CopSahBible2 - Ecclesiastes - 10

10:1  ϩⲉⲛⲁϥ ⲉⲩϩⲏⲗ ⲉⲩϣⲁⲛⲙⲟⲩ ϣⲁⲩⲧⲁⲕⲟ ⲙⲡϭⲱⲣϭ ⲛⲟⲩⲛⲉϩ ⲛⲥⲟϭⲛ ϥⲧⲙⲁⲓⲏⲩ ⲛϭⲓ ⲡϣⲁϫⲉ ⲛⲧⲥⲟⲫⲓⲁ ⲉϩⲟⲩⲉ ⲡⲉϩⲟⲟⲩ ⲛⲟⲩⲛⲟϭ ⲙⲙⲛⲧⲁⲧϩⲏⲧ

10:2  ⲡϩⲏⲧ ⲙⲡⲥⲟⲫⲟⲥ ⲉⲧⲟⲟⲧϥ ϩⲓ ⲟⲩⲛⲁⲙ ⲙⲙⲟϥ ⲁⲩⲱ ⲡϩⲏⲧ ϩⲱⲱϥ ⲛⲛⲥⲟϭ ϩⲓ ϩⲃⲟⲩⲣ ⲙⲙⲟϥ

10:3  ⲁⲩⲱ ⲡⲥⲟϭ ⲉϥϣⲁⲛⲙⲟⲟϣⲉ ϩⲛ ⲟⲩϩⲓⲏ ⲡⲉϥϩⲏⲧ ⲛⲁϣⲱⲱⲧ ⲁⲩⲱ ⲛⲉⲧⲉϥⲛⲁⲙⲉⲉⲩⲉ ⲉⲣⲟⲟⲩ ⲧⲏⲣⲟⲩ ⲟⲩⲙⲛⲧⲁⲧϩⲏⲧ ⲇⲉ

10:4  ⲉⲣϣⲁⲛⲡⲉⲡⲛⲉⲩⲙⲁ ⲙⲡⲉⲧⲉ ⲟⲩⲛⲧϥ ⲉⲝⲟⲩⲥⲓⲁ ⲉⲓ ⲉϩⲣⲁⲓ ⲉϫⲱⲕ ⲙⲡⲣⲕⲁ ⲙⲁ ⲛⲁϥ ⲛϩⲏⲧⲕ ϫⲉ ⲉⲕϣⲁⲛⲕⲱ ϥⲛⲁⲧⲣⲉ ϩⲉⲛⲛⲟϭ ⲛⲛⲟⲃⲉ ϣⲱⲡⲉ ⲛϩⲏⲧⲕ

10:5  ⲟⲩⲛⲟⲩⲡⲟⲛⲏⲣⲓⲁ ⲉⲁⲓⲛⲁⲩ ⲉⲣⲟⲥ ϩⲁⲣⲟϥ ⲙⲡⲣⲏ ⲛⲧϩⲉ ⲛⲟⲩϩⲱⲃ ⲛⲟⲩⲱϣ ⲉⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲉⲧⲉ ⲟⲩⲛⲧϥ ⲉⲝⲟⲩⲥⲓⲁ

10:6  ⲡⲁⲧϩⲏⲧ ⲁⲩⲧⲁⲁϥ ⲉϩⲉⲛⲛⲟϭ ⲛϫⲓⲥⲉ ⲛⲣⲙⲙⲁⲟ ϩⲱⲟⲩ ⲥⲉⲛⲁϩⲙⲟⲥ ϩⲛ ⲟⲩⲑⲃⲃⲓⲟ

10:7  ⲁⲓⲛⲁⲩ ⲉϩⲉⲛϩⲙϩⲁⲗ ⲉⲩϩⲓϫⲛ ϩⲉⲛϩⲧⲱⲱⲣ ϩⲉⲛⲁⲣⲭⲱⲛ ϩⲱⲟⲩ ⲉⲩⲙⲟⲟϣⲉ ϩⲓϫⲙ ⲡⲕⲁϩ ⲛⲧϩⲉ ⲛϩⲉⲛϩⲙϩⲁⲗ

