Kekchi - Mark - 16

16:1  Nak quinumeˈ li hiloba̱l cutan, lix María aj Magdala ut lix Salomé ut lix María xnaˈ laj Jacobo queˈxlokˈ li sununquil ban re teˈxic chixqˈuebal saˈ xbe̱n li camenak.

16:2  Toj ekˈela queˈco̱eb saˈ li xbe̱n li cutan re li xama̱n. Ac x-el chak li sakˈe nak yo̱queb chi xic saˈ li mukleba̱l.

16:3  Ut yo̱queb chixyebal chi ribileb rib: —¿Ani ta̱isi̱nk re li pec li cuan chire li mukleba̱l? chanqueb.

16:4  Ut nak queˈcuulac cuan cuiˈ li mukleba̱l, queˈril nak ac isinbil chic li nimla pec chire li mukleba̱l.

16:5  Ut nak queˈoc saˈ li mukleba̱l queˈril jun li sa̱j cui̱nk chunchu chak saˈ li mukleba̱l saˈ xnim ukˈeb. Li sa̱j cui̱nk aˈan tikto riqˈuin jun saki tˈicr nim xbas ut eb li ixk cˈajoˈ nak queˈxucuac chirilbal.

16:6  Ut li cui̱nk quixye reheb: —Mexxucuac. La̱in ninnau nak yo̱quex chixsicˈbal li Jesús aj Nazaret li queˈxcamsi chiru cruz. Aˈan ma̱ ani chic arin. Ac xcuacli cuiˈchic chi yoˈyo. Ilomak lix naˈaj li xcuan cuiˈ li camenak.

16:7  Ayukex, yehomak chak reheb lix tzolom, joˈ ajcuiˈ re laj Pedro, nak aˈan xbe̱n cua ta̱xic Galilea che̱ru la̱ex. Aran toxe̱ril ru joˈ quixye e̱re, chan.

16:8  Ut eb li ixk queˈel aran ut queˈco̱eb saˈ a̱nil ut nequeˈsicsot xbaneb xxiu. Ut ma̱ ani aj e queˈxye xban nak teˈxucuak.

16:9  Toj ekˈela saˈ li xbe̱n li cutan re li xama̱n quicuacli li Jesús chi yoˈyo saˈ xya̱nkeb li camenak. Li xbe̱n li quixcˈutbesi cuiˈ rib li Jesús, aˈan lix María aj Magdala. Aˈan li ixk li qui-isi̱c li cuukub chi ma̱us aj musikˈej riqˈuin xban li Jesús.

16:10  Li ixk aˈan co̱ chixyebal reheb lix tzolom li Jesús. Nak quicuulac riqˈuineb, coxtauheb chi ya̱bac xban xrahil xchˈo̱leb.

16:11  Ut lix María quixserakˈi reheb nak yoˈyo li Jesús ut nak quiril ru. Abanan eb aˈan incˈaˈ queˈxpa̱b li cˈaˈru quixye.

16:12  Ut chirix aˈan, li Jesús quixcˈutbesi cuiˈchic rib chiruheb cuib lix tzolom nak yo̱queb chi xic saˈ cˈaleba̱l. Jalan chic rilbal nak quixcˈutbesi rib chiruheb.

16:13  Eb aˈan queˈco̱eb ut coxeˈxye resil reheb li jun chˈol chic. Ut chi moco li cuib aˈan queˈxpa̱b.

16:14  Mokon chic eb li junlaju chi xtzolom cuanqueb saˈ me̱x nak quixcˈutbesi rib li Jesús chiruheb. Ut quixkˈuseb xban nak incˈaˈ queˈpa̱ban ut xban xcacuil lix chˈo̱leb. Incˈaˈ queˈxpa̱b li cˈaˈru queˈxye li queˈiloc ru li Jesús xbe̱n cua nak ac xcuacli cuiˈchic chi yoˈyo saˈ xya̱nkeb li camenak.

16:15  Ut li Jesús quixye reheb: —Texxic saˈ chixjunil li ruchichˈochˈ ut te̱chˈolob xya̱lal li colba-ib chiruheb chixjunileb li tenamit jun sut rubel choxa.

16:16  Li ani ta̱pa̱ba̱nk ut ta̱cube̱k xhaˈ, aˈan ta̱colekˈ; aˈut li ani incˈaˈ ta̱pa̱ba̱nk, aˈan ta̱xic saˈ tojba ma̱c.

16:17  Aˈan aˈin li retalil li talajeˈxba̱nu li teˈpa̱ba̱nk. Saˈ incˈabaˈ la̱in teˈisi̱nk ma̱us aj musikˈej ut teˈa̱tinak saˈ jalan a̱tinoba̱l.

16:18  Cui teˈxchap cˈantiˈ chi rukˈeb, ma̱cˈaˈ teˈxcˈul ut cui teˈrucˈ li cˈaˈak re ru nacamsin, ma̱cˈaˈ teˈxcˈul. Cui teˈxqˈue li rukˈ saˈ xbe̱neb li yaj, teˈqˈuira̱k, chan li Jesús.

16:19  Nak ac xra̱tinaheb lix tzolom li Ka̱cuaˈ Jesucristo, quicˈameˈ saˈ choxa xban li Dios, ut quicˈojla saˈ xnim ukˈ li Acuabej Dios.

16:20  Ut eb lix tzolom queˈco̱eb saˈ chixjunil li naˈajej chixchˈolobanquil xya̱lal li colba-ib. Ut li Ka̱cuaˈ yo̱ chi tenkˈa̱nc reheb. Ut qˈuebil xcuanquil li ra̱tineb xban li Dios riqˈuin li milagro quilajeˈxba̱nu chiruheb li tenamit. Joˈcan taxak.