Kapingamarangi - Daniel - 4

4:1  Di king go Nebuchadnezzar ne-haga-iloo ang-gi nia daangada o-nia henua huogodoo, mo nia hagadilinga daangada, mo digau ala e-helekai i nnagadilinga helekai i henuailala boloo: “Di aumaalia gi-madalia goodou.

4:2  Hagalongo-mai gi-di-au dela e-haga-modongoohia nia mee haga-goboina ala gu-hagagida-mai gi-di-au go di God Aamua Muginua.

4:3  E-aali huoloo go ana haga-modongoohia! E-aali huoloo go ana mee haga-goboina! God go di King gaa-dagi-hua beelaa, gei dono mogobuna dagi e-hagadau-hua beelaa gi-muli.

4:4  “Au nogo noho-hua maluagina i dogu hale king.

4:5  Gei au gaa-kii gaa-hai dagu midi, e-mmada gi-nia hagadilinga ada-hagamadagudagu dangada.

4:6  Deenei-laa ne-hai-ai dagu haga-iloo bolo digau kabemee o Babylon huogodoo gi-laha-mai gi ogu mua, gi-hagia-mai gi-di-au tadinga o dagu midi.

4:7  Gei digau hai-mogobuna mo digau hai-buubuu, mo digau manamana lodo di ahiaalangi gu-loomoi, gei au ga-hagi-anga gi digaula dagu midi, gei digaula gu-deemee di-hagi-mai tadinga o dagu midi.

4:8  Muliagina-loo, gei-ogo Daniel dela gu-haga-ingoo gi-di ingoo o dogu god bolo Belteshazzar, ga-hanimoi gi ogu mua. Go mee dela iai di Hagataalunga o-nia god dabuaahia. Au ga-hagi-anga dagu midi dela ne-hai la gi mee, ga-helekai,

4:9  Meenei Belteshazzar, di tagi o digau hai-mogobuna. Au e-iloo bolo di hagataalunga o-nia god dabuaahia la i doo baahi, gei nia mee ala e-de-iloo nia daangada la-hagalee haingadaa i doo baahi. Malaa, goe gi-hagia-mai-malaa tadinga o dagu midi deenei:

4:10  “Dogu madagoaa nogo kii-iei au gaa-hai dagu moe, gei au guu-mmada gi-di laagau damanaiee e-duu i tungaalodo o henuailala.

4:11  Di laagau deelaa guu-tomo damanaiee huoloo, di ulu o di-maa guu-dau i-di langi. Nia daangada o-nia mada o henuailala e-gidee-ginaadou huogodoo di laagau deelaa.

4:12  Nia lau o-di laagau deelaa e-humalia, gei di-maa guu-huwa dau-logo huoloo, nia huwa o di-maa guu-dohu ang-gi nia daangada huogodoo. Nia manu dolodolo guu-gida di-nadau hagamalu i ono lala, gei nia manu mamaangi guu-hai nadau waehongo i-nia manga o di-maa. Gei nia mee huogodoo ala e-mouli gu-miami humalia mai i-di laagau deelaa.

4:13  “I-lodo dagu moe gei au gaa-mmada gi tangada di-langi hagaloohi dabuaahia ga-haneia i-di langi i-nua.

4:14  Mee ga-haga-iloo gi-nua-loo boloo, ‘Heelee di laagau deelaa la-gi-lala, duduudia nia manga la-gi-daha, magamaga-ina nia lau mo nia huwa o di-maa. Haga-bagia nia manu dolodolo ala i-lala di-maa mo nia manu mamaangi ala i-lodo nia manga la-gi-daha.

4:15  Dugua di tono di laagau la i-golo, wanga-ina dono duu baalanga mo baalanga-mmee. Diagia i-di gowaa maalama geinga-tolo deelaa. Heia nia magalillili gi-monnono-ia gi-hongo taane deenei. Diagia a-mee gii-noho madalia nia manu mo nia laagau.

