SP - Leviticus - 24

24:1  וידבר יהוה אל משה לאמר

24:2  צוי את בני ישראל ויקחו אליך שמן זית זך כתית למאור להעלות נר תמיד

24:3  מחוץ לפרכת העדות באהל מועד יערך אתו אהרן ובניו מערב עד בקר לפני יהוה תמיד חקת עולם לדרתיכם

24:4  על המנורה הטהרה יערך את הנרות לפני יהוה עד בקר

24:5  ולקחת סלת ואפית אתה שתים עשרה חלות שני עשרנים יהיה החלה האחת

24:6  ושמת אתם שתי מערכות שש המערכת על השלחן הטהור לפני יהוה

24:7  ונתתה על המערכת לבונה זכה והיתה ללחם לאזכרה אשה ליהוה

24:8  ביום השבת ביום השבת יערכנו לפני יהוה תמיד מאת בני ישראל ברית עולם

24:9  והיתה לאהרן ולבניו ואכלוה במקום קדוש כי קדש קדשים היא לו מאשי יהוה חק עולם

24:10  ויצא בן אשה ישראלית והוא בן איש מצרי בתוך בני ישראל וינצו במחנה בן הישראלית ואיש ישראלי

24:11  ויקב בן האשה הישראלית את . השם ויקלל ויביאו אתו אל משה ושם אמו שלומית בת דברי למטה דן

24:12  וינחהו . במשמר לפרש להם על פי יהוה

24:13  וידבר יהוה אל משה לאמר

24:14  הוציא את המקלל אל מחוץ למחנה וסמכו כל השמעים את ידיהם על ראשו ורגמו אתו כל העדה

24:15  ואל בני ישראל תדבר לאמר איש איש כי יקלל אלהיו ונשא חטאו

24:16  ונקב שם יהוה מות יומת רגם ירגמו בו כל העדה כגר כאזרח בנקבו השם יומת

24:17  ואיש כי יכה כל נפש אדם מות יומת

24:18  ומכה נפש בהמה ישלמנה נפש תחת נפש

24:19  ואיש כי יתן מום בעמיתו כאשר עשה כן יעשה לו

24:20  שבר תחת שבר עין תחת עין שן תחת שן כאשר יתן מום באדם כן ינתן בו

24:21  ומכה בהמה ישלמנה ומכה אדם יומת

24:22  משפט אחד יהיה לכם כגר כאזרח יהיה כי אני יהוה אלהיכם

24:23  וידבר משה אל בני ישראל ויוציאו את המקלל אל מחוץ למחנה וירגמו אתו אבן ובני ישראל עשו כאשר צוה יהוה את משה