CopSahBible2 - Ecclesiastes - 7

7:1  ⲟⲩ ⲡⲉ ⲡⲉϩⲟⲩⲟ ⲙⲡⲣⲱⲙⲉ ⲁⲩⲱ ⲛⲓⲙ ⲡⲉⲧⲥⲟⲟⲩⲛ ϫⲉ ⲟⲩ ⲡⲉ ⲡⲁⲅⲁⲑⲟⲛ ⲙⲡⲣⲱⲙⲉ ϩⲙ ⲡⲉϥⲱⲛϩ ⲏ ⲧⲏⲡⲉ ⲛⲛⲉϩⲟⲟⲩ ⲙⲡⲱⲛϩ ⲛⲧⲉϥⲙⲛⲧⲡⲉⲧϣⲟⲩⲉⲓⲧ ⲁⲩⲱ ⲁϥⲁⲁⲩ ϩⲛ ⲟⲩϩⲟⲓⲃⲉⲥ ϫⲉ ⲛⲓⲙ ⲡⲉⲧⲛⲁⲧⲁⲙⲉ ⲡⲣⲱⲙⲉ ϫⲉ ⲟⲩ ⲡⲉⲧⲛⲁϣⲱⲡⲉ ⲙⲛⲛⲥⲱϥ ϩⲁⲣⲟϥ ⲙⲡⲣⲏ

7:2  ⲟⲩⲁⲅⲁⲑⲟⲛ ⲡⲉ ⲟⲩⲣⲁⲛ ⲉϩⲟⲩⲉ ⲟⲩⲛⲉϩ ⲏ ⲟⲩⲛⲁ ⲛⲁⲅⲁⲑⲟⲛ ⲁⲩⲱ ⲟⲩⲁⲅⲁⲑⲟⲛ ⲡⲉ ⲡϩⲟⲟⲩ ⲙⲡⲙⲟⲩ ⲉϩⲟⲩⲉ ⲡⲉϩⲟⲟⲩ ⲙⲡⲙⲓⲥⲉ

7:3  ⲟⲩⲁⲅⲁⲑⲟⲛ ⲡⲉ ⲃⲱⲕ ⲉϩⲟⲩⲛ ⲉⲡⲏⲓ ⲙⲡϩⲏⲃⲉ ⲉϩⲟⲩⲉ ⲃⲱⲕ ⲉϩⲟⲩⲛ ⲉⲡⲏⲓ ⲙⲡⲥⲱ ⲉⲃⲟⲗ ϫⲉ ⲧⲁⲓ ⲧⲉ ⲧϩⲁⲏ ⲛⲣⲱⲙⲉ ⲛⲓⲙ ⲁⲩⲱ ⲡⲉⲧⲟⲛϩ ϥⲛⲁϯ ⲛⲟⲩⲁⲅⲁⲑⲟⲛ ⲉϩⲣⲁⲓ ⲉⲡⲉϥϩⲏⲧ

