Geez - Numbers - 30

30:1  ወነገሮሙ ፡ ሙሴ ፡ ለደቂቀ ፡ እስራኤል ፡ ኵሎ ፡ ዘከመ ፡ አዘዞ ፡ እግዚአብሔር ፡ ለሙሴ ።

30:2  ወነገሮሙ ፡ ሙሴ ፡ ለመላእክተ ፡ ሕዝብ ፡ ደቂቀ ፡ እስራኤል ፡ ወይቤሎሙ ፡ ዝንቱ ፡ ውእቱ ፡ ቃል ፡ ዘአዘዘ ፡ እግዚአብሔር ።

30:3  ብእሲ ፡ ብእሲ ፡ ለእመቦ ፡ ዘበፅዐ ፡ ብፅዐተ ፡ ለእግዚአብሔር ፡ ወለእመኒ ፡ መሐለ ፡ መሐላ ፡ አው ፡ ፈለጠ ፡ ፍሉጠ ፡ በእንተ ፡ ነፍሱ ፡ ኢይገምን ፡ ቃሎ ፤ ኵሎ ፡ ዘወፅአ ፡ እምአፉሁ ፡ ይግበር ።

30:4  ወለእመኒ ፡ ብእሲት ፡ በፅዐት ፡ ብፅዓተ ፡ ለእግዚአብሔር ፡ አው ፡ ፈለጠት ፡ ፍሉጠ ፡ በቤተ ፡ አቡሃ ፡ በንእሳ ፤

30:5  ወሰምዐ ፡ አቡሃ ፡ ጸሎታ ፡ ወኵሎ ፡ ብፅዓቲሃ ፡ ዘበፅዐት ፡ በእንተ ፡ ነፍሳ ፡ ወተጸመመ ፡ አቡሃ ፡ ወይቀውም ፡ ላዕሌሃ ፡ ኵሉ ፡ ጸሎታ ፡ ወኵሉ ፡ ብፅዓቲሃ ፡ ዘበፅዐት ፡ በእንተ ፡ ነፍሳ ፡ ይነብር ፡ ዲቤሃ ።

30:6  ወለእመሰ ፡ ገብረ ፡ ላቲ ፡ አቡሃ ፡ ወፈጸመ ፡ ላቲ ፡ በዕለተ ፡ ሰምዐ ፡ ኵሎ ፡ ጸሎታ ፡ ወብፅዓቲሃ ፡ ዘበፅአት ፡ በእንተ ፡ ነፍሳ ፡ ኢይነብር ፡ ላዕሌሃ ፡ ወያነጽሐ ፡ እግዚአብሔር ፡ በዕለተ ፡ ገብረ ፡ ላቲ ፡ አቡሃ ።

30:7  ወለአመሰ ፡ አውሰበት ፡ ብእሴ ፡ ወሀለወ ፡ ላዕሌሃ ፡ ጸሎታ ፡ ዘከመ ፡ ነበበት ፡ በከናፍሪሃ ፡ ኵሎ ፡ ዘበፅአት ፡ በእንተ ፡ ነፍሳ ፤

30:8  ወሰምዐ ፡ ምታ ፡ ወተጸመማ ፡ በዕለተ ፡ ሰምዐ ፡ ከማሁ ፡ ይቀውም ፡ ላዕሌሃ ፡ ኵሉ ፡ ጸሎታ ፡ ወብፅዓቲሃ ፡ ዘበፅዐት ፡ በእንተ ፡ ነፍሳ ፡ ይቀውም ፡ ዲቤሃ ።

30:9  ወእመሰ ፡ ገብረ ፡ ላቲ ፡ ምታ ፡ ወፈጸመ ፡ በዕለተ ፡ ሰምዐ ፡ ኵሎ ፡ ጸሎታ ፡ ወብፅዓቲሃ ፡ ዘበፅዐት ፡ በእንተ ፡ ነፍሳ ፡ ኢይነብር ፡ ላዕሌሃ ፡ እስመ ፡ ገብረ ፡ ላቲ ፡ ምታ ፡ ወያነጽሐ ፡ እግዚአብሔር ።

30:10  ወጸሎታሂ ፡ ለመበለት ፡ ወለእንተ ፡ አውጽአ ፡ ምታ ፡ ኵሎ ፡ ዘበፅአት ፡ በእንተ ፡ ነፍሳ ፡ ይሄሉ ፡ ላዕሌሃ ።

30:11  ወለእመኒ ፡ እንዘ ፡ ሀለወት ፡ ቤተ ፡ ምታ ፡ ጸለየት ፡ ወበፅአት ፡ በእንተ ፡ ነፍሳ ፤

30:12  ወሰምዐ ፡ ምታ ፡ ወተጸመማ ፡ ወኢገብረ ፡ ላቲ ፡ ኵሎ ፡ ጸሎታ ፡ ይቀውም ፡ ላዕሌሃ ፡ ወኵሉ ፡ ብፅዓቲ ሃ ፡ ዘበፅዐት ፡ በእንተ ፡ ነፍሳ ፡ ይቀውም ፡ ዲቤሃ ።

30:13  ወለእመሰ ፡ ገብረ ፡ ላቲ ፡ ምታ ፡ ወፈጸመ ፡ በዕለተ ፡ ሰምዐ ፡ ኵሎ ፡ ዘወፅአ ፡ እምከናፍሪሃ ፡ ዘከመ ፡ ጸለየት ፡ ወዘከመ ፡ በፅአት ፡ በእንተ ፡ ነፍሳ ፡ ኢይነብር ፡ ላዕሌሃ ፡ እስመ ፡ ገብረ ፡ ላቲ ፡ ምታ ፡ ወያነጽሐ ፡ እግዚአብሔር ።

30:14  ወኵሉ ፡ ብፅዓት ፡ ወኵሉ ፡ ማእሰረ ፡ መሐላ ፡ ዘይከውን ፡ እኩየ ፡ ላዕለ ፡ ነፍሳ ፡ ምታ ፡ ያቀውም ፡ ላቲ ፡ ወምታ ፡ ይገብር ፡ ላቲ ።

30:15  ወለእመሰ ፡ ተጸመማ ፡ ዕለተ ፡ እምዕለት ፡ [ያ] ቀውም ፡ ላዕሌሃ ፡ ኵሎ ፡ ጸሎታ ፡ ወብፅዓቲሃኒ ፡ [ያ] ቀውም ፡ ዲቤሃ ፡ እስመ ፡ ተጸመማ ፡ በዕለተ ፡ ሰምዐ ።

30:16  ወለእመሰ ፡ ገብረ ፡ ላቲ ፡ እምድኅረ ፡ ዕለት ፡ እንተ ፡ ባቲ ፡ ሰምዐ ፡ ይከውኖ ፡ ኀጢአተ ። ዝንቱ ፡ ውእቱ ፡ ኵነኔ ፡ ኵሉ ፡ ዘአዘዞ ፡ እግዚአብሔር ፡ ለሙሴ ፡ ማእከለ ፡ ብእሲ ፡ ወማእከለ ፡ ብእሲቱ ፡ ወማእከለ ፡ አብ ፡ ወወለቱ ፡ በንእሳ ፡ እንዘ ፡ ሀለወት ፡ ቤተ ፡ አቡሃ ።