Azeri - Deuteronomy - 31

31:1  موسا چيخيب بو سؤزلري بوتون ائسرايئل‌لی‌لرله دانيشدي.

31:2  و اونلارا بله ددي: "آرتيق من يوز ائيئرمي ياشيندايام، داها سئزه باشچيليق اتمه‌يه طاقَتئم يوخدور. رب منه ديئبدئر کي؛ «بو اوردون چايينين او تايينا کچميه‌جکسن.»

31:3  تارينيز ربدئر کي، سئزدن قاباق او تايا کچه‌جک؛ او، بو مئلّتلري قاباغينيزدان محو اده‌جک، سئز ده اوراني آلاجاقسينيز. يوشَعدئر کي، سئزئن قاباغينيزدا گدئب کچه‌جک، نجه کي، رب ديئبدئر.

31:4  رب اِمورلو پادشاهلاري سئخونو و عوگو هلاک اده‌رک اؤلکه‌لرئنئن باشينا نه گتئردئيئني، بو مئلّتلرئن ده باشينا گتئره‌جک.

31:5  رب اونلاري سئزه تسلئم اده‌جک و سئز اونلارلا بوتون امر اتدئيئم کئمي رفتار اتمه‌لی‌سئنئز.

31:6  گوجلو و اورَکلي اولون! اونلاردان قورخوب تئتره‌مه‌يئن! چونکي تارينيز رب سئزئنله گدئر. او سئزي آتماز، ترک اتمَز!"

31:7  سونرا موسا يوشَعي چاغيريب بوتون ائسرايئللی‌لرئن گؤزلري قاباغيندا اونا بله ددي: "گوجلو و اورَکلي اول، چونکي ربّئن آتالارينا ورمه‌يه ائچدئيي اؤلکه‌يه بو خالقلا بئرلئکده سن گده‌جکسن. اؤلکه‌ني ائرث اولاراق اونلارا سن وره‌جکسن.

31:8  سندن قاباق گدن ربدئر؛ او سنئنله اولاجاق، سني آتماياجاق، ترک اتميه‌جک. قورخوب چکئنمه!"

31:9  موسا بو قانونو يازيب سونرا ربّئن عهد سانديغيني آپاران لاوئلي کاهئنلره و بوتون ائسرايئل آغساقّاللارينا وردی.

31:10  سونرا اونلارا بله بويوردو: "هر يدّي ائلئن آخيريندا، بورجلارين باغيشلانما زامانيندا، چارداقلار بايراميندا،

31:11  بوتون ائسرايئل تارينيز ربّئن حوضوروندا اولماق اوچون اونون سچه‌جيی يره گلنده، بو قانونو بوتون ائسرايئله اوخويوب اشئتدئرئن.

31:12  خالقين کئشي، آرواد و اوشاقلاريني، همچئنئن شهرئنئزده ياشايان ياد اِللی‌لري ييغين. قوي هامي اِشئدئب اؤيرَنسئن و تارينيز ربدن قورخوب بو قانونون بوتون سؤزلرئنه دقئق عمل اتسئن.

31:13  قوي قانونو بئلمه‌يَن اوشاقلاري دا اشئتسئنلر و مولک آلماق اوچون اوردون چاييندان کچئب گده‌جيئنئز اؤلکه‌ده عؤمور بويو تارينيز ربدن قورخماغي اؤيرَنسئنلر."

31:14  سونرا رب موسايا ددي: "اؤلومونه آز قاليب. يوشَعي چاغير. حوضور چاديريندا حاضير دايانين کي، اونا امرلرئمي بئلدئرئم.» بلجه، موسا ائله يوشَع گدئب حوضور چاديريندا گؤزله‌دئلر.

31:15  رب چاديردا بئر بولود دئره‌يي ائچئنده گؤروندو. بولود سوتونو چاديرين قاپيسي اوستونده داياندي.

31:16  رب موسايا بله ددي: "عنقرئب اؤلوب آتالارينا قوشولاجاقسان؛ بو خالق دا قالخيب گده‌جيي اؤلکه‌نئن آللاهلارينا باغلانيب، منه خيانت اده‌جک. منی آتيب، اونلارلا باغلاديغيم عهدي پوزاجاقلار.