7:4  ⲟⲩⲁⲅⲁⲑⲟⲛ ⲡⲉ ⲡϭⲱⲛⲧ ⲉϩⲟⲩⲉ ⲡⲥⲱⲃⲉ ϫⲉ ϥⲛⲁϯ ⲟⲩ ⲛⲁϥ ϩⲙ ⲡϩⲏⲧ ⲙⲡⲉϥϩⲟ

7:5  ⲡϩⲏⲧ ⲛⲥⲁⲃⲉⲉⲩ ⲉϥϩⲙ ⲡⲏⲓ ⲙⲡϩⲏⲃⲉ ⲡϩⲏⲧ ϩⲱⲱϥ ⲛⲛⲁⲧϩⲏⲧ ⲉϥϩⲙ ⲡⲏⲓ ⲙⲡⲟⲩⲛⲟϥ

7:6  ⲟⲩⲁⲅⲁⲑⲟⲛ ⲡⲉ ⲥⲱⲧⲙ ⲉⲡⲉϫⲡⲓⲟ ⲙⲡⲥⲁⲃⲉ ⲉϩⲟⲩⲉ ⲟⲩⲣⲱⲙⲉ ⲉϥⲥⲱⲧⲙ ⲉⲡϫⲱ ⲛⲛⲁⲧϩⲏⲧ

7:7  ⲛⲧϩⲉ ⲙⲡⲉϩⲣⲟⲟⲩ ⲛϩⲉⲛϣⲟⲛⲧⲉ ⲉⲩⲙⲟⲩϩ ϩⲁ ⲡⲉⲭⲁⲗⲕⲓⲟⲛ ⲧⲁⲓ ⲧⲉ ⲧϩⲉ ⲙⲡⲥⲱⲃⲉ ⲛⲛⲁⲧϩⲏⲧ ⲡⲉⲓⲕⲉ ⲟⲛ ⲟⲩⲡⲉⲧϣⲟⲩⲉⲓⲧ ⲡⲉ

7:8  ϫⲉ ⲧⲙⲛⲧⲗⲁ ⲥⲛⲁⲕⲱⲧⲉ ⲙⲛ ⲡⲥⲁⲃⲉ ⲁⲩⲱ ϥⲛⲁⲧⲁⲕⲟ ⲙⲡϩⲏⲧ ⲛⲧⲉϥⲙⲛⲧⲉⲩⲅⲉⲛⲏⲥ

7:9  ⲛⲁⲛⲟⲩ ⲧϩⲁⲏ ⲛⲛϣⲁϫⲉ ⲉϩⲟⲩⲉ ⲧⲉⲩⲁⲣⲭⲏ ⲟⲩⲁⲅⲁⲑⲟⲛ ⲡⲉ ⲟⲩϩⲁⲣϣϩⲏⲧ ⲉϩⲟⲩⲉ ⲟⲩⲡⲛⲉⲩⲙⲁ ⲉϥϫⲟⲥⲉ

7:10  ⲙⲡⲣϭⲉⲡⲏ ⲉϭⲱⲛⲧ ϩⲙ ⲡⲉⲕⲡⲛⲉⲩⲙⲁ ϫⲉ ⲡϭⲱⲛⲧ ⲛⲁⲙⲧⲟⲛ ⲙⲙⲟϥ ϩⲛ ⲕⲟⲩⲛⲟⲩ ⲛⲛⲁⲧϩⲏⲧ

7:11  ⲙⲡⲣϫⲟⲟⲥ ϫⲉ ⲉⲧⲃⲉ ⲟⲩ ⲁⲓϣⲱⲡⲉ ϫⲉ ⲛⲉϩⲟⲟⲩ ⲛϣⲟⲣⲡ ⲛⲁⲛⲟⲩⲟⲩ ⲉϩⲟⲩⲉ ⲉⲛⲁⲓ ϫⲉ ⲛⲧⲁⲕϣⲓⲛⲉ ⲁⲛ ⲉⲧⲃⲉ ⲡⲁⲓ ϩⲛ ⲟⲩⲥⲟⲫⲓⲁ

7:12  ⲁⲩⲱ ⲟⲩⲛⲟⲩϩⲟⲩⲟ ϣⲟⲟⲡ ⲛⲛⲉⲧⲛⲁⲩ ⲉⲡⲣⲏ

7:13  ϫⲉ ⲧⲥⲟⲫⲓⲁ ⲉⲥϣⲟⲟⲡ ϩⲛ ⲧⲉⲥϩⲟⲓⲃⲉⲥ ⲉⲥⲟ ⲛⲧϩⲉ ⲛⲟⲩϩⲟⲓⲃⲉⲥ ⲛϩⲁⲧ ⲁⲩⲱ ⲟⲩⲛϩⲟⲩⲟ ϣⲟⲟⲡ ⲛⲧⲉⲅⲛⲟⲥⲓⲥ ⲛⲧⲥⲟⲫⲓⲁ ⲉⲥⲛⲁⲧⲁⲛϩⲟ ⲙⲡⲉⲧⲏⲡ ⲉⲣⲟⲥ

