Geez - Deuteronomy - 9

9:1  ስማዕ ፡ እስራኤል ፡ ናሁ ፡ ተዐድዎ ፡ አንተ ፡ ዮም ፡ ለዮርዳንስ ፡ ከመ ፡ ትሑር ፡ ትትወረሶሙ ፡ ለአሕዛብ ፡ ዐበይት ፡ እለ ፡ ይጸንዑክሙ ፡ ወአህጉር ፡ ዐበይት ፡ እለ ፡ ዐረፍት ፡ ቅጽሮን ፡ ይበጽሕ ፡ እስከ ፡ ሰማይ ።

9:2  ሕዝብ ፡ ዐቢይ ፡ ወነዋኅት ፡ [ደቂቀ ፡ ኤናቅ ፡] እለ ፡ ትብሎሙ ፡ አንተ ።

9:3  ወታአምር ፡ ዮም ፡ ከመ ፡ እግዚአብሔር ፡ አምላክከ ፡ የሐውር ፡ ቅድመ ፡ ገጽከ ፡ እሳት ፡ ዘይዌድእ ፡ ውእቱ ፡ ወውእቱ ፡ ይሤርዎሙ ፡ ወውእቱ ፡ ያነትዖሙ ፡ እምቅድመ ፡ ገጽከ ፡ ወያጠፍኦሙ ፡ ወይደመስሶሙ ፡ ፍጡነ ፡ በከመ ፡ ይቤለከ ፡ እግዚአብሔር ።

9:4  ወኢትበል ፡ በልብከ ፡ ሶበ ፡ አጥፍኦሙ ፡ እግዚአብሔር ፡ ለውእቶሙ ፡ አሕዛብ ፡ እምቅድመ ፡ ገጽከ ፡ በበይነ ፡ ጽድቅየ ፡ አብአኒ ፡ እግዚአብሔር ፡ እትወረሳ ፡ ለዛቲ ፡ ምድር ፡ ቡርክት ፡ አላ ፡ በበይነ ፡ ኀጢአቶሙ ፡ ለውእቶሙ ፡ አሕዛብ ፡ አጥፍኦሙ ፡ እግዚአብሔር ፡ እምቅድመ ፡ ገጽከ ።

9:5  ወአኮ ፡ በበይነ ፡ ጽድቅከ ፡ ወአኮ ፡ በበይነ ፡ ንጽሐ ፡ ልብከ ፡ ዘትበውእ ፡ አንተ ፡ ትትወረሳ ፡ ለምድሮሙ ፡ አላ ፡ በበይነ ፡ ኀጢአቶሙ ፡ ለውእቶሙ ፡ አሕዛብ ፡ ያጠፍኦሙ ፡ እግዚአብሔር ፡ ለውእቶሙ ፡ አሕዛብ ፡ እምቅድመ ፡ ገጽከ ፡ ወከመ ፡ ያቅም ፡ ኪዳኖ ፡ ዘመሐለ ፡ እግዚአብሔር ፡ ለአበዊክሙ ፡ ለአብርሃም ፡ ወለይስሐቅ ፡ ወለያዕቆብ ።

9:6  ወታእምር ፡ ዮም ፡ ከመ ፡ አኮ ፡ በበይነ ፡ ጽድቅከ ፡ ዘይሁበከሃ ፡ እግዚአብሔር ፡ አምላክከ ፡ ትትወረሳ ፡ ለይእቲ ፡ ምድር ፡ ቡርክት ፡ እስመ ፡ ሕዝብ ፡ ዘያገዝፍ ፡ ክሳዶ ፡ አንተ ።

9:7  ወተዘከር ፡ ወኢትርሳዕ ፡ ሚመጠነ ፡ አምዓዕካሁ ፡ ለእግዚአብሔር ፡ አምላክከ ፡ በገዳም ፡ እምአመ ፡ አውፅአከ ፡ እምነ ፡ ምድረ ፡ ግብጽ ፡ እስከ ፡ በጻሕክሙ ፡ ውስተ ፡ ዝንቱ ፡ መካን ፡ እንዘ ፡ ትክሕድዎ ፡ ለእግዚአብሔር ።

9:8  ወበኮሬብሂ ፡ አምዓዕክምዎ ፡ ለእግዚአብሔር ፡ ወተምዕዐ ፡ እግዚአብሔር ፡ ላዕሌክሙ ፡ ከመ ፡ ያጥፍእክሙ ፤

9:9  አመ ፡ ዐረጉ ፡ ውስተ ፡ ደብር ፡ ከመ ፡ እንሣእ ፡ ክልኤ ፡ ጽላተ ፡ ዘእብን ፡ ጽላተ ፡ ዘኪዳን ፡ ዘተካየደ ፡ እግዚአብሔር ፡ ምስሌክሙ ፡ ወነበርኩ ፡ ውስተ ፡ ደብር ፡ አርብዓ ፡ ዕለተ ፡ ወአርብዓ ፡ ሌሊተ ፡ እክለ ፡ ኢበላዕኩ ፡ ወማየ ፡ ኢሰተይኩ ።