31:17  او واخت اونلارا قضبلَنه‌جيم، اونلاري آتيب اونلاردان اوز دؤندره‌جيم. اونلار آيريلارينا يِم اولاجاقلار، باشلارينا چوخ بلالار و موصئبتلر گله‌جک. اله کي، همئن گون دئيه‌جکلر: «مگر بو پئسلئکلر تاريميزين بئزئمله اولماديغي اوچون باشيميزا گلمئر؟»

31:18  آمّا من، اونلارين اده‌جيي پئسلئکلر اوچون، آيري آللاهلارا طرف دؤنمک اوچون، اوزومو اونلاردان گئزلَده‌جيم.

31:19  ائندي اؤزونوز اوچون بو نغمه‌ني يازين و اونو ائسرايئل اؤولادلارينا اؤيره‌دئن. اونو دوداقلارينين اوستونه قويون. بله کي بو نغمه ائسرايئل اؤولادلارينين ضئدّئنه منئم شاهئدئم اولسون.

31:20  چونکي اونلاري آتالارينا آند ائچدئيئم سود و بال آخان تورپاغا گتئرنده، يِيئب دويوب کؤکه‌لَنده باشقا آللاهلارا طرف دؤنوب اونلارا قوللوق اده‌جکلر، منی ردّ ادئب عهدئمي پوزاجاقلار.

31:21  اونلارا چوخ پئسلئکلر و بلالار يتئشنده، بو نغمه اونلارين ضئدّئنه شاهئد کئمي سَسلَنه‌جک، چونکي بو نغمه نسئللرئن دئلئندن دوشميه‌جک؛ اونا گؤره کي، من اونلارا آند ائچدئيئم تورپاغا گتئرمَزدن اوّل، بو گون بِله، فئکئرلرئندن کچنلري بئلئرم."

31:22  همئن گون موسا بو نغمه‌ني يازيب ائسرايئل اؤولادلارينا اؤيرَتدي.

31:23  رب او گون نون اوغلو يوشَعي ائش باشينا قويوب ددي: "گوجلو و اورَکلي اول، چونکي ائسرايئل اؤولادلاريني اونلارا آند ائچدئيئم اؤلکه‌يه سن آپاراجاقسان و من سنئنله اولاجاغام."

31:24  موسا بو شرئعتئن سؤزلرئني اوّلدن آخيرا کئمي کئتابا يازيب قورتاراندا،

31:25  ربّئن عهد سانديغيني داشي‌يان لاوئلی‌لره بو امري وردی:

31:26  "بو شرئعت کئتابيني گؤتوروب تارينيز ربّئن عهد سانديغينين يانينا قويون. قوي سئزئن ضئدّئنئزه بئر شاهئد کئمي اورادا قالسين.

31:27  چونکي سئزئن عاصي و دئکباش اولدوغونوزو بئلئرم. بو گون من صاغ اولاراق آرانيزدا ائکَن بِله، ربّه عاصي اولدونوز، گؤر من اؤلَندن سونرا نجه اولاجاقسينيز؟

31:28  قبئله‌لرئنئزئن بوتون آغساقّال‌لاريني و سرکرده‌لرئني يانيما ييغين کي، بو سؤزلري اونلارا اشئتدئرئم، گؤيو و يِري اونلارين ضئدّئنه شاهئد توتوم.

31:29  اؤلومومدن سونرا بوسبوتون فاسئد اولدوغونوزو، سئزه امر اتدئيئم يولدان آزاجاغينيزي بئلئرم. آخير گونلرده موصئبتلرله راست گله‌جکسئنئز. چونکي ربّئن گؤزونده پئس اولان ائشلري يرئنه يتئرئب، اَللرئنئزئن عمل‌لري ائله اونو قضبلَندئره‌جکسئنئز."

31:30  موسا بو نغمه‌نئن سؤزلرئني آخيراجاق اوخودو کي، بوتون ائسرايئل جاماعاتي بو نغمه‌نئن سؤزلرئني اشئتسئن.