TpiKJPB - Leviticus - 20

20:1  ¶ Na BIKPELA i toktok long Moses na tok,

20:2  Gen, yu mas toktok long ol pikinini bilong Isrel olsem, Wanem man bilong ol pikinini bilong Isrel o bilong ol man bilong narapela kantri i stap waira long Isrel i givim wanpela pikinini bilong em i go long Molek, yupela mas strong long kilim em i dai pinis. Ol manmeri bilong dispela hap graun mas paitim em long ol ston.

20:3  Na bai Mi strongim pes bilong Mi i birua long dispela man na Mi bai bagarapim bilong rausim em long namel long ol manmeri bilong em, long wanem em i bin givim wanpela bilong ol pikinini bilong em i go long Molek long mekim ples holi bilong Mi i kamap doti na long mekim nem holi bilong Mi i kamap doti.

20:4  Na sapos ol manmeri bilong dispela hap graun i mekim pasin bilong haitim ol ai bilong ol long dispela man taim em i givim wanpela bilong ol pikinini bilong em i go long Molek na ol i no kilim em i dai,

20:5  Long dispela taim bai Mi strongim pes bilong Mi i birua long dispela man na birua long famili bilong em na bai Mi bagarapim em bilong rausim em namel long ol manmeri bilong em na olgeta manmeri i go long mekim pasin pamuk long bihainim em long mekim pasin pamuk wantaim Molek.

20:6  Na tewel i tanim em yet long bihainim man i glasman na long bihainim ol man i wokim poisin, long go long mekim pasin pamuk long bihainim ol, bai Mi strongim pes bilong Mi i birua long dispela tewel na bai Mi bagarapim em bilong rausim em long namel long ol manmeri bilong em.

20:7  Olsem na yupela mas mekim yupela yet i kamap klin na yupela mas i stap holi, long wanem Mi stap BIKPELA na God bilong yupela.

20:8  Na yupela mas holimpas long ol lo bilong Mi i stap long buk na bihainim ol. Mi stap BIKPELA husat i mekim yupela i stap klin.

20:9  Long wanem olgeta wan wan i mekim tok long daunim papa bilong em o mama bilong em, tru tumas ol i mas kilim em i dai pinis. Em i bin tok long daunim papa bilong em o mama bilong em. Blut bilong em mas i stap long em.

20:10  ¶ Na man i mekim pasin pamuk wantaim meri bilong narapela man, em man i mekim pasin pamuk wantaim meri bilong man i stap klostu long em, dispela man i mekim pasin pamuk na dispela meri i mekim pasin pamuk, tru tumas ol i mas kilim tupela i dai pinis.

20:11  Na man i slip wantaim meri bilong papa bilong em, em i bin lukim skin nating i bilong papa bilong em. Tru tumas ol i mas kilim tupela i dai pinis. Blut bilong tupela mas i stap long tupela.

20:12  Na sapos wanpela man i slip wantaim meri bilong pikinini man bilong em, tru tumas ol i mas kilim tupela i dai pinis. Tupela i bin mekim pasin i gat sem, na blut bilong tupela bai stap long tupela.

20:13  Na tu sapos wanpela man i slip wantaim narapela man olsem em i slip wantaim wanpela meri, tupela i bin mekim pasin i sting tru long tingting bilong God. Tru tumas ol i mas kilim tupela i dai pinis, na blut bilong tupela mas i stap long tupela.

20:14  Na sapos wanpela man i kisim meri bilong em na mama bilong dispela meri long i stap ol meri bilong em, dispela em i pasin nogut. Yupela mas kukim tripela long paia, em dispela man na tupela meri wantaim, bai dispela pasin nogut i no ken stap namel long yupela.

20:15  Na sapos wanpela man i slip wantaim wanpela animal, tru tumas yupela mas kilim em i dai pinis na yupela mas kilim i dai dispela animal.

20:16  Na sapos wanpela meri i kam klostu long wanpela animal, long slipim em yet bilong slip wantaim em, yu mas kilim i dai dispela meri, na dispela animal. Tru tumas yu mas kilim i dai tupela, na blut bilong tupela mas i stap long tupela.

20:17  Na sapos wanpela man bai kisim susa bilong em i pikinini meri bilong papa bilong em o pikinini meri bilong mama bilong em na lukim skin nating bilong dispela meri na meri i lukim skin nating bilong em, dispela em i samting i nogut tru, na yu mas bagarapim long rausim tupela long ai bilong ol manmeri bilong tupela. Em i bin lukim skin nating bilong susa bilong em, na em i mas karim sin nogut bilong em.

20:18  Na sapos wanpela man i pilai wantaim wanpela meri i gat sik mun na em bai lukim skin nating bilong dispela meri, em i bin lukim ples i olsem hul wara bilong blut bilong em na meri i bin mekim ples i olsem hul wara bilong blut bilong em i kamap ples klia. Na yu mas bagarapim bilong rausim tupela long namel long ol manmeri bilong ol.

20:19  Na yu no ken lukim skin nating bilong susa bilong mama bilong yu o bilong susa bilong papa bilong yu. Long wanem em i lukluk long wanpela i lain bilong em na tupela bai karim sin nogut bilong tupela.

20:20  Na sapos wanpela man bai pilai wantaim meri bilong smolpapa bilong em, em i bin lukim skin nating i bilong smolpapa bilong em. Tupela i mas karim sin bilong tupela. Tupela bai i no karim pikinini inap long ol i dai pinis.

20:21  Na sapos wanpela man bai kisim meri bilong brata bilong em, dispela samting em i no klin. Em i bin lukim skin nating i bilong brata bilong em, na bai tupela i no gat pikinini.

20:22  ¶ Olsem na yupela mas holimpas long olgeta lo bilong Mi i stap long buk na olgeta tok bilong Mi long pe bilong kot na bihainim ol, bai dispela hap graun Mi bringim yupela long em long i stap long dispela hap i no ken traut yupela.

20:23  Na yupela i no ken wokabaut long pasin bilong dispela kantri Mi rausim ol long pes bilong yupela. Long wanem ol i bin mekim olgeta bilong ol dispela samting, olsem na Mi tingim ol i nogut tru.

20:24  Tasol Mi bin tokim yupela olsem, Yupela bai kisim graun bilong ol olsem samting papa i laik givim pikinini na bai Mi givim dispela long yupela long sindaun long em, em graun i pulap long susu na hani. Mi stap BIKPELA na God bilong yupela, na Mi bin mekim yupela i no stap wantaim ol arapela manmeri.

20:25  Olsem na yupela mas makim i narakain namel long klinpela animal na animal i no klin na namel long pisin i no klin na pisin i klinpela na yupela i no ken mekim ol tewel bilong yupela i sting tru long animal o long pisin o long wanpela kain samting i stap laip na i wokabaut long bel long graun na Mi bin makim ol long stap longwe long yupela long ol i no klin.

20:26  Na yupela mas i stap holi long Mi. Long wanem Mi BIKPELA na Mi stap holi na Mi bin makim yupela i narakain long ol arapela manmeri, bai yupela i ken stap lain bilong Mi.

20:27  Na tu wanpela man o meri i stap glasman o i stap wanpela i wokim poisin, tru tumas yupela mas kilim ol i dai pinis. Ol i mas paitim ol long ol ston. Blut bilong ol mas i stap long ol.