Kapingamarangi - Daniel - 2

2:1  Di lua ngadau o Nebuchadnezzar nogo king, geia guu-hai dana midi. Di midi a-maa guu-hai a-mee gi-dee-baba, gu-deemee dana kii.

2:2  Mee guu-hai dana hegau bolo digau hai-mogobuna, digau hagamaamaa, digau hai-buubuu, mo digau ala koia e-iloo nia mee la-gi-loomoi e-haga-donu dana midi. Gei digaula gu-loomoi, guu-tuu i-mua di king.

2:3  Di king ga-helekai, “Au guu-noho dee-baba i dagu midi dela ne-hai. Au bolo gi-iloo hua-laa-eau tadinga o dagu midi.”

2:4  Gei digaula ga-helekai gi mee i nnelekai Aram, “Meenei di king gi-mouli-hua beelaa! Hagia-mai dau midi, gei gimaadou ga-haga-donu-adu.”

2:5  Di king ga-helekai, “Deenei dagu hagamodu bolo maa goodou ga-deemee di-hagi-mai dagu midi mo di-haga-donu di-maa, gei au ga-hagihagi godou dudaginga gi-daha, gei godou hale la-ga-oho gi-momooho.

2:6  Maa goodou gaa-mee di-hagi-mai dagu midi mo di-haga-donu di-maa, gei au gaa-hui goodou gi-nia wanga-dehuia, gaa-hai goodou gii-hai digau e-hagalaamua. Malaa, goodou hagia-mai-laa di midi mo dono hadinga.”

2:7  Digaula ga-helekai labelaa hagalua boloo, “Meenei di king, hagia-mai dau midi, gei gimaadou ga-hagi-adu dono hadinga.”

2:8  Di king ga-helekai, “Au gu-modongoohia bolo goodou e-hagadaatagi bolo gi-mada-waalooloo-mai di madagoaa, idimaa, goodou gu-modongoohia bolo dagu kai le e-donu dela bolo

2:9  maa goodou ga-hagalee hagi-mai dagu midi, gei au ga-hagaduadua goodou huogodoo. Goodou guu-buni ngaadahi bolo goodou e-hai godou kai-tilikai i ogu mua bolo gii-dae-mai di madagoaa e-huli-ai dagu maanadu. Malaa, dolomeenei goodou hagia-mai dagu midi, gei au ga-iloo-laa bolo goodou e-iloo labelaa tadinga o di-maa.”

2:10  Gei digaula ga-helekai, “Ma deai tangada i-hongo henuailala e-mee di-hai dau mee deenaa e-hiihai ginai goe ai. Gei di-maa hogi deai di king aamua ge koia e-maaloo ono mogobuna ne-hai dana mee beenaa gi ana gau hai-mogobuna, ana gau hai-buubuu mo ana gau manamana lodo di ahiaalangi ai.

2:11  Gei dau mee dela e-heeu le e-haingadaa huoloo. Deai tangada e-mee di-haga-modongoohia di-maa ai, aalaa-hua go nia god, gei digaula hagalee mouli i tadau baahi!”

2:12  Di mee deenei guu-hai di king gi-hagawelewele giibeni, gu-helekai bolo digau hai-buubuu mo digau hai mogobuna le e-daaligi huogodoo gi-daha mo Babylon.

2:13  Malaa, taganoho deenei la-ne-mogobuna bolo gi-daaligidia digaula huogodoo gii-mmade, ngaadahi mo Daniel mo ono ehoo.

2:14  Malaa, Daniel gaa-hana gi Arioch go di tagi o digau hagaloohi a di king, ga-helekai hagahumalia gi mee, go tangada dela ne-dongo bolo e-daaligi digaula.

2:15  Daniel ga-heeu gi Arioch be ma ne-aha dela di king guu-hai dana haganoho huaidu huoloo beelaa, gei Arioch ga-haga-modongoohia gi mee di mee dela ne-hai.

2:16  Di madagoaa hua deelaa, gei Daniel guu-hana gu-dangidangi bolo gi-dugu-anga di madagoaa bodobodo, gii-mee ia di-haga-donu di midi gi di king.

