CSlElizabeth - Numbers - 21

21:1  И услыша Хананей царь Арадский живый при пустыни, яко прииде Израиль путем Афаримским, и ратова противу Израиля, и взя от них плен.

21:2  И обещася Израиль обетом Господу и рече: аще мне предаси люди сия подручны, погублю их и грады их.

21:3  И услыша Господь глас Израилев и предаде Хананеа подручна ему: и опустоши его и грады его, и прозва има месту тому Запустение.

21:4  И воздвигшеся от Ора горы путем иже к морю Чермному, обыдоша землю Едомлю: и малодушествоваша людие на пути,

21:5  и роптаху людие на Бога и на Моисеа, глаголюще: вскую извел еси ны из Египта убити нас в пустыни, яко несть хлеба, ни воды? И душа наша негодует о хлебе сем тщем.

21:6  И посла Господь на люди змиев умерщвляющих, и угрызаху людий: и умроша люди мнози от сынов Израилевых.

21:7  И пришедше людие к Моисеови глаголаша: согрешихом, яко роптахом на Господа и на тя: помолися убо ко Господу, да отженет от нас змии. И помолися Моисей ко Господу о людех.

21:8  И рече Господь к Моисею: сотвори себе змию (медяну) и положи ю на знамя: и будет аще угрызет змия человека, всяк угрызенный видев ю жив будет.

21:9  И сотвори Моисей змию медяну и постави ю на знамени: и бысть егда угрызаше змия человека, и взираше на змию медяну, и оживаше.

21:10  И воздвигошася сынове Израилевы, и ополчишася во Овофе:

21:11  и воздвигшеся от Овофа, ополчишася во Ахалгеи об ону страну пустыни, яже есть пред лицем Моавитским, на восток солнца:

21:12  и оттуду воздвигошася, и ополчишася в дебри Заред:

21:13  и оттуду воздвигшеся, ополчишася об ону страну Арнона в пустыни, яже исходит от предел Аморрейских: есть бо Арнон предел Моавль между Моавом и между Аморреом.

21:14  Сего ради глаголется в книзе брань Господня: Зоову попали, и потоки Арнони,

21:15  и потоки устрои в селение Ир, и прилежит пределом Моавлим.

21:16  И оттуду (воздвигошася) ко Кладязю: сей есть кладязь, о немже рече Господь к Моисею: собери люди, и дам им воду пити.

21:17  Тогда воспе Израиль песнь сию у кладязя: начинайте ему:

21:18  кладязь, ископаша его князи, изсекоша его царие язычестии во царствии их, внегда обладати ими. И от кладязя (воздвигошася) в Манфанаил:

21:19  и от Манфанаила в Наадиил, и от Наадиила в Вамоф:

21:20  и от Вамофа в Напин, иже есть на поли Моавли, от верха Изсеченаго, зрящаго пред лице пустыни.

21:21  И посла Моисей послы к Сиону царю Аморрейску, словесы мирными глаголя:

21:22  да пройдем сквозе землю твою, путем пойдем: не уклонимся ни на села, ни на винограды, не испием воды от кладязь твоих: путем царским пойдем, дондеже пройдем пределы твоя.

21:23  И не даде Сион Израилю проити сквозе пределы своя: и собра Сион вся люди своя, и изыде ополчитися на Израиля в пустыню: и прииде во Иассан, и ополчися на Израиля.

21:24  И порази его Израиль убийством меча, и обладаше землею его от Арнона до Иавока, даже до сынов Амманих: яко Иазир пределы сынов Амманих суть.

21:25  И взя Израиль вся грады сия: и вселися Израиль во всех градех Аморрейских, во Есевоне и во всех подлежащих ему:

21:26  есть бо Есевон град Сиона царя Аморрейска: и сей повоева царя Моавля прежде и взя всю землю его от Ароира даже до Арнона.

21:27  Сего ради рекут приточницы: приидите во Есевон, да соградится и созиждется град Сион:

21:28  яко огнь изыде от Есевона и пламень от града Сиона, и пояде даже до Моава, и пожре столпы Арнонския:

21:29  горе тебе, Моаве, погибосте, людие Хамосовы: продани быша сынове их в заключение и дщери их пленницы царю Аморрейскому Сиону:

21:30  и семя их погибнет, Есевон даже до Девона: и жены их еще разожгоша огнь на Моава.

21:31  Вселися же Израиль во вся грады Аморрейски:

21:32  и посла Моисей соглядати Иазира: и взяша его и села его, и изгнаша Аморреа живущаго тамо:

21:33  и возвратившеся, приидоша путем в Васан. И изыде Ог, царь Васанский, противу им и вси людие его на брань во Едраин.

21:34  И рече Господь к Моисею: не убойся его, яко в руце твои предах его и вся люди его и всю землю его: и сотвориши ему, якоже сотворил еси Сиону царю Аморрейску, иже живяше во Есевоне.

21:35  И порази его и сыны его и вся люди его, даже не оста в них живый: и наследиша землю его.