7:14  ⲁⲓⲛⲁⲩ ⲉⲛⲧⲁⲙⲓⲟ ⲙⲡⲛⲟⲩⲧⲉ ϫⲉ ⲛⲓⲙ ⲡⲉⲧⲛⲁⲉϣϭⲙϭⲟⲙ ⲉⲕⲟⲥⲙⲉⲓ ⲙⲡⲉⲧⲉⲣⲉⲡⲛⲟⲩⲧⲉ ⲛⲁⲡⲟⲟⲛϥ

7:15  ϩⲙ ⲡⲉϩⲟⲟⲩ ⲙⲡⲟⲩⲛⲟϥ ϣⲓⲛⲉ ϩⲛ ⲟⲩⲁⲅⲁⲑⲟⲛ ⲁⲩⲱ ⲛⲅⲛⲁⲩ ϩⲙ ⲡⲉϩⲟⲟⲩ ⲛⲧⲕⲁⲕⲓⲁ ⲁⲩⲱ ⲛⲅϯϩⲧⲏⲕ ⲉⲡⲁⲓ ϩⲛ ⲟⲩϣⲱⲛϥ ⲡⲁⲓ ⲁⲡⲛⲟⲩⲧⲉ ⲧⲁⲙⲓⲟϥ ⲉⲧⲃⲉ ⲟⲩϭⲓⲛϣⲁϫⲉ ϫⲉⲕⲁⲥ ⲛⲛⲉⲡⲣⲱⲙⲉ ϩⲉ ⲉⲗⲁⲁⲩ ⲙⲛⲛⲥⲱϥ

7:16  ϩⲱⲃ ⲛⲓⲙ ⲁⲓⲛⲁⲩ ⲉⲣⲟⲟⲩ ϩⲛ ⲛⲉϩⲟⲟⲩ ⲛⲧⲁⲙⲛⲧⲡⲉⲧϣⲟⲩⲉⲓⲧ ⲟⲩⲛⲇⲓⲕⲁⲓⲟⲥ ⲉϣⲁϥⲙⲟⲩ ϩⲛ ⲧⲉϥⲙⲛⲧⲙⲉ ⲁⲩⲱ ⲟⲩⲛⲁⲥⲉⲃⲏⲥ ⲉϥⲙⲏⲛ ⲉⲃⲟⲗ ϩⲛ ⲧⲉϥⲕⲁⲕⲓⲁ

7:17  ⲙⲡⲣϣⲱⲡⲉ ⲛⲇⲓⲕⲁⲓⲟⲥ ⲉⲡⲉϩⲟⲩⲟ ⲁⲩⲱ ⲙⲡⲣⲁⲁⲕ ⲛⲣⲙⲛⲥⲃⲱ ⲉⲡⲉϩⲟⲩⲟ ⲙⲏⲡⲱⲥ ⲛⲅⲡⲱϣⲥ ⲉⲃⲟⲗ

7:18  ⲙⲡⲣⲣⲁⲥⲉⲃⲏⲥ ⲟⲛ ⲉⲡⲉϩⲟⲩⲟ ⲁⲩⲱ ⲙⲡⲣϣⲱⲡⲉ ⲉⲕⲛⲁϣⲧ ϫⲉ ⲛⲛⲉⲕⲙⲟⲩ ⲡⲃⲟⲗ ⲙⲡⲉⲕⲟⲩⲟⲉⲓϣ

7:19  ⲟⲩⲁⲅⲁⲑⲟⲛ ⲡⲉ ⲉⲧⲣⲉⲕϭⲟⲗϫⲕ ϩⲙ ⲡⲁⲓ ⲁⲩⲱ ⲙⲡϫⲱϩⲙ ⲛⲧⲉⲕϭⲓϫ ⲉⲃⲟⲗ ϩⲙ ⲡⲁⲓ ϫⲉ ⲛⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲟⲩⲛϩⲱⲃ ⲛⲓⲙ ⲛⲁⲅⲁⲑⲟⲛ ⲛⲁϣⲱⲡⲉ ⲛⲁⲩ

