Geez - Numbers - 27

27:1  ወመጽኣ ፡ አዋልደ ፡ ሰልጰአድ ፡ ወልደ ፡ ዖፌር ፡ ወልደ ፡ ገላአድ ፡ ወልደ ፡ ማኪር ፡ ዘእምነገደ ፡ ማናሴ ፡ ዘእምደቂቀ ፡ ዮሴፍ ፡ ወዝንቱ ፡ ውእቱ ፡ አስማቲሆን ፡ መሐላ ፡ ወኑሐ ፡ ወሔግላ ፡ ወሜልካ ፡ ወቴርሳ ።

27:2  ወቆማ ፡ ቅድመ ፡ ሙሴ ፡ ወቅድመ ፡ እልዓዛር ፡ ካህን ፡ ወቅድመ ፡ መላእክት ፡ ወቅድመ ፡ ኵሉ ፡ ተዓይን ፡ ኀበ ፡ ኆኅተ ፡ ደብተራ ፡ ዘመርጡል ፡ ወይቤላ ፤

27:3  አቡነ ፡ ሞተ ፡ በገዳም ፡ ወኢሀለወ ፡ ማእከሎሙ ፡ ለትዕይንት ፡ እንተ ፡ ተቃወመት ፡ ቅድመ ፡ እግዚአብሔር ፡ ውስተ ፡ ትዕይንተ ፡ ቆሬ ፡ እስመ ፡ በኀጢአተ ፡ ዚአሁ ፡ ሞተ ፡ ወአልቦቱ ፡ ደቂቀ ።

27:4  ኢይደምሰስ ፡ ስሙ ፡ ለአቡነ ፡ እምነ ፡ ማእከለ ፡ ነገዱ ፡ እስመ ፡ አልቦቱ ፡ ውሉደ ፡ ሀቡነ ፡ መክፈልተነ ፡ በማእከለ ፡ አኀዊሁ ፡ ለአቡነ ።

27:5  ወአብአ ፡ ሙሴ ፡ ቃሎን ፡ ቅድመ ፡ እግዚአብሔር ።

27:6  ወነበቦ ፡ እግዚአብሔር ፡ ለሙሴ ፡ ወይቤሎ ፤

27:7  ርቱዐ ፡ ይቤላ ፡ አዋልደ ፡ ሰልጰኣድ ፡ ሀቦን ፡ ሀብቶን ፡ መክፈልተ ፡ ርስቶን ፡ በማእከለ ፡ አኀዊሁ ፡ ለአቡሆን ፡ ወታገብእ ፡ ሎንቱ ፡ መክፈልተ ፡ አቡሆን ።

27:8  ወንግሮሙ ፡ ለደቂቀ ፡ እስራኤል ፡ ወበሎሙ ፡ ለእመ ፡ ቦቱ ፡ ዘሞተ ፡ ብእሲ ፡ ወአልቦ ፡ ደቂቀ ፡ ትሁቡ ፡ ርስቶ ፡ ለአዋልዲሁ ።

27:9  ወለእመ ፡ አልቦ ፡ ወለተ ፡ ሀቡ ፡ ርስቶ ፡ ለአኀዊሁ ።

27:10  ወለእመ ፡ አልቦ ፡ አኀወ ፡ ሀቡ ፡ ርስቶ ፡ ለእኅወ ፡ አቡሁ ።

27:11  ወለእመ ፡ አልቦ ፡ አኀወ ፡ አቡሁ ፡ ሀቡ ፡ ርስቶ ፡ ለቤት ፡ ዘቅሩቡ ፡ ዘእምነገዱ ፡ ይወርስ ፡ ወይኩን ፡ ዝንቱ ፡ ፍትሐ ፡ ኵነኔየ ፡ ለደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለሙሴ ።

27:12  ወይቤሎ ፡ እግዚአብሔር ፡ ለሙሴ ፡ ዕረግ ፡ ውስተ ፡ ደብር ፡ ዘውስተ ፡ ማዕዶ[ት] ፡ ደብረ ፡ ናበው ፡ ውእቱ ፡ ወርእያ ፡ ለምድረ ፡ ከናአን ፡ እንተ ፡ አነ ፡ እሁቦሙ ፡ ለደቂቀ ፡ እስራኤል ፡ ይኰነንዋ ።

