CSlElizabeth - Leviticus - 24

24:1  И рече Господь к Моисею, глаголя:

24:2  заповеждь сыном Израилевым, да возмут ти елей от масличия чист исцежен в светение, да горит светило всегда,

24:3  вне завесы в скинии свидения, и возжигати будут его Аарон и сынове его от вечера до заутра пред Господем непрестанно, законно вечно в роды вашя:

24:4  на светилнице чистем возжигати будете светила пред Господем даже до утра.

24:5  И возмете муки пшеничны, и сотворите от нея дванадесять хлебов: дву десятин да будет хлеб един:

24:6  и возложите их на два положения, по шести хлебов едино положение на трапезе чисте пред Господем:

24:7  и возложите на едино положение ливан чист и соль, и да будут хлебы в память предлежащыя пред Господем:

24:8  в день субботы да предлагаются пред Господем всегда от сынов Израилевых, завет вечный:

24:9  и да будут Аарону и сыном его, и да снедят я на месте святе, суть бо святая святых: сие им от жертв Господу в закон вечный.

24:10  И изыде сын жены Израилтяныни, и сей бе сын Египтянина в сынех Израилевых: и пряхуся в полце иже от Израилтяныни и муж Израилтянин:

24:11  и нарек сын жены Израилтяныни имя (Господне) прокля. И приведоша его к Моисею. Имя же матере его Саломииф, дщерь Давриина, от племене Данова.

24:12  И ввергоша его в темницу, разсудити о нем повелением Господним.

24:13  И рече Господь к Моисею, глаголя:

24:14  изведи клявшаго вне полка, и да возложат вси слышавшии руце свои на главу его, и да побиют его камением весь сонм:

24:15  и сыном Израилевым глаголи и речеши к ним: человек человек, иже аще прокленет Бога своего, грех приимет:

24:16  нарицаяй же имя Господне смертию да умрет: камением да побиют его весь сонм израильский: аще туземец, или пришлец, егда наречет имя Господне, да умрет:

24:17  и человек, иже аще поразит всяку душу человечу, и умрет, смертию да умрет:

24:18  и иже аще ударит скота, и умрет, да воздаст душу вместо души:

24:19  и аще кто сотворит порок ближнему, якоже сотвори ему, такожде и ему да сотворят:

24:20  изломление за изломление, око за око, зуб за зуб: якоже сотворил порок человеку, такожде да сотворят и ему:

24:21  иже аше ударит человека, и умрет смертию да умрет:

24:22  оправдание едино будет пришелцу и туземцу, яко Аз есмь Господь Бог ваш.

24:23  И глагола Моисей к сыном Израилевым, и изведоша клявшаго вне полка, и побиша его камением весь сонм: и сынове Израилевы сотвориша, якоже заповеда Господь Моисею.