Kapingamarangi - Daniel - 5

5:1  King Belshazzar gaa-hai dana hagamiami damana ang-gi ana gau aamua e-mana, gei digaula gu-inuinu nadau waini.

5:2  Di madagoaa o digaula nogo inuinu nia waini, gei Belshazzar ga-helekai bolo nia ibu mono boolo goolo mo silber ala ne-gaamai go dono damana go Nebuchadnezzar i-di Hale Daumaha i Jerusalem la-gi-gaamai e-hai-hegau-ai ginaadou mo ana gau aamua, mo ono lodo mo ono lodo-hege.

5:3  Malaa, digaula gu-gaamai nia ibu mono boolo goolo, gei di king mo ana gau aamua mo ono lodo mo ono lodo-hege gu-inuinu-ai,

5:4  mo-di haga-hagaamu nadau god ala ne-hai gi-nia goolo, silber, baalanga-mmee, baalanga, laagau mono hadu.

5:5  Di madagoaa hua deelaa, di babaalima dangada ga-gila-mai, gaa-hihi ana mee gi-di gili di abaaba o-di hale di king, di gowaa dela e-maalama-mai nia malama. Di king gu-gidee-ia di babaalima dela e-hihi ana mee.

5:6  Mee gu-madagu huoloo, gu-maanuhia ang-gi deia huoloo, gu-hadu-kene ono hadumada, gu-bolebole ono wae.

5:7  Mee gaa-wolo gi-nua bolo gi-laha-mai digau hai-mogobuna, digau hai-buubuu mo digau manamana lodo di ahiaalangi. Di king ga-helekai gi digaula, “Be koai hua i goodou dela gaa-mee di-dau nia helekai aanei, ga-hagi-mai ono hadinga, gei au ga-haga-gahu a-mee gi-nia gahu halatee luuli, gaa-wanga di hau goolo gi-di uwa o-maa, gei mee gaa-hai togodolu dagi i dogu henua.”

5:8  Digau kabemee a-maa gu-loomoi huogodoo, gei di-maa tangada e-mee di-dau be e-haga-donu tadinga nia helekai aalaa gi-di king ai.

5:9  Di king koia gu-madagu huoloo, koia gu-manawa-gee, gei digau aamua a-maa gu-uli nadau gai.

5:10  Tinana di king ga-longono-ia nia mee aanei, ga-hanimoi gi-di gowaa dela e-hai-ai tagamiami digaula, ga-helekai gi-di king, “Meenei di king gi-mouli-hua beelaa! Goe hudee heia goe gi-hagahuaidu go doo uli oo gai.

5:11  Taane i-lodo do henua king iai di hagataalunga o-nia god dabuaahia i dono baahi. Di madagoaa do damana nogo king, gei mee tangada koia e-iloo-ia nia mee, gei e-kabemee gadoo be-di kabemee o-nia god. Gei do damana, King Nebuchadnezzar guu-hai a-mee di tagi ni digau hai-mogobuna, digau hai-buubuu, digau kabemee, mo digau manamana lodo di ahiaalangi.

5:12  Mai i-di hagataalunga donu mo-di kabemee o-maa, deenei ne-hidi-ai Daniel, dela gu-haga-ingoo go di king bolo Belteshazzar, e-iloo-ia di haga-modongoohia nia hadinga o-nia midi, mo-di aau nia hagahinihini, mo-di haga-modongoohia nia mee ala e-nngala. Malaa, goe gahia-mai a Daniel gi-haga-modongoohia-adu tadinga o dau mee deenaa.”

5:13  Daniel ga-laha-mai gi-mua di king, gei di king ga-heeu gi mee, “Goe go Daniel, tangada i digau ala ne-laha-mai i Judah go dogu damana di king?

5:14  Au guu-longo oo longo bolo di hagataalunga o-nia god dabuaahia la i oo lodo, mo-di maalama mo-di iloo nia mee mo-di kabemee la i doo baahi labelaa.

5:15  Digau kabemee mo digau hai-buubuu gu-laha-mai belee dau-mai gi-di-au nia helekai aalaa mo ono hadinga, gei digaula e-de-iloo-ginaadou nnadinga o-nia maa.

5:16  Gei au gu-hagalongo bolo goe e-mee di-gida nia mee ala e-nngala mo-di haga-modongoohia nadau hadinga. Maa goe e-mee di-dau nia helekai aanei, ga-hagi-mai ono hadinga gi-di-au, gei au ga-haga-gahu goe gi-nia gahu aamua ala e-halatee luuli, gaa-wanga di hau goolo o-di aamua gi doo uwa, gei goe gaa-hai togodolu dagi i dogu henua.”

