡ ለዐሳብከ ፡ ለነዳይ ፡ ዘኅጡእ ፡ ውእቱ ፡ እምውስተ ፡ አኀዊከ ፡ አው ፡ እምውስተ ፡ ግዩራን ፡ እለ ፡ ውስተ ፡ ሀገርከ ።

24:15  እንተ ፡ ጸብሐት ፡ ትሁቦ ፡ ዐስቦ ፡ ወኢታዐርብ ፡ ፀሐየ ፡ ላዕሌሁ ፡ እስመ ፡ ነዳይ ፡ ውእቱ ፡ ወውእቱ ፡ ተስፋሁ ፡ ወአይግዕር ፡ ላዕሌከ ፡ ኀበ ፡ እግዚአብሔር ፡ ወኢይኩንከ ፡ ኀጢአተ ።

24:16  ወኢይመውቱ ፡ ወላድያን ፡ በበይነ ፡ ውሉዶሙ ፡ ወኢይመውቱ ፡ ውሉድ ፡ በበይነ ፡ ወላድያኒሆሙ ፡ አሐዱ ፡ አሐዱ ፡ በጌጋዩ ፡ ይመውት ።

24:17  ወኢትሚጥ ፡ ፍትሐ ፡ ግዩር ፡ ወዘእጓለ ፡ ማውታ ፡ ወዘእቤር ።

24:18  ወተዘከር ፡ ከመ ፡ ገብር ፡ አንተ ፡ በምድረ ፡ ግብጽ ፡ ወቤዘወከ ፡ እግዚአብሔር ፡ አምላክከ ፡ እምህየ ፡ ወበበይነ ፡ ዝንቱ ፡ እኤዝዘከ ፡ አነ ፡ ትግበር ፡ ዘንተ ፡ ነገረ ።

24:19  ወለእመ ፡ አኬድከ ፡ እክለ ፡ ገራህትከ ፡ ወረሳዕከ ፡ አሐተ ፡ ክልስስተ ፡ ውስተ ፡ ገራህትከ ፡ ኢትግባእ ፡ ከመ ፡ ትንሥኣ ፡ ለግዩር ፡ ወለእጓለ ፡ ማውታ ፡ ወለእቤር ፡ ይኩን ፡ ከመ ፡ ይባርከ ፡ እግዚአብሔር ፡ አምላክከ ፡ በኵሉ ፡ ተግባረ ፡ እደዊከ ።

24:20  ወለእመኒ ፡ ቀሠምከ ፡ ዐጸደ ፡ ወይንከ ፡ ኢትድግም ፡ ተመይጦ ፡ ድኅሬከ ፡ ከመ ፡ ታስተናጽሕ ፡ ቀሢመ ፤ ለግዩር ፡ ወለእጓለ ፡ ማውታ ፡ ወለእቤር ፡ ይኩን ፡ ወተዘከር ፡ ከመ ፡ ገብር ፡ አንተ ፡ በምድረ ፡ ግብጽ ፡ ወበበይነ ፡ ዝንቱ ፡ እኤዝዘከ ፡ አነ ፡ ትግበር ፡ ዘንተ ፡ ነገረ ።

24:21  ወለእመኒ ፡ ቀሠምከ ፡ ዘይተከ ፡ ኢትድግም ፡ ተመይጦ ፡ ድኅሬከ ፡ ከመ ፡ ታስተናጽሕ ፡ ቀሢመ ፤ ለግዩር ፡ ወለእጓለ ፡ ማውታ ፡ ወለእቤር ፡ ይኩን ።

24:22  ወተዘከር ፡ ከመ ፡ ግዩር ፡ አንተ ፡ በምድረ ፡ ግብጽ ፡ ወበበይነ ፡ ዝንቱ ፡ እኤዝዘከ ፡ አነ ፡ ትግበር ፡ ዘንተ ፡ ነገረ ።