Geez - Judges - 4

4:1  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወናኦድሰ ፡ ሞተ ።

4:2  ወአግብኦሙ ፡ እግዚአብሔር ፡ ውስተ ፡ እደ ፡ ኢያሚን ፡ ንጉሠ ፡ ከናአን ፡ ዘነግሠ ፡ በአሶር ፡ ወመልአከ ፡ ሰራዊቱ ፡ ሲሳራ ፡ ወውእቱሰ ፡ ይነብር ፡ ውስተ ፡ አሲሮት ፡ ዘአሕዛብ ።

4:3  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ እስመቦ ፡ ትስዐተ ፡ ምእተ ፡ ሰረገላተ ፡ ዘኀፂን ፡ ወውእቱ ፡ አሕመሞሙ ፡ ለእስራኤል ፡ እንዘ ፡ ይሣቅዮሙ ፡ ዕሥራ ፡ (ወኀምስተ ፡) ዓመተ ።

4:4  ወዴቦራ ፡ ብእሲት ፡ ነቢይት ፡ ብእሲተ ፡ ለፊዶት ፡ ይእቲ ፡ ትኴንኖሙ ፡ ለእስራኤል ፡ በእማንቱ ፡ መዋዕል ።

4:5  ወዴቦራሰ ፡ ትነብር ፡ ኀበ ፡ ፊኒቃ ፡ ማእከለ ፡ ኢያማ ፡ ወማእከለ ፡ ቤቴል ፡ ውስተ ፡ ደብረ ፡ ኤፍሬም ፡ ወዐርጉ ፡ ኀቤሃ ፡ ደቂቀ ፡ እስራኤል ፡ ከመ ፡ ይትኰነኑ ።

4:6  ወፈነወት ፡ ዴቦራ ፡ ወጸውዐቶ ፡ ለባረቅ ፡ ወልደ ፡ አቢኔሔም ፡ እምነ ፡ ቃዴስ ፡ [ዘ]ንፍታሌም ፡ ወትቤሎ ፡ አኮ[ኑ] ፡ ኪያከ ፡ ኦዘዘ ፡ እግዚአብሔር ፡ አምላከ ፡ እስራኤል ፡ ከመ ፡ ትሑር ፡ ውስተ ፡ ደብረ ፡ ታቦር ፡ ወንሣእ ፡ ምስሌከ ፡ ፻-፻ዕደወ ፡ እምነ ፡ ደቂቀ ፡ ንፍታሌም ፡ ወእምነ ፡ ደቂቀ ፡ ዛቡሎን ።

4:7  ወእወስደከ ፡ ኀበ ፡ ፈለገ ፡ ቂሶን ፡ ላዕለ ፡ ሲሳራ ፡ መልአከ ፡ ሰራዊቱ ፡ ለኢያሚን ፡ ወሰረገላቲሁ ፡ ወብዝኁ ፡ ወኣገብኦ ፡ ውስተ ፡ እዴከ ።

4:8  ወይቤላ ፡ ባረቅ ፡ እመ ፡ ተሐውሪ ፡ ምስሌየ ፡ አሐውር ፡ ወእመሰ ፡ ኢተሐውሪ ፡ ምስሌየ ፡ ኢየሐውር ፡ እስመ ፡ ኢያአምር ፡ ዕለተ ፡ እንተ ፡ ባቲ ፡ ይፈቅድ ፡ እግዚአብሔር ፡ ይፈኑ ፡ መልአኮ ፡ ምስሌየ ።

4:9  ወትቤሎ ፡ ዴቦራ ፡ አሐውር ፡ ምስሌከ ፡ ወባሕቱ ፡ አእምር ፡ ከመ ፡ ኢኮነ ፡ ከመ ፡ ዘቀዲሙ ፡ ቃልከ ፡ በፍኖት ፡ እንተ ፡ አንተ ፡ ሖርከ ፡ እስመ ፡ ውስተ ፡ እደ ፡ ብእሲት ፡ ያገብኦ ፡ እግዚአብሔር ፡ ለሲሳራ ፡ ወተንሥአት ፡ ዴቦራ ፡ ወሖረት ፡ ምስለ ፡ ባረቅ ፡ እምነ ፡ ቃዴስ ።

4:10  ወአዘዞሙ ፡ ባረቅ ፡ ለዛቡሎን ፡ ወለንፍታሌም ፡ በቃዴስ ፡ ወዐርጉ ፡ ምስሌሁ ፡ እልፍ ፡ ብእሲ ፡ ወዴቦራሂ ፡ ዐርገት ፡ ምስሌሁ ።

4:11  ወእለ ፡ ቀርቡ ፡ ለቄኔዝ ፡ ተፈልጡ ፡ እምነ ፡ ደቂቀ ፡ ኢዮባብ ፡ ሐሙሁ ፡ ለሙሴ ፡ ወኀደረ ፡ ትዕይንቱ ፡ ኀበ ፡ ዕፅ ፡ ለበይት ፡ ኀበ ፡ ቅሩበ ፡ ቃዴስ ።

4:12  ወዜነውዎ ፡ ለሲሳራ ፡ ከመ ፡ ዐርገ ፡ ባረቅ ፡ ወልደ ፡ አቢኔሔም ፡ ውስተ ፡ ደብረ ፡ ታቦር ።

4:13  ወአምጽአ ፡ ሲሳራ ፡ ኵሎ ፡ ሰረገላቲሁ ፡ እስመ ፡ ፱፻ሰረገላተ ፡ ዘኀፂን ፡ ቦ ፡ ወኵሎ ፡ አሕዛቢሁ ፡ እምነ ፡ አሪሶት ፡ ዘአሕዛብ ፡ ውስተ ፡ ፈለገ ፡ ቂሶን ።