4:16  I-nia ngadau e-hidu, gei mee hagalee hai ana maanadu dangada, nia maanadu hua manu.

4:17  Deenei go di hagailoo mai baahi digau di-langi hagaloohi. Malaa, heia digau henuailala huogodoo gi-iloo-ginaadou bolo ma go di God Aamua Muginua dela e-huwa nia madagoaa dagi o-nia daangada. Mee e-mogobuna di-wanga nia maa gi digau ala e-hiihai ginai, mo digau ala hagalee-loo e-hagalabagau.’ ”

4:18  King Nebuchadnezzar ga-duudagi-adu ana helekai, “Deenei dagu midi ne-mmada ginai au. Gei goe go Belteshazzar, haga-donu-ina mai gi-di-au dono hadinga, idimaa, digau kabemee o dogu henua-king le e-deemee di haga-donu dagu midi. Gei goe e-mee, idimaa, di hagataalunga o-nia god dabuaahia la ala i doo baahi.”

4:19  Malaa, gei Daniel, dela ne-haga-ingoo labelaa bolo Belteshazzar, gu-homouli, guu-noho dee-muu. Gei di king ga-helekai gi mee, “Belteshazzar, goe hudee heia goe gi-maanadu e-logo gi dagu midi, be go tadinga o di-maa.” Gei Belteshazzar ga-helekai, “Meenei dogu king. Au bolo di midi deenei la-gi-heia hualaa gi o hagadaumee! Gei dono hadinga la-gi-heia labelaa ang-gi o hagadaumee, gi-hudee heia-adu gi-di-goe!

4:20  Di laagau dela ne-mmada ginai goe, dela e-looloo e-tugi nia gololangi, le e-mee di-mmada ginai digau o henuailala hagatau.

4:21  Nia lau o di-maa e-humalia huoloo, gei nia huwa gu-logowaahee guu-dohu ang-gi digau henuailala huogodoo, nia manu dolodolo guu-gida di-nadau hagamalu i ono lala, gei nia manu mamaangi guu-hai nadau waehongo i ono manga.

4:22  Meenei di king, goe la-go di laagau deenei dela e-looloowehaa ge maaloo. Goe guu-tomo maaloo, dela gu-dau-iei goe i-di langi, gei o mogobuna la-guu-dau gi-nia mada o henuailala.

4:23  Nomuli gei goe gaa-mmada gi tangada di-langi hagaloohi dabuaahia dela ne-haneia i-di langi ga-helekai boloo, ‘Heelee di laagau, hunahuna gi-daha, dugua tono o di-maa mo ono aga la i-golo. Wanga-ina dono duu baalanga mo baalanga-mmee. Heia nia magalillili gi-monnono gi-hongo taane deenei, diagia a-mee gi-mouli i-golo dalia nia manu dolodolo i-nia ngadau e-hidu.’

4:24  “Meenei di king, deenei la tadinga o dau midi, gei deenei la di-haga-iloo mai di God Aamua Muginua adu gi-di-goe i-nia mee ala gaa-hai-adu gi-di-goe, meenei dogu dagi.

4:25  Goe ga-hagabagi gi-daha mo nia daangada, gei goe gaa-hana gaa-noho i-baahi nia manu lodo-geinga i-nia gowaa maalama. I-nia ngadau e-hidu, gei goe gaa-hai dau gai geinga-tolo gadoo be nia kau mono siibi i-di gowaa maalama, dela e-iai di magalillili e-doo gi oo nua. Gei goe gaa-donu adu gi-di-goe bolo ma go di God Aamua Muginua la-dela go Mee dela e-huwa nia madagoaa-dagi o-nia daangada, gei e-wanga nia maa gi digau ala e-hilihili go Mee.

4:26  Tangada di-langi dela ne-haga-iloo bolo di tono mono aga o-di laagau deelaa la-gi-diagia hua igolo, le e-hai dono hadinga bolo goe e-mee di king labelaa i do madagoaa dela ga-iloo-e-goe bolo ma go God dela e-dagi henuailala hagatau.

