Geez - Numbers - 12

12:1  ወሐመይዎ ፡ ለሙሴ ፡ ማርያም ፡ ወአሮን ፡ በበይነ ፡ ብእሲት ፡ ኢትዮጵያዊት ፡ እንተ ፡ ነሥአ ፡ ሙሴ ፡ እስመ ፡ ብእሲተ ፡ ኢትዮጵያዊተ ፡ ነሥአ ።

12:2  ወይቤሉ ፡ ቦኑ ፡ ለሙሴ ፡ ለባሕቲቱ ፡ ተናገሮ ፡ እግዚአብሔር ፡ አኮኑ ፡ ለነሂ ፡ ተናገረኑ ፡ ወሰምዐ ፡ እግዚአብሔር ።

12:3  ወሙሴሰ ፡ ብእሲ ፡ የዋህ ፡ ውእቱ ፡ ጥቀ ፡ እምነ ፡ ኵሉ ፡ እጓለ ፡ እመሕያው ፡ ዘሀለወ ፡ ውስተ ፡ ምድር ።

12:4  ወይቤሎሙ ፡ እግዚአብሔር ፡ ለሙሴ ፡ ወለአሮን ፡ ወለማርያም ፡ በጊዜሃ ፡ ንዑ ፡ አንትሙ ፡ ሠለስቲክሙ ፡ ውስተ ፡ ደብተራ ፡ ዘመርጡል ።

12:5  ወወረደ ፡ እግዚአብሔር ፡ በዐምደ ፡ ደመና ፡ ኀበ ፡ ኆኅተ ፡ ደብተራ ፡ ዘመርጡል ፡ ወጸውዖሙ ፡ ለአሮን ፡ ወለማርያም ፡ ወሖሩ ፡ ክልኤሆሙ ።

12:6  ወይቤሎሙ ፡ ስምዑ ፡ ቃልየ ፡ ለእመቦ ፡ ዘኮነ ፡ ነቢየ ፡ እምውስቴትክሙ ፡ ለእግዚአብሔር ፡ በራእይ ፡ ኣስተርኢ ፡ ሎቱ ፡ ወበሕልም ፡ እትናገሮ ።

12:7  ወአኮ ፡ ከመ ፡ ቍልዔየ ፡ ሙሴ ፡ ምእመን ፡ ውእቱ ፡ ውስተ ፡ ኵሉ ፡ ቤትየ ።

12:8  አፈ ፡ በአፍ ፡ እትናገሮ ፡ ገሃደ ፡ ወአኮ ፡ በስውር ፡ ወርእየ ፡ ስብሐቲሁ ፡ ለእግዚአብሔር ፡ ወለምንት ፡ ኢፈራህክሙ ፡ ሐምዮቶ ፡ ለቍልዔየ ፡ ሙሴ ።

12:9  ወኮነ ፡ ላዕሌሆሙ ፡ መንሱተ ፡ መዐቱ ፡ ለእግዚአብሔር ፡ ወሖሩ ።

12:10  ወሰሰለ ፡ ደመና ፡ እምውስተ ፡ ደብተራ ፡ ወአኀዛ ፡ ለምጽ ፡ ለማርያም ፡ ወጻዕደወት ፡ ከመ ፡ በረድ ፡ ወተመይጠ ፡ አሮን ፡ ኀበ ፡ ማርያም ፡ ወናሁ ፡ አኀዛ ፡ ለምጽ ።

12:11  ወይቤሎ ፡ አሮን ፡ ለሙሴ ፡ ብቍዐኒ ፡ እግዚእየ ፡ ኢትረሲያ ፡ ለነ ፡ ኀጢአተ ፡ እስመ ፡ ኢያእመርነ ፡ ከመ ፡ አበስነ ።

12:12  ወኢንኩን ፡ ትዕሪነ ፡ ለሞት ፡ ከመ ፡ ፃእፃእ ፡ ዘይወፅእ ፡ እምነ ፡ ማኅፀነ ፡ እሙ ፡ ወተበልዐ ፡ መንፈቀ ፡ ሥጋሃ ።

12:13  ወጸርኀ ፡ ሙሴ ፡ ኀበ ፡ እግዚአብሔር ፡ ወይቤ ፡ እግዚኦ ፡ ብቍዐኒ ፡ አሕይዋ ።

12:14  ወይቤሎ ፡ እግዚአብሔር ፡ ለሙሴ ፡ ሶበ ፡ አቡሃ ፡ ተፍአ ፡ ትፍአቶ ፡ ውስተ ፡ ገጻ ፡ እምኢኀፍረትኑ ፡ ሰቡዐ ፡ መዋዕለ ፡ ለትትገሐስ ፡ አፍኣ ፡ እምትዕይንት ፡ ሰቡዐ ፡ መዋዕለ ፡ ወእምዝ ፡ ትበውእ ።

12:15  ወተግሕሠት ፡ ማርያም ፡ አፍኣ ፡ እምትዕይንት ፡ ሰቡዐ ፡ መዋዕለ ፡ ወኢግዕዘ ፡ ሕዝብ ፡ እስከ ፡ ነጽሐት ፡ ማርያም ።

12:16  ወእምድኅረ ፡ ዝንቱ ፡ ግዕዙ ፡ ሕዝብ ፡ እምነ ፡ አሴሮት ፡ [*ወኀደሩ ፡*] ውስተ ፡ ገዳም ፡ [ዘፋራን] ።