27:13  ወርእያ ፡ ወትትዌሰክ ፡ ኀበ ፡ ሕዝብከ ፡ አንተሂ ፡ በከመ ፡ ተወሰከ ፡ አሮን ፡ እኁከ ፡ በደብረ ፡ ሆር ።

27:14  እስመ ፡ ተዐወርክሙ ፡ ቃልየ ፡ በገዳም ፡ ዘ[ፂን] ፡ አመ ፡ ተዋሳእክምዎሙ ፡ ለትዕይንት ፡ ወቀድሶሂ ፡ ኢቀደስክሙኒ ፡ በበይነ ፡ ማይ ፡ በቅድሜሆሙ ፡ ዘውእቱ ፡ ማየ ፡ ቅስት ፡ ዘበ ፡ ቃዴስ ፡ በገዳም ፡ ዘ[ፂን] ።

27:15  ወይቤሎ ፡ ሙሴ ፡ ለእግዚአብሔር ፤

27:16  ለይርአይ ፡ እግዚአብሔር ፡ አምላኮ ፡ ለኵሉ ፡ ነፍስ ፡ ወለኵሉ ፡ ሥጋ ፡ ብእሴ ፡ ለዛቲ ፡ ትዕይንት ፤

27:17  ዘይወፅእ ፡ ወይበውእ ፡ ወዘያወፅኦሙ ፡ ወዘያበውኦሙ ፡ በቅድመ ፡ ገጾሙ ፡ ወኢትኩን ፡ ትዕይንቱ ፡ ለእግዚአብሔር ፡ ከመ ፡ አባግዕ ፡ ዘአልቦ ፡ ኖላዌ ።

27:18  ወነበቦ ፡ እግዚአብሔር ፡ ለሙሴ ፡ ወይቤሎ ፡ ንሥኦ ፡ ኀቤከ ፡ ለዮሴዕ ፡ ወልደ ፡ ነዌ ፡ ብእሲ ፡ ዘሀለወ ፡ ላዕሌሁ ፡ መንፈስ ፡ ቅዱስ ፡ ወደይ ፡ እዴከ ፡ ላዕሌሁ ።

27:19  ወአቅሞ ፡ [ቅድመ ፡] እልዓዛር ፡ ካህን ፡ ወአዝዞ ፡ ቅድመ ፡ ኵሉ ፡ ተዓይን ፡ ወአ[ዝዝ] ፡ በእንቲአሁ ፡ ቅድሜሆሙ ።

27:20  ወታገብእ ፡ ክብረከ ፡ ላዕሌሁ ፡ ከመ ፡ ይትአዘዙ ፡ ሎቱ ፡ ደቂቀ ፡ እስራኤል ።

27:21  ወይቁም ፡ ቅድመ ፡ እልዓዛር ፡ ካህን ፡ ወይስአልዎ ፡ ፍትሐ ፡ ዘይትናገር ፡ ቅድመ ፡ እግዚአብሔር ፡ ወበቃለ ፡ ዚአሁ ፡ ይፃኡ ፡ ወበቃለ ፡ ዚአሁ ፡ ይባኡ ፡ ውእቱ ፡ ወደቂቀ ፡ እስራኤል ፡ ኅቡረ ፡ ወኵሉ ፡ ተዓይን ።

27:22  ወገብረ ፡ ሙሴ ፡ በከመ ፡ አዘዞ ፡ እግዚአብሔር ፡ ወነሥኦ ፡ ለዮሴዕ ፡ ወአቀሞ ፡ ቅድመ ፡ እልዓዛር ፡ ካህን ፡ ወቅድመ ፡ ኵሉ ፡ ተዓይን ፡ ወወደየ ፡ እዴሁ ፡ ላዕሌሁ ፡ ወሤሞ ፡ በከመ ፡ አዘዞ ፡ እግዚአብሔር ።