4:14  ወትቤሎ ፡ ዴቦራ ፡ ለባረቅ ፡ ተንሥእ ፡ እስመ ፡ ዛቲ ፡ ዕለት ፡ እንተ ፡ ባቲ ፡ ያገብኦ ፡ እግዚአብሔር ፡ ለሲሳራ ፡ ውስተ ፡ እዴከ ፡ ወናሁ ፡ እግዚአብሔር ፡ የሐውር ፡ ቅድሜከ ፡ ወወረደ ፡ ባረቅ ፡ እምነ ፡ ደብረ ፡ ታቦር ፡ ወእልፍ ፡ ብእሲ ፡ ይተልዎ ።

4:15  ወአደንገፆ ፡ እግዚአብሔር ፡ ለሲሳራ ፡ ወለኵሉ ፡ ሰረገላቲሁ ፡ ወለኵሉ ፡ ትዕይንቱ ፡ አውደቆሙ ፡ ቅድመ ፡ ባረቅ ፡ በአፈ ፡ ኀፂን ፡ ወወረደ ፡ ሲሳራ ፡ እምነ ፡ ሰረገላቲሁ ፡ ወጐየ ፡ በእግሩ ።

4:16  ወዴገነ ፡ ባረቅ ፡ ወተለወ ፡ ሰረገላቲሁ ፡ ወዴገነ ፡ ትዕይንቶ ፡ እስከ ፡ ሐቅለ ፡ አሕዛብ ፡ ወሞተ ፡ ኵሉ ፡ ትዕይንተ ፡ ሲሳራ ፡ በአፈ ፡ ኀፂን ፡ ወኢተርፈ ፡ ወኢአሐዱ ።

4:17  ወሲሳራሰ ፡ ጐየ ፡ በእግሩ ፡ ውስተ ፡ ትዕይንተ ፡ ኢያኤል ፡ ብእሲተ ፡ ካቤር ፡ ካልኡ ፡ ለቄኔው ፡ እስመ ፡ ሰላም ፡ ውእቱ ፡ ማእከሎሙ ፡ ለኢየቢን ፡ ንጉሠ ፡ [አሶር ፡] ወማእከለ ፡ ቤተ ፡ ካቤር ፡ ቄንያዊ ።

4:18  ወወፅአት ፡ ኢያኤል ፡ ወተቀበለቶ ፡ ለሲሳራ ፡ ወትቤሎ ፡ ገሐሥ ፡ እግዚእየ ፡ ገሐሥ ፡ ኀቤየ ፡ ወኢትፍራህ ፡ ወግሕሠ ፡ ኀቤሃ ፡ ውስተ ፡ ደብተራ ፡ ወከደነቶ ፡ ሠቀ ።

4:19  ወይቤላ ፡ ሲሳራ ፡ አስትይኒ ፡ ንስቲተ ፡ ማየ ፡ እስመ ፡ ጸማእኩ ፡ ወፈትሐት ፡ ስእረ ፡ ሐሊብ ፡ ወአስተየቶ ፡ ወከደነቶ ፡ ገጾ ።

4:20  ወይቤላ ፡ ቁሚ ፡ ኀበ ፡ ኆኅተ ፡ ደብተራ ፡ ወእመቦ ፡ ዘመጽአ ፡ ኀቤኪ ፡ ወይቤለኪ ፡ ቦ ፡ ዘሀለወ ፡ ዝየ ፡ ብእሲ ፡ በሊ ፡ አልቦ ፡ ወከደነቶ ፡ ሠቀ ።

4:21  ወነሥአት ፡ ኢያኤል ፡ ብእሲተ ፡ ካቤር ፡ መትከለ ፡ ደብተራ ፡ ወእብነ ፡ በካልእት ፡ እዴሃ ፡ ወቦአት ፡ ኀቤሁ ፡ ወጸቀወቶ ፡ ወተከለት ፡ ውእተ ፡ መትከለ ፡ ውስተ ፡ መልታሕቱ ፡ ወጐድአቶ ፡ እስከ ፡ ፀመረቶ ፡ ምስለ ፡ ምድር ፡ ወተራገፀ ፡ ውእቱ ፡ ማእከለ ፡ እገሪሃ ፡ ወተሰጥሐ ፡ ወሞተ ።

4:22  ወበጽሐ ፡ ባረቅ ፡ እንዘ ፡ ይዴግኖ ፡ ለሲሳራ ፡ ወወፅአት ፡ ኢያኤል ፡ ወተቀበለቶ ፡ ለባረቅ ፡ ወትቤሎ ፡ ነዐ ፡ ወኣርእየከ ፡ ብእሴ ፡ ዘተኀሥሥ ፡ ወቦአ ፡ ኀቤሃ ፡ ወረከቦ ፡ ለሲሳራ ፡ ውዱቀ ፡ በድኖ ፡ ወመትከል ፡ ውስተ ፡ መልታሕቱ ።

4:23  ወአኅሰሮ ፡ እግዚአብሔር ፡ ለኢያቢን ፡ ንጉሠ ፡ ከናአን ፡ በይእቲ ፡ ዕለት ፡ በቅድሜሆሙ ፡ ለደቂቀ ፡ እስራኤል ።

4:24  ወሖረት ፡ እዴሁ ፡ ለእግዚአብሔር ፡ ምስለ ፡ ደቂቀ ፡ እስራኤል ፡ ወሖረት ፡ ወጸንዐት ፡ ላዕለ ፡ ኢያቢን ፡ ንጉሠ ፡ ከናአን ፡ እስከ ፡ አጥፍኦ ።