SP - Leviticus - 19

19:1  וידבר יהוה אל משה לאמר

19:2  דבר אל כל עדת בני ישראל ואמרת אליהם קדשים תהיו כי קדוש אני יהוה אלהיכם

19:3  איש אמו ואביו תיראו ואת שבתתי תשמרו אני יהוה אלהיכם

19:4  אל תפנו אל האלילים ואלהי מסכה לא תעשו לכם אני יהוה אלהיכם

19:5  וכי תזבחו זבח שלמים ליהוה לרצונכם תזבחהו

19:6  ביום זבחכם יאכל וממחרת והנותר עד יום השלישי באש ישרף

19:7  ואם אכל יאכל ביום השלישי פגול הוא לא ירצה

19:8  ואכלו עונו ישא כי את קדש יהוה חלל ונכרתה הנפש ההיא מעמיה

19:9  ובקצרכם את קציר ארצכם לא תכלה פאת שדך לקצר ולקט קצירך לא תלקט

19:10  וכרמך לא תעלל ופרט כרמך לא תלקט לעני ולגר תעזב אתם אני יהוה אלהיכם

19:11  לא תגנבו ולא תכחשו ולא תשקרו איש בעמיתו

19:12  ולא תשבעו בשמי לשקר וחללת את שם אלהיך אני יהוה

19:13  לא תעשק את רעך ולא תגזל ולא תלין פעלת שכיר אתך עד בקר

19:14  לא תקלל חרש ולפני עור לא תתן מכשול ויראת מאלהיך אני יהוה

19:15  לא תעשה עול במשפט לא תשא פני דל ולא תהדר פני גדול בצדק תשפט את עמיתך

19:16  לא תלך רכיל בעמך לא תעמד על דם רעך אני יהוה

19:17  לא תשנא את אחיך בלבבך הוכח תוכיח את עמיתך ולא תשא עליו חטא

19:18  לא תקום ולא תטר את בני עמך ואהבת לרעך כמוך אני יהוה

19:19  את חקתי תשמרו בהמתך לא תרביע כלאים ושדך לא תזרע כלאים ובגד כלאים שעטניז לא יעלה עליך

19:20  ואיש כי ישכב את אשה שכבת זרע והיא שפחה נחרפת לאיש והפדה לא נפדתה או חפשה לא נתן לה בקרת תהיה לו לא יומת כי לא חפשה

19:21  והביא את אשמו ליהוה אל פתח אהל מועד איל אשם

19:22  וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא

19:23  וכי תבאו אל הארץ ונטעתם כל עץ מאכל וערלתם את ערלתו את פריו שלש שנים יהיה לכם ערלים לא יאכל

19:24  ובשנה הרביעית יהיו כל פריו קדש חללים ליהוה

19:25  ובשנה החמשית תאכלו את פריו להסיף לכם תבואתו אני יהוה אלהיכם

19:26  לא תאכלו על הדם ולא תנחשו ולא תעננו

19:27  ולא תקיפו את פאת ראשכם ולא תשחיתו את פאת זקנכם

19:28  ושרטה לנפש לא תתנו בבשרכם וכתבת קעקע לא תתנו בכם אני יהוה

19:29  אל תחלל את בתך להזנותה ולא תזנה הארץ ומלאה הארץ זמה

19:30  את שבתתי תשמרו ומקדשי תיראו אני יהוה

19:31  אל תפנו אל האבות ואל הידענים אל תבקשו לטמאה בהם אני יהוה אלהיכם

19:32  מפני שיבה תקום והדרת פני זקן ויראת מאלהיך אני יהוה

19:33  וכי יגור אתכם גר בארצכם לא תונו אתו

19:34  כאזרח מכם יהיה לכם הגר הגר אתכם ואהבת לו כמוך כי גרים הייתם בארץ מצרים אני יהוה אלהיכם

19:35  לא תעשו עול במשפט במדה במשקל ובמשורה

19:36  מאזני צדק אבני צדק איפת צדק והין צדק יהיה לכם אני יהוה אלהיכם אשר הוצאתי אתכם מארץ מצרים

19:37  ושמרתם את כל חקתי ואת כל משפטי ועשיתם אתם אני יהוה