9:10  ወወሀበኒ ፡ እግዚአብሔር ፡ ክልኤ ፡ ጽላተ ፡ ዘእብን ፡ [ዘ]ተጽሕፋ ፡ በአጽባዕቱ ፡ ለእግዚአብሔር ፡ ወተጽሕፈ ፡ በውእቶን ፡ ኵሉ ፡ ቃል ፡ ዘነገረነ ፡ እግዚአብሔር ፡ በውስተ ፡ ደብር ፡ አመ ፡ ተጋባእክሙ ።

9:11  ወበአርብዓ ፡ ዕለት ፡ ወበአርብዓ ፡ ሌሊት ፡ ወሀበኒ ፡ እግዚአብሔር ፡ ክልኤ ፡ ጽላተ ፡ ዘእብን ፡ ጽላተ ፡ ዘኪዳን ።

9:12  ወይቤለኒ ፡ እግዚአብሔር ፡ ተንሥእ ፡ ወሑር ፡ ፍጡነ ፡ እምዝየ ፡ እስመ ፡ አበሰ ፡ ሕዝብከ ፡ ዘአውፃእከ ፡ እምነ ፡ ምድረ ፡ ግብጽ ፡ ወፍጡነ ፡ ክሕዱ ፡ እምውስተ ፡ ፍኖት ፡ እንተ ፡ አዘዝካሆሙ ፡ ገብሩ ፡ ሎሙ ፡ ስብኮ ።

9:13  ወይቤለኒ ፡ እግዚአብሔር ፡ እቤለከ ፡ ምዕረ ፡ ወካዕበ ፡ እንዘ ፡ እብል ፡ ርኢክዎ ፡ ለዝንቱ ፡ ከመ ፡ ሕዝብ ፡ ግዙፈ ፡ ክሳድ ፡ ውእቱ ።

9:14  ኅድገኒ ፡ ወአጥፍኦሙ ፡ ወእደምስስ ፡ ስሞሙ ፡ እምታሕተ ፡ ሰማይ ፡ ወእገብረከ ፡ ውስተ ፡ ሕዝብ ፡ ዐቢይ ፡ ወጽኑዕ ፡ ወዘይበዝኅ ፡ እምነ ፡ ዝንቱ ፡ ፈድፋደ ።

9:15  ወተመየጥኩ ፡ ወወረድኩ ፡ እምነ ፡ ደብር ፡ ወደብሩሰ ፡ ይነድድ ፡ በእሳት ፡ ወእልክቱኒ ፡ ክልኤ ፡ ጽላት ፡ ውስተ ፡ ክልኤሆን ፡ እደዊየ ።

9:16  ወሶበ ፡ ርኢኩ ፡ ከመ ፡ አበስክሙ ፡ ቅድመ ፡ እግዚአብሔር ፡ አምላክክሙ ፡ ወገበርክሙ ፡ ለክሙ ፡ ስብኮ ፡ ወኀደግሙ ፡ ፍኖተ ፡ እንተ ፡ አዘዘክሙ ፡ እግዚአብሔር ፤

9:17  ወነሣእክዎን ፡ ለእልክቱ ፡ ክልኤ ፡ ጽላት ፡ ወገደፍክዎን ፡ እምውስተ ፡ ክልኤሆን ፡ እደዊየ ፡ ወቀጥቀጥክዎን ፡ በቅድሜክሙ ።

9:18  ወሰአልኩ ፡ ዳግመ ፡ ቅድመ ፡ እግዚአብሔር ፡ በከመ ፡ ቀዲሙ ፡ አርብዓ ፡ ዕለተ ፡ ወአርብዓ ፡ ሌሊተ ፡ እክለ ፡ ኢበላዕኩ ፡ ወማየ ፡ ኢሰተይኩ ፡ በእንተ ፡ ኵሉ ፡ ኀጣይኢክሙ ፡ [ዘአበስክሙ ፡ ወዘገበርክሙ ፡] እኩየ ፡ ቅድመ ፡ እግዚአብሔር ፡ አምላክክሙ ፡ ከመ ፡ ታምዕዕዎ ።

9:19  ወፈራህኩ ፡ በእንተ ፡ መዐቱ ፡ ዘተምዐ ፡ እግዚአብሔር ፡ ላዕሌክሙ ፡ ከመ ፡ ያጥፍእክሙ ፡ ወሰምዐኒ ፡ እግዚአብሔር ፡ በውእቶን ፡ መዋዕል ።

