CSlElizabeth - Leviticus - 6

6:1  И рече Господь к Моисею, глаголя:

6:2  душа яже аще согрешит, и презрев презрит заповеди Господня, и солжет к другу о вдании, или о общине, или о хищении, или преобиде чим ближняго,

6:3  или обрете погубленое, и солжет о нем, и кленется в неправду о единем от всех, яже аще сотворит человек яко согрешити в них:

6:4  и будет егда согрешит и преступит, и отдаст похищеное, еже похити, или обиду, еюже преобиде, или вдание, еже вдано бысть ему, или погибшее, еже обрете:

6:5  от всякия вещи, еяже ради кляся в неправду, и да отдаст самое то истое, и пятую часть свою приложит ктому: егоже есть, тому да отдаст, в оньже день обличится:

6:6  и о преступлении своем да принесет Господу овна от овец непорочна, ценою в немже прегреши:

6:7  и да помолится жрец о нем пред Господем, и оставится ему за едино от всех, яже сотвори и преступи в нем.

6:8  И рече Господь к Моисею, глаголя:

6:9  заповеждь Аарону и сыном его, глаголя: сей закон всесожжения: сие всесожжение на горении его на олтари всю нощь до заутра, и огнь олтаря да горит на нем, и не угасает:

6:10  и да облечется жрец в срачицу льняну, и надраги льняны да возвлечет на тело свое, и да изнесет принос, егоже аще изжжет огнь всесожжения от олтаря, и да поставит близ олтаря:

6:11  и да совлечет ризы своя, и да облечется в ризы ины, и да изнесет принос вне полка на место чисто:

6:12  и огнь на олтари да горит на нем и не угасает: и да возжжет на нем жрец дрова по вся утра, и да возкладет нань всесожжение, и да возложит нань тук спасения:

6:13  и огнь всегда да горит на олтари, не угасает:

6:14  сей закон жертвы, юже принесут сынове Аарони жерцы пред Господем, прямо олтаря:

6:15  и да возмет от него (жрец) горсть муки пшеничны жертвенныя с елеем ея и со всем ливаном ея, сущими на жертве: и да вознесет на олтарь принос в воню благовония, в память ея Господу:

6:16  оставшееся же от нея снест Аарон и сынове его: пресна да снедятся в месте святе, в притворе скинии свидения да снедят я:

6:17  да не испечется квасна: часть сию дах им от приносов Господних: святая святых суть, якоже еже о гресе, и якоже еже о преступлении:

6:18  всяк мужеск пол жреческ да снедят ю: законно вечно в роды вашя от принос Господних: всяк, иже аще прикоснется им, освятится.

6:19  И рече Господь к Моисею, глаголя:

6:20  сей дар Аарону и сыном его, егоже принесут Господу в день, в оньже аще помажеши его: десятую часть меры ефи муки пшеничны в жертву всегда, пол ея заутра и пол ея в вечер:

6:21  на сковраде в елеи да сотворится, спряжену да принесет ю витую жертву от укрухов, жертву в воню благовония Господу:

6:22  жрец помазанный, иже вместо его от сынов его, да сотворит ю: законно вечно, все да совершится:

6:23  и всяка жертва жреческа всесожженна да будет и да не снестся.

6:24  И рече Господь Бог Моисею, глаголя:

6:25  рцы Аарону и сыном его, глаголя: сей закон согрешения: на месте, на немже закалают всесожжения, да закалают яже греха ради пред Господем: святая (бо) святых суть:

6:26  жрец приносяй ю да снест ю: в месте святе да снестся, в притворе скинии свидения:

6:27  всяк прикасайся мяс ея освятится: и емуже аще воскропится от крове ея на ризу, яже аще воскропится на ню, да исперется на месте святе:

6:28  и сосуд глинян, в немже варится, да разбиется: аще же в медян сосуде сварится, да изтрет его, и измыет водою:

6:29  всяк мужеск пол в жерцех да снест ю: святая (бо) святых суть Господу:

6:30  и вся, яже от гресе аще принесутся от крове их в скинию свидения, ко очищению во святыни, да не снедятся, огнем да сожгутся.