Geez - Numbers - 9

9:1  ወነበቦ ፡ እግዚአብሔር ፡ ለሙሴ ፡ በገዳም ፡ ዘሲና ፡ በካልእት ፡ ዓመት ፡ እምዘ ፡ ወጽኡ ፡ እምነ ፡ ምድረ ፡ ግብጽ ፡ በቀዳሚ ፡ ወርኅ ፡ ወይቤሎ ፤

9:2  ንግሮሙ ፡ ለደቂቀ ፡ እስራኤል ፡ ከመ ፡ ይግበሩ ፡ ፋሲካ ፡ አመ ፡ ጊዜሁ ።

9:3  አመ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ ቀዳሚ ፡ ወፍና ፡ ሰርክ ፡ ትገብርዎ ፡ አመ ፡ ጊዜሁ ፡ ወበከመ ፡ ሕጉ ፡ ወበከመ ፡ ትእዛዙ ፡ ትገብሮ ።

9:4  ወነገሮሙ ፡ ሙሴ ፡ ለደቂቀ ፡ እስራኤል ፡ ከመ ፡ ይግበሩ ፡ ፋሲካ ።

9:5  ወይእኅዙ ፡ እምዕለተ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ በገዳም ፡ ዘሲና ፡ በከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ፡ ደቂቀ ፡ እስራኤል ።

9:6  ወመጽኡ ፡ ሰብእ ፡ እለ ፡ ቦሙ ፡ ርኵስ ፡ ውስተ ፡ ነፍሶሙ ፡ ወስእኑ ፡ ገቢረ ፡ ፋሲካ ፡ በይእቲ ፡ ዕለት ፡ ወመጽኡ ፡ ቅድሜሆሙ ፡ ለሙሴ ፡ ወአሮን ፡ በይእቲ ፡ ዕለት ።

9:7  ወይቤልዎሙ ፡ ውእቶሙ ፡ ዕደው ፡ ንሕነሰ ፡ ሰብእ ፡ ንሕነ ፡ እለ ፡ ብነ ፡ ርኵስ ፡ ውስተ ፡ ነፍስነ ፡ ወኢንትኀደግ ፡ እምአብኦ ፡ ቍርባኑ ፡ ለእግዚአብሔር ፡ እምነ ፡ ማእከሎሙ ፡ ለደቂቀ ፡ እስራኤል ፡ በበዘመኑ ።

9:8  ወይቤሎሙ ፡ ሙሴ ፡ ቁሙኒ ፡ ወእስማዕ ፡ ምንተ ፡ ይኤዝዝ ፡ እግዚአብሔር ፡ በእንቲአክሙ ።

9:9  ወነበቦ ፡ እግዚአብሔር ፡ ለሙሴ ፡ ወይቤሎ ፤

9:10  ንግሮሙ ፡ ለደቂቀ ፡ እስራኤል ፡ ወበሎሙ ፡ ብእሲ ፡ ብእሲ ፡ ለእመቦ ፡ ዘወፅአ ፡ ርኵስ ፡ ውስተ ፡ ነፍሱ ፡ ለሰብእ ፡ ወለእመኒ ፡ ርሑቀ ፡ ብሔር ፡ ሀለወ ፡ ወለእመኒ ፡ ውስተ ፡ ሙላዲክሙ ፡ ይግበሩ ፡ ፋሲካሁ ፡ ለእግዚአብሔር ፤

9:11  በካልእ ፡ ወርኅ ፡ አመ ፡ ዐሡሩ ፡ ወረቡዑ ፡ ለሠርቅ ፡ ፍና ፡ ሰርክ ፡ ይግበርዎ ፡ በናእት ፡ ወኀምለ ፡ ብሒእ ፡ ይብልዕዎ ።

9:12  ወኢያትርፉ ፡ እምኔሁ ፡ ለነግህ ፡ ወዐጽመ ፡ ኢይስብሩ ፡ እምኔሁ ፡ በሕጉ ፡ ለፋሲካ ፡ ይግበርዎ ።

9:13  ወሰብእሰ ፡ ዘንጹሕ ፡ ውእቱ ፡ ወኢኮነ ፡ ርሑቀ ፡ ብሔር ፡ ኀበ ፡ ሀለወ ፡ ለእመ ፡ ኀደገ ፡ ገቢረ ፡ ፋሲካ ፡ ለትሠሮ ፡ ይእቲ ፡ ነፍስ ፡ እምነ ፡ ሕዝባ ፡ እስመ ፡ ቍርባኖ ፡ ለእግዚአብሔር ፡ ኢያብአ ፡ በዘመኑ ፡ ኀጢአተ ፡ ይከውኖ ፡ ለውእቱ ፡ ብእሲ ።