10:8  ⲡⲉⲧϣⲓⲕⲉ ⲛⲟⲩϩⲓⲉⲓⲧ ϥⲛⲁϩⲉ ⲉϩⲣⲁⲓ ⲉⲣⲟϥ ⲁⲩⲱ ⲡⲉⲧϣⲟⲣϣⲣ ⲛⲟⲩϫⲟⲉ ⲛⲧⲟϥ ⲡⲉⲧⲉⲣⲉ ⲡϩⲟϥ ⲛⲁⲗⲟⲕⲥϥ

10:9  ⲡⲉⲧⲡⲱⲣⲕ ⲛϩⲉⲛⲱⲛⲉ ⲉϥⲛⲁϣⲡ ⲙⲕⲁϩ ⲉϫⲱⲟⲩ ⲁⲩⲱ ⲡⲉⲧⲛⲁⲡⲱϩ ⲛϩⲉⲛϣⲉ ϥⲛⲁⲕⲓⲛⲇⲉⲛⲉⲩⲉ ⲛϩⲏⲧⲟⲩ

10:10  ⲉⲣϣⲁⲛⲡⲡⲉⲛⲓⲡⲉ ⲥⲱϩⲙ ⲉⲃⲟⲗ ⲁⲩⲱ ⲛⲧⲟϥ ⲁϥϣⲧⲣⲧⲣ ⲡϩⲟ ⲁⲩⲱ ϥⲛⲁϯϭⲟⲙ ⲛⲁϥ ϩⲛ ⲟⲩϭⲟⲙ ⲡⲉϩⲟⲩⲟ ϭⲉ ⲙⲡⲣⲱⲙⲉ ⲧⲥⲟⲫⲓⲁ ⲧⲉ

10:11  ⲉⲣϣⲁⲛⲡϩⲟϥ ⲗⲟⲕⲥ ϩⲛ ⲟⲩⲕⲁⲥⲕⲥ ⲙⲛ ϩⲟⲩⲟ ϣⲟⲟⲡ ⲙⲡⲣⲉϥⲙⲟⲩⲧⲉ

10:12  ⲛϣⲁϫⲉ ⲛⲧⲧⲁⲡⲣⲟ ⲙⲡⲥⲟⲫⲟⲥ ⲉⲩϣⲟⲟⲡ ϩⲛ ⲟⲩⲭⲁⲣⲓⲥ ⲛⲉⲥⲡⲟⲧⲟⲩ ϩⲱⲱϥ ⲙⲡⲁⲧϩⲏⲧ ⲥⲉⲛⲁⲟⲙⲥϥ

10:13  ⲧⲁⲣⲭⲏ ⲛⲛϣⲁϫⲉ ⲛⲧⲉϥⲧⲁⲡⲣⲟ ⲧⲉ ⲧⲙⲛⲧⲁⲧϩⲏⲧ ⲁⲩⲱ ⲧⲉϥϩⲁⲏ ⲟⲩϣⲉⲉⲓ ⲇⲉ ⲙⲡⲟⲛⲏⲣⲟⲛ

10:14  ⲁⲩⲱ ⲡⲁⲧϩⲏⲧ ϥⲛⲁⲧⲁϣⲟ ⲛⲛⲉϥϣⲁϫⲉ ⲡⲣⲱⲙⲉ ⲛⲉⲓⲙⲉ ϫⲉ ⲟⲩ ⲡⲉⲛⲧⲁϥϣⲱⲡⲉ ⲁⲩⲱ ⲟⲩ ⲡⲉⲧⲛⲁϣⲱⲡⲉ ⲁⲩⲱ ⲡⲉⲧⲛⲏⲩ ⲙⲛⲛⲥⲱϥ ⲛⲓⲙ ⲡⲉⲧⲛⲁⲧⲁⲙⲟϥ ϫⲉ ⲛⲓⲙ ⲡⲉ

