Azeri - Deuteronomy - 29

29:1  رب ائسرايئل اؤولادلاري ائله خورِب داغيندا عهد باغلاميشدي. موآبدا دا موسايا امر اتدي کي، تزه‌دن عهد باغلاسين. عهدئن سؤزلري بونلاردير:

29:2  موسا بوتون ائسرايئللی‌لري بئر يره ييغيب اونلارا بله ددي: "ربّئن مئصئرده گؤزلرئنئز قاباغيندا فئرعونا، بوتون اعيانلارينا و بوتون اؤلکه‌سئنه نه اتدئيئني گؤردونوز.

29:3  بؤيوک ائمتاحانلاري، او بؤيوک علامتلري و مؤجوزه‌لري اؤز گؤزونوزله گؤردونوز.

29:4  لاکئن رب بو گونه‌جک سئزه آنلاماق اوچون اورَک، گؤرمک اوچون ائکي گؤز، اشئتمک اوچون ائکي قولاق ورمه‌يئب.

29:5  رب ديئر: «سئزي قيرخ ائل صحرادا گزدئردئم. اَينئنئزده‌کي پالتار، آياغينيزداکي چاريق ييرتيلمادي.

29:6  چؤرک يِمه‌دئنئز، شراب يا دا کِفلَندئرن ائچکي ائچمه‌دئنئز. بونلاري اونا گؤره اتمئشم کي، منئم تارينيز رب اولدوغومو بئله‌سئنئز.»

29:7  بورايا چاتاندا خِشبون پادشاهي سئخونلا باشان پادشاهي عوگ بئزئمله دؤيوشه باشلاديلار. آمّا اونلاري مغلوب اتدئک.

29:8  تورپاقلاريني اَله کچئردئب ائرث اولاراق رِعوبئنلی‌لره، جادلي‌لارا، مِنَسّه قبئله‌سئنئن ياريسينا وردئک.

29:9  اَله گؤتوردويونوز هر ائشده اوغور قازانماق اوچون بو عهدئن هر سؤزونه دئقّتله عمل ادئن.

29:10  بو گون سئز هامينيز، قبئله باشچيلارينيز، آغساقّاللارينيز، مأمورلارينيز، ائسرايئللی‌لرئن هاميسي،

29:11  اوشاقلارينيز، آروادلارينيز، اوردوگاهينيزدا ياشاييب اودونوزو دوغرايان و سويونوزو داشييان ياد اِللی‌لر تارينيز ربّئن قاباغيندا دايانيبسينيز کي،

29:12  بو گون تارينيز ربّئن آند ائچه‌رک سئزئنله باغلاديغي بو عهدي حياتا کچئرده‌سئنئز،

29:13  اِله کي، بو گون او سئزي اؤز خالقي اولاراق برقرار اتسئن، سئزه سؤز وردئيي کئمي آتالارينيز ائبراهئمه، ائسحاقا، يعقوبا ائچدئيي آندا گؤره سئزئن تارينيز اولسون.

29:14  من بو عهدي و آندي فقط سئزئنله يوخ،

29:15  تاريميز ربّئن حوضوروندا بئزئمله برابر دورانلارلا و بو گون يانيميزدا اولمايانلارلا دا باغلاييرام.

29:16  مئصئرده نجه ياشاديغيميز، او بئري مئلّتلرئن آراسيندان کچئب بورايا نجه گلدئيئمئزي اؤزونوز ده بئلئرسئنئز.

29:17  اونلارين آراسيندا ائيرنج شيلري، آغاجدان، داشدان، قيزيلدان، و گوموشدن دوزَلدئلَن بوتلري گؤردونوز.

29:18  مبادا بو گون آرانيزدا بو مئلّتلرئن آللاهلارينا گدئب سئتايئش اتمک اوچون تارينيز ربدن اوره‌يي دؤنَن نه کئشي، نه آرواد، نه نسئل، نه ده قبئله اولسون. مبادا آرانيزدا بله زَهَرلي و آجي کؤک اولسون.

29:19  بو آندين سؤزلرئني اشئدن زامان کئمسه اؤز-اؤزونه گؤز آيدينليغي ورئب بله بئر فئکره دوشمه‌سئن: «سالامات قالاجاغام، اوره‌يئمئن عئناديندا يرئدئيئم حالدا ياشاييم.» بو فئکئر سولو تورپاغا قورولوق گتئرَر.

29:20  بله آدامي رب باغيشلاماق ائسته‌مز. او آدامين ضئدّئنه ربّئن قضبي قالخار و قيرتي او آدامين ضئدّئنه آلوولانار. بو کئتابدا يازيلان بوتون لعنتلر باشينا تؤکولر و رب اونون آديني گؤيون آلتيندان سئلر.

29:21  رب بو شرئعت کئتابيندا يازيلان عهدئن ائچئنده‌کي لعنتلرئن هاميسينا گؤره اونو ائسرايئلئن بوتون قبئله‌لري ائچئندن چيخاردار کي، فلاکته دوشسون.

29:22  گله‌جک نسئل، سئزدن سونرا گلن اؤولادلارينيز و اوزاق دئياردان گلن ياد اِللی‌لر بو اؤلکه‌نئن بلالاريني، ربّئن اورايا گؤندردئيي ناخوشلوقلاري گؤروب دئيه‌جکلر.

29:23  بوتون اؤلکه ياناجاق، گوگورد و دوزلا اؤرتوله‌جک، توخوم اَکئلميه‌جک، گؤيَرتي گؤرونميه‌جک، اوت بئتميه‌جک. اؤلکه ربّئن آلوولانان قضبي ائله وئران اولاجاق، نجه کي، سودوم، گومورا، اَدما و صِبويئم يِرله بئر اولموشدو.

29:24  بوتون مئلّتلر دئيه‌جکلر: «رب بو اؤلکه‌يه نئيه بله اتدي؟ بو بؤيوک قضب نئيه آلوولاندي؟»

29:25  او زامان جاواب وره‌جکلر: «چونکي اونلاري مئصئر دئياريندان چيخاردارکن آتالارينين تاريسي ربّئن اونلارلا باغلاديغي عهدي آتديلار.

29:26  گدئب تانيماديقلاري آللاهلارا، ربّئن اونلارا بخش اتمه‌دئيي باشقا آللاهلارا قوللوق و پرستئش اتدئلر.

29:27  اونا گؤره ربّئن قضبي بو اؤلکه‌نئن ضئدّئنه آلوولاندي، اوراني بو کئتابدا يازيلان بوتون لعنتلره دوچار اتدي.

29:28  رب قضب، حئرص و بؤيوک حئدّتله اونلاري اؤلکه‌لرئندن قوپارتدي و بو گون اولدوغو کئمي اونلاري آيري بئر تورپاغا آتدي.»

29:29  سئرّلر تاريميز ربّئندئر، لاکئن آشکار ادئلَن شيلر بئزه و اؤولادلاريميزا ابدئلئک عاييددير، اله کي، بو قانونون بوتون سؤزلرئنه عمل ادک.