Kapingamarangi - Daniel - 6

6:1  Darius ga-hagamaanadu bolo ia e-dongo ana gobinaa e-lau-madalua e-dagi i-hongo ana guongo.

6:2  Haga-puni-anga, mee gu-hilihili labelaa bolo Daniel mo ono ehoo dogolua e-madamada humalia i-nia hegau nia gobinaa aalaa mo e-benebene humalia nia maluagina o-di king.

6:3  Digi duai, gei di-maa gu-modongoohia bolo Daniel koia e-ngalua humalia i ono ehoo ga-dagi aalaa mo nia gobinaa. Mee e-tanga-hua i-daha mo digaula, gei di king guu-hai dana maanadu bolo ia gaa-dugu a-mee e-madamada humalia i ana guongo huogodoo.

6:4  Nia daangada madamada humalia ala i-golo mo nia gobinaa gu-hagamada e-halahala di-nadau ala dela e-haga-ihala a Daniel i-di hai a-mee dela e-dagi tenua aamua deelaa. Gei di-maa e-deemee, idimaa, Daniel le e-ngalua huudonu, gei mee digi hai ana mee hala be ana mee tilikai.

6:5  Malaa, digaula ga-helehelekai i nadau mehanga, “Gidaadou e-deemee di-gida tadau mee belee hagahuaidu a-mee, go di-maa hua be-di mee e-dau ang-gi taumaha o-maa.”

6:6  Malaa, digaula gaa-hula ga-helekai gi Darius, “King Darius, goe gi-mouli-hua beelaa!

6:7  Gimaadou huogodoo ala e-dagi au guongo, ala go nia daangada madamada humalia nia gobinaa, mo nadau togolua gobinaa, mono gau oobidi ala i-golo, gimaadou guu-buni ngaadahi bolo goe gi-haga-iloo-ina di haga-iloo deenei, gi-haga-mogobuna-ina. Heia au haga-iloo bolo i-lodo nia laangi e-motolu, deai tangada e-dangi i dono hiihai gi tuai god-gee ai, be ang-gi tei dangada i-daha mo-di king ai. Tangada dela ga-haga-hai-gee di haga-iloo deenei, le e-hudu gi-lodo di luwa laion.

6:8  Malaa, meenei di king, heia di haga-iloo deenei, wanga-ina ginai do ingoo gi-hai-hegau, gaa-hai taganoho mai baahi digau Media mo Persia dela e-deemee-loo di-huli.”

6:9  Malaa, King Darius gu-sain taganoho deenei.

6:10  Di madagoaa hua o Daniel ne-iloo-ia bolo taganoho deelaa la-guu-sain, gei mee gaa-hana gi dono hale. Di hale o-maa iai di ruum e-huli-adu beelaa gi Jerusalem. Mee gaa-hana gi-golo be dana hai dela e-nnoo-mau e-haihai. E-dogoduli gi-lala i-mua di bontai dulii mahuge, ga-dalodalo ang-gi dono God hagadolu i-di laangi e-dahi.

6:11  Di madagoaa hua nia hagadaumee o Daniel ne-gidee-ginaadou bolo mee e-dalodalo gi dono God,

6:12  digaula guu-hula gi-di king, gu-hagahuaidu a Daniel gi-di king boloo, “Meenei di king, goe gu-sain dau haganoho bolo i-lodo nia laangi e-motolu tangada dela gaa-gida bolo e-dangidangi i dana mee gi tei god be tei dangada laa-daha mo goe, le e-hudu gi-lodo di luwa laion.” Gei di king ga-helekai, “Uaa, taganoho maaloo-dangihi ni digau Media mo Persia deenaa, gei e-deemee di-huli.”

6:13  Digaula ga-helekai gi-di king, “Daniel dela go tangada dela ne-laha-mai i Judah la-hagalee hagalaamua goe, be e-daudali dau haganoho dela ne-hai. Mee e-hai dalodalo i-nia laangi huogodoo, hagadolu di laangi e-dahi.”

