CSlElizabeth - Numbers - 30

30:1  И глагола Моисей сыном Израилевым по всем, елика заповеда Господь Моисею:

30:2  и глагола Моисей князем племен сынов Израилевых, глаголя: сие слово, еже повеле Господь.

30:3  Человек человек, иже аще обещает обет Господу, или закленется клятвою, или определит пределом о души своей, не осквернавит словесе своего: вся, елика изыдут из уст его, да сотворит.

30:4  Аще же обещает жена обет Господу, или определит определение в дому отца своего в юности своей,

30:5  и услышит отец ея обеты ея и определения ея, яже определи на душу свою, и премолчит отец ея, и да состоятся вся обеты ея, и вся определения, яже определи на душу свою, да пребудут ей.

30:6  Аще же возбранением возбранит отец ея, в оньже день услышит вся обеты ея и определения, яже определи на душу свою, не состоятся: и Господь очистит ю, яко возбрани отец ея.

30:7  Аще же посягла за мужа, и обеты ея на ней, по определении уст ея, елика определи на душу свою,

30:8  и услышит муж ея, и премолчит ей, в оньже день услышит, и тако состоятся вся обеты ея, и определения ея, яже определи на душу свою, да состоятся.

30:9  Аще же возбранением возбранит муж ея, в оньже день услышит вся обеты ея и определения ея, яже определи на душу свою, да не пребудут, яко муж возбрани ей: и Господь очистит ю.

30:10  И обет вдовицы и пущеницы, елика аще обещают на душу свою, да пребудут им.

30:11  Аще же в дому мужа ея обет ея или определение, еже на душу ея с клятвою,

30:12  и услышит муж ея, и премолчит ей, и не возбранит ей, и состоятся вся обеты ея, и вся определения ея, яже определи на душу свою да состоятся на ню.

30:13  Аще же отлучая отлучит муж ея, в оньже день услышит, вся елика изыдоша из уст ея по обетом ея и по определением ея яже на душу ея, не пребудут ей: муж бо ея отлучил есть, и Господь очистит ю.

30:14  Всяк обет и всяка клятва соуза во еже озлобити душу, муж ея поставит ей, и муж ея отимет.

30:15  Аще же молча премолчит ей день от дне, и поставит ей вся обеты ея, и определения яже на ней, поставит ей, яко умолча ей в день, в оньже услыша.

30:16  Аще же отлучая отлучит муж ея по дни, в оньже услыша, и приимет грех свой.

30:17  Сия оправдания, елика заповеда Господь Моисею, между мужем и между женою его, и между отцем и дщерию в юности ея, в дому отчи.