7:20  ⲧⲥⲟⲫⲓⲁ ⲛⲁⲃⲟⲏⲑⲉⲓ ⲉⲡⲥⲟⲫⲟⲥ ⲉϩⲟⲩⲉ ⲙⲏⲧ ⲉⲩⲟ ⲛⲉⲝⲟⲩⲥⲓⲁ ⲉⲩϣⲟⲟⲡ ϩⲛ ⲟⲩⲡⲟⲗⲓⲥ

7:21  ϫⲉ ⲙⲛⲣⲱⲙⲉ ⲛⲇⲓⲕⲁⲓⲟⲥ ϩⲓϫⲙ ⲡⲕⲁϩ ⲉϥⲛⲁⲉⲓⲣⲉ ⲛⲟⲩⲁⲅⲁⲑⲟⲛ ⲛϥⲧⲙⲣⲛⲟⲃⲉ

7:22  ⲁⲩⲱ ⲛϣⲁϫⲉ ⲧⲏⲣⲟⲩ ⲉⲧⲉⲣⲉⲛⲁⲥⲉⲃⲏⲥ ⲛⲁϫⲟⲟⲩ ⲙⲡⲣϯ ⲙⲡⲉⲕϩⲏⲧ ⲉⲣⲟⲟⲩ ϫⲉⲕⲁⲥ ⲛⲛⲉⲕⲥⲱⲧⲙ ⲉⲡⲉⲕϩⲙϩⲁⲗ ⲉϥⲥⲁϩⲟⲩ ⲙⲙⲟⲕ

7:23  ϫⲉ ϥⲛⲁⲡⲟⲛⲉⲣⲉⲩⲉ ⲉⲣⲟⲕ ⲛϩⲁϩ ⲛⲥⲟⲡ ⲁⲩⲱ ⲡⲉⲕϩⲏⲧ ⲛⲁⲙⲟⲕϩⲕ ⲛϩⲁϩ ⲛⲥⲟⲡ ϩⲛ ⲛⲉⲕϩⲓⲟⲟⲩⲉ ϫⲉ ⲛⲧⲟⲕ ϩⲱⲱⲕ ⲟⲛ ⲕⲥⲁϩⲟⲩ ⲛϩⲉⲛⲕⲟⲟⲩⲉ

7:24  ⲛⲁⲓ ⲧⲏⲣⲟⲩ ⲁⲓϫⲟⲛⲧⲟⲩ ϩⲛ ⲧⲥⲟⲫⲓⲁ ⲁⲩⲱ ⲁⲓϫⲟⲟⲥ ϫⲉ ϯⲛⲁϣⲱⲡⲉ ⲛϩⲟⲩⲉ ⲥⲟⲫⲟⲥ

7:25  ⲁⲩⲱ ⲛⲧⲟⲥ ⲁⲥⲟⲩⲉ ⲉⲃⲟⲗ ⲙⲙⲟⲓ ⲉⲙⲁⲧⲉ ⲡⲁⲣⲁ ⲧϩⲉ ⲉⲛⲉⲥⲟ ⲙⲙⲟⲥ ⲁⲩⲱ ⲉⲛⲁϣⲉⲡⲉⲥϣⲓⲕ ⲛⲓⲙ ⲡⲉⲧⲛⲁϣⲧⲁϩⲟⲥ

7:26  ⲁⲓϯⲟⲩⲟⲓ ⲁⲛⲟⲕ ⲙⲛ ⲡⲁϩⲏⲧ ⲉⲉⲓⲙⲉ ⲉⲙⲟⲩϣⲧ ⲁⲩⲱ ⲉϣⲓⲛⲉ ⲛⲥⲁ ⲟⲩⲥⲟⲫⲓⲁ ⲙⲛ ⲟⲩϣⲁϫⲉ ⲁⲩⲱ ⲉⲉⲓⲙⲉ ⲉⲧⲙⲛⲧⲁⲧϩⲏⲧ ⲙⲡⲁⲥⲉⲃⲏⲥ ⲙⲛ ⲡϩⲓⲥⲉ ⲙⲛ ⲡϣⲉⲉⲓ

