CSlElizabeth - Numbers - 24

24:1  И видев Валаам, яко добро есть пред Господем благословляти Израиля, не иде по обычаю своему в сретение волхвованием, и возврати лице свое в пустыню.

24:2  И возвед Валаам очи свои, узре Израиля ополчившася по племеном: и бысть Дух Божий на нем.

24:3  И восприим притчу свою рече: глаголет Валаам, сын Веоров, глаголет человек истинно зряй,

24:4  глаголет слушаяй словеса Крепкаго, иже видение Божие виде во сне: отверсты очи его:

24:5  коль добри доми твои, Иакове, и кущы твоя, Израилю:

24:6  яко дубравы осеняющыя и яко садие при реках, и яко кущы, яже водрузи Господь, и яко кедри при водах:

24:7  изыдет человек от семене его, и обладает языки многими: и возвысится паче Гога царство его, и возрастет царство его:

24:8  Бог изведе его из Египта, якоже слава единорога ему: пояст языки враг своих и толщы их измождит, и стрелами своими устрелит врага:

24:9  возлег почи яко лев и яко скимен: кто возбудит его? Благословящии тя благословени, и проклинающии тя прокляти.

24:10  И разгневася Валак на Валаама, и плесну руками своими, и рече Валак к Валааму: кляти тя врага моего призвах, и се, благословил еси их в третие:

24:11  ныне убо бежи на место свое: рекох, почту тя: и ныне лиши тя Господь славы.

24:12  И рече Валаам к Валаку: и послом твоим, ихже послал еси ко мне, не рекох ли, глаголя:

24:13  аще ми даст Валак храмину свою полну сребра и злата, не могу преступити слова Божия, еже сотворити е зло или добро от мене самаго: елика аще речет ми Бог, сия возглаголю?

24:14  И ныне, се, иду до места своего: гряди, присоветую тебе, что сотворят людие сии людем твоим, в последняя дни.

24:15  И восприим притчу свою рече: глаголет Валаам сын Веоров, глаголет человек истинно зряй,

24:16  слышай словеса Божия, умея умение Вышняго и видение Божие видевый во сне: отверсты очи его:

24:17  покажу ему, и не ныне: ублажаю, и не приближается: возсияет звезда от Иакова, и востанет человек от Израиля и погубит князи Моавитския, и пленит вся сыны Сифовы:

24:18  и будет Едом наследие, и будет наследие Исав враг его, и Израиль сотвори крепость:

24:19  и востанет от Иакова, и погубит спасаемаго от града.

24:20  И видев Амалика и восприим притчу свою, рече: начало языков Амалик, и семя их погибнет.

24:21  И видев Кенеона и восприим притчу свою, рече: сильно селение твое: и аще положиши на камени гнездо твое,

24:22  и аще будет Веору гнездо коварства, Ассириане пленят тя.

24:23  И видев Ога и восприим притчу свою, рече: горе, горе, кто жив будет, егда положит Бог сия?

24:24  И изыдут из рук Китиейских, и озлобят Ассура, и озлобят Евреов, и сами вкупе погибнут.

24:25  И востав Валаам отиде, возвратився на место свое: и Валак отиде к себе.