Kapingamarangi - Daniel - 8

8:1  I-di tolu ngadau a Belshazzar nogo king, au ne-mmada gi-di lua hagagida.

8:2  I-lodo di hagagida deenei, au ne-limalima-hua ga-gidee bolo au gu-i-lodo di waahale gu-duuli go Susa i-lodo tenua go Elam. Au nogo duu i-taalinga di Monowai Ulai.

8:3  Au gaa-mmada gi-di siibi-daane i-taalinga di monowai, ono madaagoo e-lua, e-dahi e-mada-looloo ge mada-hoou i-di hoo di-maa.

8:4  Au ga-daumada di siibi-daane deelaa e-haga-deaadee bahi-i-dai, bahi-i-ngeia mo bahi-i-ngaaga gi ono madaagoo e-lua. Deai di manu e-mee di-hagadautugi a-mee be e-lele gi-daha mo ono mogobuna ai. Di manu deelaa gu-daudali-hua dono hiihai, gu-hagamuamua.

8:5  Di madagoaa au gu-gologolo-hua be di-maa di-aha deenei, di kuudi ga-lele-mai i-di baahi gi-dai, nogo lele-mai giibeni gei ono wae digi tale gi-nia gelegele. Mee dono madaagoo damana e-dahi i-mehanga ono golomada.

8:6  Mee ga-hanimoi haga-huudonu gi-di siibi-daane dela nogo gidee-au e-duu i-taalinga di monowai, gaa-lele giibeni gi-di siibi deelaa.

8:7  Au ga-daumada a-mee e-heebagi gi-di siibi-daane. Mee gu-hagawelewele huoloo gaa-lele giibeni gaa-tugi i-di siibi-daane ga-hadihadi nia madaagoo e-lua o-maa. Di siibi-daane gu-ono mahi e-heebagi gi mee ai, guu-hudu gi-hongo di gelegele gu-dagadagahi, ge deai tangada e-mee di-hagamaamaa a-mee ai.

8:8  Di kuudi gu-mada-hagamuamua-mai, gaa-dae-loo gi dono madagoaa ne-maaloo-dangihi, ge dono madaagoo gaa-hadi. Nia madaagoo e-haa ga-tomo-aga i-di lohongo di-maa, e-lui huogodoo nadau ngudu gi-nia gowaa geegee.

8:9  Di madaagoo e-dahi gu-tomo-aga dono dama-madaagoo, ono mahi e-dau-adu gi-baahi ngaaga mo gi-baahi dua mo gi-baahi Tenua o-di Hagababa.

8:10  Tama-madaagoo gu-maaloo guu-mee di-heebagi gi digau-dauwa di langi ala go nia heduu, guu-kili hunu heduu gi-hongo di gelegele, gu-dagadagahi.

8:11  Mee hogi gu-hagalee gana gi Tama-daane di King o digau-dauwa di langi, guu-dugu nia tigidaumaha ang-gi Mee gi-dee-hai, gu-haga-huaidu di Hale Daumaha.

8:12  Nia daangada guu-hai nia huaidu i-golo, gu-hagalee hai nia tigidaumaha, guu-hudu taumaha e-donu gi-hongo di gelegele. Di madaagoo guu-gila i ana mee huogodoo ala nogo hai.

8:13  Au ga-longono tangada-di-langi e-heeu gi dono ehoo, “E-waalooloo behee go di haihai o-nia mee ala ne-mmada ginai i-lodo di midi? E-waalooloo behee go di huaidu dana pono di lohongo tigidaumaha o-nia laangi? E-waalooloo behee go di dagadagahi o digau-dauwa o-di langi mo-di Hale Daumaha?”

8:14  Au ga-hagalongo gi tangada-di-langi dela i-golo e-helekai, “Nia tigidaumaha la-hagalee hai i-nia luada mo nia hiahi e-2,300. Nomuli, gei di Hale Daumaha ga-hagaduu-aga haga-hoou.”

8:15  Au nogo hagamada belee hai gi-modongoohia be-di midi le e-hai bolo-aha, ga-homouli-hua tangada guu-duu i ogu mua.

8:16  Au ga-longono di lee e-hanimoi i-hongo di Monowai Ulai, “Gabriel, hagi-anga-ina di hadinga o dana mee ne-mmada ginai.”

8:17  Gabriel ga-hanimoi gaa-duu i dogu baahi, gei au gu-madagu guu-hinga gi-hongo di gelegele. Mee ga-helekai-mai, “Kooe go tangada-dangada, iloo di hadinga. Di midi le e-helekai di hagaodi henuailala.”

8:18  Dono madagoaa nogo helekai, au guu-hinga gi-hongo di gelegele, gu-de-iloo-e-au tenua. Mee gaa-kumi au, ga-hagaduu au gi ogu wae,

8:19  ga-helekai, “Au e-hagi-adu di hai o-di hagawelewele o God. Di midi le e-helekai i-di madagoaa o-di hagaodi.

8:20  “Di siibi-daane e-lua ono madaagoo ne-mmada ginai goe la-go nnenua go Media mo Persia.

8:21  Di kuudi la-go tenua-king go Greece, ge di madaagoo i-mehanga ono golomada la-go di king matagidagi.

8:22  Nia madaagoo e-haa ne-tomo-aga e-pono di madaagoo ne-hadi matagidagi la-go nia henua-king e-haa i-muli di haahi-haa tenua deelaa, ala hagalee e-maaloo be tenua matagidagi.

8:23  “Di hagalawa o nnenua king aanei ma-ga-hoohoo-mai, gei digaula ga-huaidu huoloo, digaula le e-hai gi-hagaduadua, ge di king dela ga i-golo la di king e-hamaaloo dono manawa, hinihini, ge halahalau dangada.

8:24  Mee ga-maaloo, hagalee mai i ono mogobuna donu. Mee gaa-oho ana mee, gaa-gila ana mee huogodoo ala e-hai. Mee ga-haga-huaidu digau maaloo mo nia daangada a God.

8:25  Dono iloo di hai nia mee, mee gaa-gila i dana ala halahalau dangada. Mee ga-hagaamu ia ga-hagahuaidu nia daangada dogologo i di-ingoo-hua di madagoaa. Mee ga-haga-balumee hogi di King dela e-aamua i-nia king ala i-golo, gei mee ga-daaligi gi-daha, hagalee ne-daaligi go nia mahi o-nia daangada.

8:26  Di midi o-di tigidaumaha hiahi mo luada dela ne-hagi-adu le e-gila-aga. Dugua hagammuni di-maa dolomeenei, idimaa maa e-waalooloo i-mua di-maa gaa-gila.”

8:27  Au nogo manawa-gee ge nogo magi i-nia laangi e-logo. Nomuli, gei au gaa-hana e-hai di moomee di king ne-hagaingoo-mai bolo e-hai, gei au nogo hinihini i-di midi, nogo de-iloo di-maa.