6:14  Di madagoaa di king ne-longono-ia di mee deenei, geia gu-manawa-gee. Mee ga-hagamahi e-halahala di ala dela e-haga-dagaloaha a Daniel, gaa-hai-loo, gaa-hai-loo go di laa ga-ulu.

6:15  Nia hagadaumee o Daniel ga-loomoi labelaa gi-di king ga-helekai, “Meenei, goe e-iloo-hua bolo nia haganoho o Media mo Persia i-golo e-hai boloo: Di haganoho di king dela ma-gaa-hai le e-deemee di-huli.”

6:16  Malaa, gei di king gaa-hai dana haga-iloo bolo Daniel le e-hudu gi-lodo di luwa laion. Mee ga-helekai gi Daniel, “Daniel, doo God dela e-hai-hegau ginai goe hagahumalia, la-gi-haga-dagaloaha-ina goe.”

6:17  Di ngudu di luwa deelaa la-guu-pono gi-di hadu. Di king guu-wanga dono maaga aamua gi-hongo di hadu deelaa bolo gi-de-hanimoi tangada e-daa Daniel gi-daha.

6:18  Di king gaa-hana gi dono hale-king, digi kii i-di boo deelaa. Hagalee e-miami ge hagalee labelaa nia mee haga-tenetene ne-hai ai.

6:19  Heniheni-loo, gei di king gaa-hana gi-di luwa laion.

6:20  Mee gaa-dau i-golo, gaa-wolo-adu haahaa boloo, “Daniel, tangada hai-hegau di God Mouli. E-hai behee, doo God dela e-hagalaamua kooe la-guu-mee di-haga-dagaloaha goe gi-daha mo nia laion?”

6:21  Daniel ga-helekai, “Meenei di king gi-mouli hua beelaa!

6:22  Dogu God gu-hagau-mai dana dangada di-langi guu-tai nia ngudu o-nia laion gi-de-haga-mmaemmae au. Meenei di king, Mee ne-hai di-maa beenei, idimaa, Mee e-iloo-Ia bolo au e-madammaa gei au dagu huaidu ne-hai adu gi-di-goe ai.”

6:23  Di king gu-tenetene huoloo, ga-haga-iloo bolo Daniel la-gi-dahi-aga-ina gi-daha mo-di luwa deelaa. Digaula ga-dahi-aga a-mee, gu-gidee bolo mee humalia hua, idimaa mee e-hagadagadagagee gi dono God.

6:24  Nomuli gei di king ga-haga-iloo bolo digau ala nogo hagahuaidu Daniel le e-hagaduadua. Digaula mo nadau lodo mo nadau dama la-gi-kilia gi-lodo di luwa laion. Digaula ne-kili digi dau i tua di luwa, gei nia laion gu-tobo-aga gi digaula gu-hunahuna nadau iwi huogodoo.

6:25  King Darius gaa-hihi ang-gi digau huogodoo o-nia hagadilinga henua, hagadilinga daangada, hagadilinga helekai o henuailala boloo: “Tagaaloho!

6:26  Au e-haga-iloo bolo i-lodo agu guongo huogodoo, nia daangada huogodoo gi-hagalaamua-ina gei gi-hagalabagau-ina di God o Daniel. “Mee di God dela e-mouli, ge e-dagi gaa-hana-hua beelaa. Dono henua king le e-deemee di-oho, gei ono mogobuna deai ono hagaodi ai.

6:27  Mee e-benebene ge e-haga-dagaloaha. Mee e-hai ana mee de-iloo-gidaadou, mono mee haga-goboina dangada i-di langi i-nua mo i henuailala. Mee ne-haga-dagaloaha a Daniel gi-de-daaligi go nia laion.”

6:28  Daniel guu-kila ana hegau i-di madagoaa o Darius nogo king mo-di madagoaa labelaa o Cyrus tangada Persia nogo king.