5:17  Gei Daniel ga-helekai, “Dugua au wanga-dehuia aanaa, be wanga gi tei dangada. Meenei di king, au gaa-dau nia helekai aalaa, ga-hagi-adu gi-di-goe ono hadinga.

5:18  “Meenei di king, di God Aamua Muginua guu-hai do damana, Nebuchadnezzar, di king e-aali huoloo, guu-hai a-mee gi-aamua ge hagalabagau.

5:19  Idimaa mee dela guu-hai di king aamua huoloo, gei nia daangada o-nia hagadilinga henua, nia daangada-henua, mo nia hagadilinga helekai nogo polepole i-di nadau mmaadagu i mee. Maa mee ga-hiihai bolo ia e-daaligi dana dangada gii-made, gei mee e-hai gii-hai. Gei mee gaa-hai bolo ia e-dugu tangada la-hagamouli, gei mee e-dugu. Mee e-hagalaamua be e-hagahuaidu tangada gii-hai be dono hiihai.

5:20  Gei di mee dela ne-daa-iei mee gi-daha mo dono lohongo-aamua gu-deai dono haga-madagu ai, la-go dono hagamuamua, dono hamaaloo dono manawa, mo dono huaidu.

5:21  Mee gu-daa gi-daha mo nia daangada, gei nia maanadu a-maa guu-hai be nia maanadu manu. Mee guu-hana guu-noho i-baahi nia ‘donkey’-lodo-geinga, e-gai ana geinga-tolo gadoo be-di kau, e-kii i-di langi aadee, deai dana mee e-gahu ia i-nia magalillili ai. Muli-mai, gei mee gu-iloo-ia bolo ma go di God Aamua Muginua dela e-huwa i-nia madagoaa king o-nia daangada, gei e-wanga di mogobuna deenei gi-di-ingoo-hua tangada a-Mee dela e-hiihai ginai.

5:22  “Gei goe, go tama a-maa, goe gu-iloo nia mee huogodoo aanei, gei goe hagalee haga-balabala oo lodo.

5:23  Goe gu-ngalua hai-baahi gi Tagi dela i-di langi, gu-gaamai nia ibu mono boolo ala ne-daa gi-daha mo di Hale Daumaha a-Maa. Goe mo au gau aamua, mo godou lodo, mo nia lodo-hege gu-inuinu godou waini i-lodo nia maa, mo-di haga-hagaamu godou god ala ne-hai gi-nia goolo, silber, baalanga-mmee, baalanga, laagau mono hadu. Nia god aanei le e-dee-gida ge de-longono nia mee, gei e-de-iloo-ginaadou dahi mee. Gei goe hagalee hagalabagau di God dela e-hagamodu be goe e-mouli be e-made. Gei dela hogi e-huwa i au mee huogodoo ala e-hai.

5:24  Deenei di mee a God dela ne-hagau-mai dana babaalima gaa-hihi nia helekai aalaa.

5:25  Malaa, aanei la nia helekai ala ne-hihi: Mene, mene, tekel, u farsin.

5:26  Aanei-laa ono hadinga: Mene dono hadinga boloo: Nambaa: God guu-dau nia laangi o do madagoaa gaa-hai di king, guu-wanga dono hagamodu.

5:27  Tekel, dono hadinga boloo: Pauna: Goe guu-lawa di pauna i-hongo di mee-pauna-mee, guu-hai bolo goe e-maamaa-kii balua.

5:28  Farsin, dono hadinga boloo: Duwwe: Do henua gu-haahi-lua, guu-duwwe i Persia mo Media.”

5:29  Di madagoaa-hua deelaa, gei Belshazzar gaa-hai gi ana gau hai-hegau gi-haga-ulu-ina a Daniel gi-di gahu halatee luuli o digau aamua, ge gi-wanga-ina di hau goolo gi-di uwa o-maa. Gei mee guu-hai a Daniel di togodolu dagi aamua i-lodo dono henua.

5:30  Di boo-hua deelaa, gei di king o Babylonia go Belshazzar la-gu-daaligi guu-made.

5:31  gei-ogo Darius, tangada o Media, guu-pono di lohongo o-maa guu-king. Mee gu-modoono maa-lua ono ngadau i-di madagoaa deelaa.