LinVB - Zechariah - 2

2:1  Nafungoli miso mpe namoni limoni ; namoni maseke manei.

2:2  Natuni anzelu oyo azalaki koloba na ngai : « Ntina ya maseke mana nini ? » Alobi na ngai : « Maseke mana mapanzaki Yuda, Israel na Yeruzalem. »

2:3  Na nsima Yawe amonisi ngai batuli banei.

2:4  Natuni : « Bango bayei kosala nini ? » Azongiseli ngai : « Maseke maye mapanzaki ekolo ya Yuda, bongo moto moko amekaki kotombola motó lisusu te ; na nsima batuli baye bayei kobangisa bango mpe kobuka maseke ma bikolo biye bilakisaki bokasi bwa bango o ekolo ya Yuda mpo ’te bapanza ya­ngo. »

2:5  Nafungoli miso mpe namoni limoni : Namoni moto moko asimbi nsinga ya bomeki bolai.

2:6  Natuni ye : « Okei wapi ? » Azongisi : « Nakei o Yeruzalem komeka bonene mpe bolai bwa engumba. »

2:7  Mpe tala anze­lu oyo azalaki koloba na ngai abelemi, anzelu mosusu ayei kokutana na ye.

2:8  Oyo wa liboso alobi na ye : « Kende mbangu mpe loba na elenge mobali ona maloba maye : Yeruzalem ekoki kozingama na lopango te, zambi bato na bibwele bazali kuna baleki mingi.

2:9  Ngai mo­to nakozala lopango la móto lokozinga Yeruzalem malamu, mpe nakozala wana na nkembo ya ngai. Yawe alobi bongo. »

2:10  Yawe alobi boye : Ee ! Napanzaki bino bipai binso o mokili, bokima ekolo ya Nordi mbangu ! Maloba ma Yawe.

2:11  Ee ! Tambolani, bato ba Sion, bomibikisa, bino bato bofandi o Babilon.

2:12  Yawe wa bokasi bonso alobi : Oyo amilakisi na nkembo ya ye mpe atindi ngai ayebisi mpo ya bikolo biye bibotoloki biloko bya bino : « Moto asali bino mabe, ayokisi mbuma ya miso ma ngai mpasi !

2:13  Solo, nakosala bango mabe, nakokaba bango o maboko ma baombo ba bango. » Bokoyeba bongo ’te Yawe wa bokasi bonso atindi ngai !

2:14  Yawe alobi : Bato ba Sion, bosepela, zambi nakoya kofanda o ntei ya bino.

2:15  Mokolo mona bato ba bikolo nde­nge na ndenge bakondima Yawe, bakokoma bato ba ekolo ya ngai, mpe ngai nakofanda o ntei ya bino. Bokoyeba bongo ’te Yawe wa bokasi bonso atindi ngai !

2:16  Yawe akozala nkolo wa Yuda, akokamata Yuda lokola mabelé ma ye o Mokili Mosantu, mpe akolinga Yeruzalem lisusu.

2:17  Bato banso, bofanda nye o boso bwa Yawe, alamuki mpe abimi o ndako ya ye esantu !