Kapingamarangi - Daniel - 10

10:1  I-di tolu ngadau a Cyrus nogo hai tagi damana Persia, di hagailoo ga-haga-gida gi Daniel, dono ingoo labelaa go Belteshazzar. Deenei la telekai e-donu, gei e-haingadaa di-iloo dono hadinga. Telekai deenei ne-hagamodongoohia gi Daniel i-lodo di moe.

10:2  Di madagoaa deelaa, au nogo manawa-gee i-lodo nia dabu e-dolu.

10:3  Au digi gai agu meegai humalia be nia goneiga manu, be e-inu nia waini, be e-dala dogu libogo, gaa-dae-loo gi-di hagaodi nia dabu e-dolu.

10:4  Di madalua maa-haa laangi o-di malama matagidagi o-di ngadau, au nogo duu i-taalinga di Monowai Tigris.

10:5  Au gaa-mmada gi-nua ga-gidee tangada e-ulu nia gahu malali mo-di tuu goolo.

10:6  Tuaidina o-maa e-maahina be-di hadu haga-laagei. Ono hadumada e-maahina be-di daba o-di ila, gei ono golomada e-hai ono gaagaa be-di ahi. Ono lima mono wae e-maahina be-di baalanga-mmee ne-olo gi-dingidingia, gei dono lee e-hai be nia lee digau dogologo.

10:7  Koau-hua modogoau ne-mmada gi-di moe deenei. Digau i dogu baahi digi gidee, gei digaula gu-mmaadagu guu-llele gi-daha, guu-pala hagammuni.

10:8  Au nogo noho modo-goau, e-daumada di-mee haga-gologolo dangada deenei. Au ogu mahi ai, ogu golomada guu-huli gu-hagalee modongoohia tangada.

10:9  Dogu longono di lee o-maa, au guu-hinga gi-hongo di gelegele gu-de-iloo-e-au tenua, gaa-kii huli gi-lala i-golo.

10:10  Di lima o tangada gaa-kumi au, ga-dahi-aga au gi ogu lima mo ogu duli, gei au nogo bolebole hua igolo.

10:11  Tangada-di-langi ga-helekai-mai, “Daniel, God e-aloho i-di-goe. Duu gi-nua, hagalongo hagahumalia gi dagu helekai. Au ne-hagau-mai gi-di-goe.” Mee ne-helekai beenei, gei au gaa-duu gi-nua, gei e-bolebole hua igolo.

10:12  Tangada-di-langi ga-helekai, “Daniel, hudee madagu. God gu-longono au dalodalo mai di laangi matagidagi ne-maanadu-iei goe bolo e-manawa hila-gi-lala gii-mee dau kae di iloo. Au ne-hanimoi belee hui dau dalodalo.

10:13  Tangada-di-langi o tenua-king go Persia gu-hai-baahi mai gi-di-au i-nia laangi e-madalua maa-dahi. Gei tangada-di-langi go Michael tagi e-dahi i digau di-langi, ga-hanimoi ga-hagamaamaa au, idimaa au gu-diiagi modogoau i Persia.

10:14  Au ne-hanimoi belee hai goe gi-iloo be di-maa di-aha gaa-hai gi au daangada i-di madagoaa dela ga-dau-mai. Deenei la di hagamodongoohia.”

10:15  Dana helekai beenei, au guu-mmada-ia gi-di gelegele, gu-deemee dagu leelee.

10:16  Tangada-di-langi dela e-hai be tangada, gaa-bili-mai gi ogu malaungudu. Au ga-helekai gi mee, “Meenei, di hagamodongoohia deenei guu-hai au gi-bagege, gu-hagalee noho go dogu bolebole.

10:17  Au e-hai be-di hege e-duu i-mua dono dagi. Au e-mee di-helekai-adu behee? Au ogu mahi ai, ge ogu madangi dogidogi e-dubu i ogu lodo ai.”

10:18  Mee ga-dahi-aga au labelaa, gei au gu-maaloo-aga.

10:19  Mee ga-helekai, “God e-aloho i-di-goe, hudee de-nnoomaalia be e-madagu.” Mee ne-helekai beenei, gei au gu-mada-maaloo, ga-helekai, “Meenei, hagia-mai dau mee belee helekai-iei goe. Goe guu-hai au gi-manawa lamalia.”

10:20  Mee ga-helekai, “Goe e-iloo be au ne-hanimoi gi-di-goe eiaha? Au ne-hanimoi belee hagi-adu di-mee dela e-hihi i-lodo di Beebaa o-di Tonu. Dolomeenei au e-hai gii-hana e-heebagi gi tangada-di-langi Persia. Nomuli tangada-di-langi Greece ga-gila-aga. Deai tangada e-hagamaamaa au ai, go Michael hua go tangada-di-langi Israel.

10:21  Mee ga-helekai, “Goe e-iloo be au ne-hanimoi gi-di-goe eiaha? Au ne-hanimoi belee hagi-adu di-mee dela e-hihi i-lodo di Beebaa o-di Tonu. Dolomeenei au e-hai gii-hana e-heebagi gi tangada-di-langi Persia. Nomuli tangada-di-langi Greece ga-gila-aga. Deai tangada e-hagamaamaa au ai, go Michael hua go tangada-di-langi Israel.