9:14  ወለእመኒ ፡ መጽአ ፡ ኀቤክሙ ፡ ግዩር ፡ ውስተ ፡ ምድርክሙ ፡ ይግበር ፡ ፋሲካሁ ፡ ለእግዚአብሔር ፡ በሕጉ ፡ ለፋሱካ ፡ ወ በከመ ፡ ትእዛዙ ፡ ይግበርዎ ፡ አሐዱ ፡ ሕጉ ፡ ለክሙ ፡ ለግዩርኒ ፡ ወለዘ ፡ እምፍጥረቱኒ ።

9:15  ወበዕለት ፡ እንተ ፡ ባቲ ፡ ተከልዋ ፡ ለደብተራ ፡ ከደና ፡ ደመና ፡ ለደብተራ ፡ ለቤተ ፡ መርጡል ፡ ወሌሊተሰ ፡ ይመጽእ ፡ ዲበ ፡ ደብተራ ፡ ከመ ፡ ራእየ ፡ እሳት ፡ እስከ ፡ ይጸብሕ ።

9:16  ወከመዝ ፡ ይከውን ፡ ለዘልፍ ፡ ደመና ፡ ይከድና ፡ መዓልተ ፡ ወራእየ ፡ እሳት ፡ ሌሊተ ።

9:17  ወእምከመ ፡ ሰሰለ ፡ ደመና ፡ እምነ ፡ ደብተራ ፡ እምድኅረ ፡ ዝንቱ ፡ ይግዕዙ ፡ ደቂቀ ፡ እስራኤል ፡ ወመካኖ ፡ ኀበ ፡ ቆመ ፡ ደመና ፡ ህየ ፡ ይትዐየኑ ፡ ደቂቀ ፡ እስራኤል ።

9:18  ወበትእዛዘ ፡ እግዚአብሔር ፡ ይግዕዙ ፡ በኵሉ ፡ መዋዕል ፡ ዘቦቱ ፡ ይጼልላ ፡ ደመና ፡ ለደብተራ ፡ ዘየሐድሩ ፡ ደቂቀ ፡ እስራኤል ።

9:19  ወሶበ ፡ ይነብር ፡ ደመና ፡ ብዙኀ ፡ መዋዕለ ፡ ዲበ ፡ ደብተራ ፡ የዐቅቡ ፡ ደቂቀ ፡ እስራኤል ፡ መዓቅቢሆሙ ፡ ለእግዚአብሔር ፡ ወኢይግዕዙ ።

9:20  ወበኍልቈ ፡ መዋዕል ፡ ዘይከድን ፡ ደመና ፡ ዲበ ፡ ደብተራ ፡ የኀድሩ ፡ ደቂቀ ፡ እስራኤል ፡ በቃለ ፡ እግዚአብሔር ፡ ወበትእዛዘ ፡ እግዚአብሔር ፡ ይግዕዙ ።

9:21  ወሶበ ፡ ይነብር ፡ ደመና ፡ እምሰርክ ፡ እስከ ፡ ነግህ ፡ ወእምከመ ፡ ጸብሐ ፡ ይሴስል ፡ ደመና ፡ ይግዕዙ ፡ መዓልተ ።

9:22  ወለእመኒ ፡ አብዝኀ ፡ ነቢረ ፡ ደመና ፡ እንዘ ፡ ይጼልላ ፡ እስከ ፡ መዋዕለ ፡ ወርኅ ፡ ይትዓየኑ ፡ ደቂቀ ፡ እስራኤል ፡ ወኢይግዕዙ ።

9:23  እስመ ፡ በትእዛዘ ፡ እግዚአብሔር ፡ ይግዕዙ ፡ ወሕገጊሁ ፡ ለእግዚአብሔር ፡ የዐቅቡ ፡ በትእዛዘ ፡ እግዚአብሔር ፡ ወበእዴሁ ፡ ለሙሴ ።