9:20  ወላዕለ ፡ አሮንሂ ፡ ተምዐ ፡ እግዚአብሔር ፡ ጥቀ ፡ ከመ ፡ ይሠርዎ ፡ ወጸለይኩ ፡ ላዕለ ፡ አሮንሂ ፡ በውእቶን ፡ መዋዕል ።

9:21  ወበእንት ፡ ጌጋይክሙሂ ፡ ዘገበርክሙ ፡ ላህመ ፡ ወነሣእክዎ ፡ ወቀጥቀጥክዎ ፡ ወሐረጽክዎ ፡ ጥቀ ፡ እስከ ፡ አድቀቅዎ ፡ ጥቀ ፡ በሕቁ ፡ ወኮነ ፡ ከመ ፡ ጸበል ፡ ወወደይክዎ ፡ ለውእቱ ፡ ሐሪጹ ፡ ውስተ ፡ ነቅዕ ፡ ዘይወርድ ፡ እምነ ፡ ደብር ።

9:22  ወበኀበ ፡ ውዕየትኒ ፡ ወአመ ፡ መንሱትኒ ፡ ወበኀበ ፡ ተዝካረ ፡ ፍትወትኒ ፡ አምዓዕክምዎ ፡ ለእግዚአብሔር ፡ አምላክክሙ ።

9:23  ወአመሂ ፡ ፈነወክሙ ፡ እግዚአብሔር ፡ እምነ ፡ ቃዴስ ፡ በርኔ ፡ ወይቤለክሙ ፡ ዕረጉ ፡ ወትወርስዋ ፡ ለይእቲ ፡ ምድር ፡ እንተ ፡ እሁበክሙ ፡ ወክሕድክሙ ፡ በቃለ ፡ እግዚአብሔር ፡ አምላክክሙ ፡ ወኢአመንክምዎ ፡ ወኢሰማዕክሙ ፡ ቃሎ ።

9:24  ወኮንክሙ ፡ ከሓድያነ ፡ በእግዚአብሔር ፡ እምይእቲ ፡ ዕለት ፡ እንተ ፡ ተአምረ ፡ ለክሙ ።

9:25  ወሰአልኩ ፡ ቅድመ ፡ እግዚአብሔር ፡ ፵ዕለተ ፡ ወ፵ሌሊተ ፡ በከመ ፡ ሰአልኩ ፡ ቀዲሙ ፡ እስመ ፡ ይቤ ፡ እግዚአብሔር ፡ ከመ ፡ ያጥፍእክሙ ።

9:26  ወጸለይኩ ፡ ኀበ ፡ እግዚአብሔር ፡ ወእቤ ፡ እግዚኦ ፡ ንጉሦሙ ፡ ለአማልክት ፡ ኢትሠርዎሙ ፡ ለሕዝብከ ፡ ወለመክፈልትከ ፡ ዘቤዘውከ ፡ በኀይልከ ፡ ዐቢይ ፡ እለ ፡ አውፃእከ ፡ እምነ ፡ ግብጽ ፡ በዐቢይ ፡ ኀይልከ ፡ ወበእዴከ ፡ ጽንዕት ፡ ወበመዝራዕትከ ፡ ልዑል ።

9:27  ተዘከር ፡ አብርሃምሃ ፡ ወይስሐቅሃ ፡ ወያዕቆብሃ ፡ አግብርቲከ ፡ እለ ፡ መሐልከ ፡ ሎሙ ፡ በርእስከ ፡ ወኢትነጽር ፡ እከዮሙ ፡ ለዝንቱ ፡ ሕዝብ ፡ ወአበሳሆሙ ፡ ወጌጋዮሙ ፤

9:28  ከመ ፡ ኢይበሉ ፡ እለ ፡ ይነብሩ ፡ ውስተ ፡ ምድር ፡ እለ ፡ እምኀቤሆሙ ፡ አውፃእከነ ፡ እስመ ፡ ስእነ ፡ እግዚአብሔር ፡ አብኦቶሙ ፡ ውስተ ፡ ምድር ፡ እንተ ፡ ይቤሎሙ ፡ ወእስመ ፡ ይጸልኦሙ ፡ አውፅኦሙ ፡ ከመ ፡ ይቅትሎሙ ፡ በገዳም ።

9:29  ወእሉሰ ፡ ሕዝብከ ፡ እሙንቱ ፡ ወርስትከ ፡ እለ ፡ አውፃእከ ፡ እምነ ፡ ግብጽ ፡ በዐቢይ ፡ ኀይልከ ፡ ወበጽኑዕ ፡ ወልዑል ፡ መዝራዕትከ ።