CSlElizabeth - Hosea - 2

2:1  Рцыте брату своему: людие Мои: и сестре своей: Помилованная.

2:2  Судитеся с материю своею, судитеся, яко та не жена Моя, и Аз не муж ея: и отвергу блужения ея от лица Моего и любодейство ея от среды сосцу ея:

2:3  яко да совлеку ю нагу и поставлю ю якоже в день рождения ея, и положу ю яко пустыню, и учиню ю яко землю безводну, и убию оную жаждею:

2:4  и чад ея не помилую, яко чада блужения суть,

2:5  яко соблуди мати их, посрамися родившая их, рече бо: пойду вслед похотников моих, дающих мне хлебы моя и воду мою, и ризы моя и плащаницы моя, и масло мое и вся, елика мне достоят.

2:6  Сего ради, се, Аз загражду путь ея тернием и возгражду распутия ея, и стези своея не обрящет:

2:7  и поженет похотники своя и не постигнет их, и взыщет их и не обрящет, и речет: пойду и возвращуся к мужу моему первому, яко добрее ми бе тогда, нежели ныне.

2:8  Но та не уразуме, яко Аз дах ей пшеницу и вино и масло, и сребро умножих ей: сия же сребряны и златы сотвори Ваалу.

2:9  Сего ради обращуся и возму пшеницу Мою во время ея и вино Мое во время его, и отиму ризы Моя и плащаницы Моя, да не покрывает студа своего:

2:10  и ныне открыю нечистоту ея пред похотниками ея, и никтоже отимет ея от руки Моея:

2:11  и отвращу вся веселия ея и праздники ея, и новомесячия ея и субботы ея и вся празднества ея,

2:12  и погублю виноград ея и смоквы ея, о нихже рече: мзды ми суть сия, яже даша мне похотницы мои: и положу я в свидение, и поядят я зверие селнии и птицы небесныя и гади земнии:

2:13  и отмщу на ней дни Ваалимовы, в няже требы кладяше им, и вдеваше усерязи своя и мониста своя, и хождаше вслед похотников своих, а Мене забы, глаголет Господь.

2:14  Сего ради, се, Аз соблажню ю, и учиню ю яко пустыню, и возглаголю в сердце ея,

2:15  и дам ей притяжание ея оттуду и поляну Ахорову, отверсти смысл ея: и смирится тамо по днем детства своего и по днем изведения своего от земли Египетски.

2:16  И будет в той день, наречет Мя муж мой, глаголет Господь, а не прозовет Мене ктому Ваалим.

2:17  И отвергу имена Ваалимля от уст ея, и не воспомянутся ксему имена их.

2:18  И завещаю им завет в той день со зверьми селными и со птицами небесными и с гады земными, и лук и мечь и брань сокрушу от земли, и вселю я со упованием:

2:19  и обручу тя Себе во век и обручу тя Себе в правде и в суде и в милости и в щедротах:

2:20  и обручу тя Себе в вере, и увеси Господа.

2:21  И будет в той день, глаголет Господь, послушаю небесе, а оное послушает земли,

2:22  и земля послушает пшеницы и вина и масла, и сии послушают Иезраеля:

2:23  и всею оную Себе на земли и помилую Непомилованную: и реку не людем Моим: людие Мои есте вы: и тии рекут: Господь Бог наш Ты еси.