7:27  ⲁⲩⲱ ⲁⲛⲟⲕ ⲁⲓϩⲉ ⲉⲣⲟⲥ ⲁⲩⲱ ⲁⲛⲟⲕ ⲁⲓϫⲟⲟⲥ ϫⲉ ⲥⲥⲁϣⲉ ⲉϩⲟⲩⲉ ⲉⲡⲙⲟⲩ ⲛϭⲓ ⲧⲉⲥϩⲓⲙⲉ ⲧⲁⲓ ⲉⲥⲟ ⲛϭⲟⲣϭⲥ ⲁⲩⲱ ⲡⲉⲥϩⲏⲧ ⲉϥⲟ ⲛⲧϩⲉ ⲛⲛⲉⲓⲁⲃⲱ ⲉⲣⲉⲟⲩϩⲁϭⲉ ϩⲛ ⲛⲉⲥϭⲓϫ ⲡⲁⲕⲁⲑⲟⲥ ⲉⲧⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲥⲉⲛⲁⲛⲁϩⲙⲉϥ ⲉⲣⲟⲥ ⲡⲉⲧⲣⲛⲟⲃⲉ ϩⲱⲱϥ ⲥⲉⲛⲁϭⲟⲡϥ ⲛϩⲏⲧⲥ

7:28  ⲉⲓⲥ ⲡⲁⲓ ⲁⲓϩⲉ ⲉⲣⲟϥ ⲡⲉϫⲉⲡⲉⲕⲗⲏⲥⲓⲁⲥⲧⲏⲥ ⲉⲓⲉ ⲉⲥⲟⲩⲛϩ ⲛⲥⲁ ⲟⲩⲉⲓ ⲉϩⲉ ⲉⲩⲗⲟⲕⲓⲥⲙⲟⲥ

7:29  ⲡⲁⲓ ⲛⲧⲁⲧⲁⲯⲩⲭⲏ ϣⲓⲛⲉ ⲛⲥⲱϥ ⲁⲩⲱ ⲙⲡⲉⲥϩⲉ ⲉⲣⲟϥ ⲁⲩⲱ ⲟⲩⲣⲱⲙⲉ ⲛⲟⲩⲱⲧ ⲡⲉ ⲛⲧⲁⲓϩⲉ ⲉⲣⲟϥ ϩⲛ ϣⲟ ⲁⲩⲱ ⲟⲩⲥϩⲓⲙⲉ ⲙⲡⲉⲓϩⲉ ⲉⲣⲟⲥ ϩⲛ ⲛⲁⲓ ⲧⲏⲣⲟⲩ

7:30  ⲙⲡⲃⲟⲗ ⲇⲉ ⲛⲛⲁⲓ ⲡⲁⲓ ⲡⲉ ⲛⲧⲁⲓϩⲉ ⲉⲣⲟϥ ⲉⲧⲉⲡⲉⲛⲧⲁⲡⲛⲟⲩⲧⲉ ⲧⲁⲙⲓⲟϥ ⲡⲣⲱⲙⲉ ⲁⲓϩⲉ ⲉⲣⲟϥ ⲉϥⲥⲟⲩⲧⲱⲛ ⲁⲩⲱ ⲛⲧⲟⲟⲩ ⲁⲩⲕⲱⲧⲉ ⲛⲥⲁ ϩⲉⲛⲗⲟⲅⲓⲥⲙⲟⲥ ⲛⲁϣⲱⲟⲩ ⲛⲓⲙ ⲡⲉⲧⲥⲟⲟⲩⲛ ⲛⲛⲥⲟⲫⲟⲥ ⲁⲩⲱ ⲛⲓⲙ ⲡⲉⲧⲥⲟⲟⲩⲛ ⲙⲡⲃⲱⲗ ⲙⲡϣⲁϫⲉ