4:27  Malaa, meenei di king, goe hagalongo gi dagu hagamaamaa. Huli gi-daha mo o huaidu, heia nia mee ala e-humalia ge e-donu, gei gi-dumaalia ang-gi digau hagaloale, gei do mouli gaa-kila humalia.”

4:28  Malaa, nia mee huogodoo aanei gu-kila-aga guu-hai gi-di King Nebuchadnezzar.

4:29  Nia malama e-madangaholu maa-lua nomuli, gei mee nogo heehee i-tuatala dono hale king i Babylon,

4:30  mo-di helekai boloo, “Mmada-malaa gi Babylon gu-aali huoloo! Ne-hau ko-au belee hai-ai dogu guongo damana, e-haga-modongoohia-ai dogu mogobuna mo ogu mahi, ogu madamada mo dogu aamua.”

4:31  Di madagoaa-hua di king dela e-leelee beenei, gei di lee ga-haneia i-di langi, ga-helekai, “King Nebuchadnezzar, hagalongo gi agu helekai! Dolomeenei, gei Au gaa-daa do mogobuna aamua la-gi-daha mo goe.

4:32  Gei goe ga-hagabagi gi-daha mo nia daangada, gaa-noho madalia nia manu lodo-geinga. Gei goe gaa-gai au geinga-tolo gadoo be nia kau i-nia ngadau e-hidu, gaa-dae-loo gi do madagoaa dela ga-iloo-e-goe bolo ma go di God Aamua Muginua dela e-huahua nia madagoaa-dagi o-nia daangada, gei go Mee dela e-wanga di mogobuna deenei gi-di-ingoo-hua tangada a-Mee dela e-hiihai e-wanga ginai.”

4:33  Di madagoaa-hua deelaa, gei nia mee aanei guu-kila i-baahi Nebuchadnezzar. Mee gu-hagabagi gi-daha mo nia daangada, gu-gaigai ana geinga-tolo gadoo be nia kau. Guu-noho tiutiu i-nia magalillili o-di ahiaalangi, nia ngaahulu dono libogo gu-lloowehaa gadoo be nia ngaahulu ‘eagle’. Nia madaniha o-maa guu-hai gadoo be nia madaniha manu mamaangi.

4:34  “I-muli nia ngadau e-hidu, gei au go Nebuchadnezzar ga-mmada-aga gi-di langi i-nua, gei agu maanadu dangada la-gu-hanimoi labelaa gi-di-au. Gei au gu-hagaamu di God Aamua Muginua mo-di danggee gi Mee dela e-mouli gaa-hana-hua beelaa. Idimaa ma go Mee dela e-dagi hua-beelaa, dono Henua-King le e-noho-hua beelaa dalia nia adu-daangada gi-muli.

4:35  Nia daangada huogodoo ala e-haga-honu henuailala la-hagalee nia mee i-baahi o Mee. Digau di-langi mo digau henuailala huogodoo e-noho i-lala ono mogobuna. Deai tangada e-mee di-hai-baahi gi Mee be de-hiihai gi-nia hai a-Mee ala e-hai-ai.

4:36  “Di madagoaa-hua dela ne-hanimoi-ai dogu mouli hagalua gi-di-au, dogu hagalabagau mo dogu aamua mo nia madamada o dogu madagoaa king gu-gaamai labelaa gi-di-au. Agu gau hai-hegau gu-hagaahi-mai au, gei au guu-hai labelaa di king o dogu henua, gei dogu hagalabagau koia gu-i-nonua i-di mee anadilaangi.

4:37  “Malaa dolomeenei, gei au go Nebuchadnezzar e-hagaamu gei e-hagalaamua di King o-di langi i-nua i ana hegau donu mo ana ala huudonu. Mee dela e-mee di-haga-manawa balabala digau ala e-ngalua hagamuamua.”