10:15  ⲡϩⲓⲥⲉ ⲛⲛⲣⲱⲙⲉ ⲛⲁⲧϩⲙⲕⲟϥ ⲡⲁⲓ ⲉⲧⲙⲡⲉϥⲉⲓⲙⲉ ⲉⲧⲣⲉϥⲃⲱⲕ ⲉⲧⲡⲟⲗⲓⲥ

10:16  ⲟⲩⲟⲓ ⲛⲉ ⲧⲡⲟⲗⲓⲥ ⲉⲩϣⲏⲣⲉ ϣⲏⲙ ⲡⲉ ⲡⲟⲩⲣⲣⲟ ⲁⲩⲱ ⲛⲟⲩⲁⲣⲭⲱⲛ ⲉⲩⲟⲩⲱⲙ ⲙⲡⲛⲁⲩ ⲛϩⲧⲟⲟⲩⲉ

10:17  ⲛⲁⲓⲁⲧⲕ ⲡⲕⲁϩ ⲉⲩϣⲏⲣⲉ ⲛⲣⲙϩⲉ ⲡⲉ ⲡⲉⲕⲣⲣⲟ ⲁⲩⲱ ⲛⲉⲕⲁⲣⲭⲱⲛ ⲉⲩⲛⲁⲟⲩⲱⲙ ϩⲛ ⲟⲩϭⲟⲙ ⲙⲡⲉⲩⲟⲉⲓϣ ⲁⲩⲱ ⲛⲥⲉⲛⲁϫⲓϣⲓⲡⲉ ⲁⲛ

10:18  ⲛⲉⲧϩⲛ ϩⲉⲛⲙⲛⲧⲣⲉϥϫⲛⲁⲁⲩ ⲥⲉⲛⲁⲑⲃⲃⲓⲟ ⲁⲩⲱ ⲡⲏⲓ ⲛⲁⲁϣⲁϩⲟⲙ ϩⲛ ⲧⲟⲩⲁⲥϥⲉ ⲛⲛϭⲓϫ

10:19  ⲉⲩⲧⲁⲙⲓⲟ ⲙⲡⲟⲉⲓⲕ ⲉⲩⲥⲱⲃⲉ ⲁⲩⲱ ⲟⲩⲛⲉϩ ⲙⲛ ⲟⲩⲏⲣⲡ ⲉⲧⲣⲉⲛⲉⲧⲟⲛϩ ⲉⲩⲫⲣⲁⲛⲉ ⲁⲩⲱ ϩⲱⲃ ⲛⲓⲙ ⲛⲁⲥⲱⲧⲙ ⲛⲥⲁ ⲡϩⲁⲧ

10:20  ⲁⲩⲱ ϩⲛ ⲧⲉⲕⲥⲩⲛⲏⲇⲩⲥⲓⲥ ⲙⲡⲣⲥⲁϩⲟⲩ ⲙⲡⲣⲣⲟ ⲁⲩⲱ ⲙⲡⲣⲥⲁϩⲟⲩ ⲛⲟⲩⲣⲙⲙⲁⲟ ϩⲛ ⲛⲧⲁⲙⲓⲟⲛ ⲛⲛⲉⲕⲕⲟⲓⲧⲱⲛ ϫⲉ ⲡϩⲁⲗⲏⲧ ⲛⲧⲡⲉ ϥⲛⲁϫⲓ ⲙⲡⲉⲕϩⲣⲟⲟⲩ ⲁⲩⲱ ⲡⲉⲧⲉⲣⲉ ⲛⲧⲛϩ ⲙⲙⲟϥ ϥⲛⲁⲧⲁⲩⲟ ⲛⲛⲉⲕϣⲁϫⲉ