2:17  Daniel gaa-hana gi dono hale ga-hagi-anga gi ono ehoo Hananiah, Mishael mo Azariah di mee deenei,

2:18  gu-helekai gi digaula bolo gi-dangidangi ang-gi di God o-di langi i-di gili di midi hagammuni di king, gi-dumaalia gi digaula, gi-hagalee daaligi ginaadou dalia digau kabemee o Babylon ala i-golo.

2:19  Malaa, di boo hua deelaa, gei God gu-haga-modongoohia di mee hagammuni deenei la gi Daniel i dono moe. Gei mee ga-hagaamu di God o-di langi, ga-helekai,

2:20  “God e-kabemee gei e-mogobuna huoloo! Hagaamuina a-Mee gaa-hana-hua beelaa.

2:21  Ma go Mee dela e-huwahuwa nia madagoaa mo nia hagadilinga madagoaa e-haa ala i-lodo di ngadau e-dahi. Ma go Mee dela e-haga-noho ge e-daa gi-daha nia king, gei go Mee dela e-wanga nia kabemee mo nia iloo gi-nia daangada.

2:22  Go Mee dela e-haga-gida nia mee ala e-dugu hagammuni, gei e-iloo-Ia nia mee ala e-dugu i-lodo di bouli, dono gili e-haganiga go-di maalama.

2:23  Au e-hagaamu ge e-hagalaamua Goe, go di God o ogu maadua-mmaadua. Goe ne-gaamai gi-di-au dogu kabemee mo ogu mahi. Goe gu-hila-mai gi agu dangidangi, gu-haga-modongoohia-mai gi gimaadou madau mee ala e-helekai-ai gi-di king.”

2:24  Malaa, Daniel gaa-hana gi Arioch, go tangada dela ne-dongo bolo e-daaligi digau kabemee o Babylon, ga-helekai gi mee, “Hudee daaligidia digaula. Lahia au gi-mua di king, gei au ga-haga-modongoohia di midi a-maa gi mee.”

2:25  Arioch gaa-lahi a Daniel hagalimalima gi-mua di king ga-helekai, “Au guu-gida taane deenei, tangada mai i digau ala ne-laha-mai i Judah, go mee dela e-mee di-haga-donu dau midi.”

2:26  Di king ga-helekai gi Daniel dela gu-haga-ingoo bolo Belteshazzar boloo, “Goe e-mee di-hagi-mai dagu midi mo dono hadinga?”

2:27  Gei Daniel ga-helekai, “Meenei di king, deai tangada kabemee, be tangada hai-buubuu, be tangada hai-mogobuna, be tangada manamana lodo di ahiaalangi e-mee di-hagi-adu nia mee aanaa ai,

2:28  deelaa-hua go di God dela i-di langi dela e-mee di-haga-modongoohia nia hagadilinga mee nngala beenaa. Mee gu-haga-modongoohia-adu gi-di-goe nia mee ala ma-ga-kila-aga maalia. Malaa, dolomeenei gei au ga-hagi-adu gi-di-goe dau midi mo au moe ala ne-mmada ginai goe i do madagoaa nogo kii.

2:29  “Meenei di king, do madagoaa nogo kii-iei goe, gei goe guu-hai dau midi i dagidilaangi, gei God dela e-haga-gila-adu ana mee nngala, guu-hagi-adu nia mee ala ga-kila-aga maalia.

2:30  Malaa, dau midi dela ne-hagagida-mai gi-di-au la-hagalee ne-hai bolo au e-kabemee i-hongo digau ala i-golo. Ne-hai bolo gi-iloo-e-goe tadinga o dau midi, gei gi-iloo labelaa e-goe au hagabaubau ala ne-lloo-adu gi-di-goe.

2:31  “Meenei di king, i-lodo dau moe, goe ne-mmada gi-di ada-dangada ne-hau, e-duu damanaiee i oo mua, e-dingidingia ge dabadaba dono gili, ge e-hagamadagudagu dangada.

2:32  Di libogo o di-maa ne-hai gi-nia goolo madammaa. Tadahada mono lima la-ne-hai gi-nia silber. Tuaidina mono gaba la-ne-hai gi-nia baalanga-mmee.

2:33  Nia wae la-ne-hai gi-nia baalanga. Nia babaawae hunu gowaa la-ne-hai gi-nia baalanga gei hunu gowaa la-ne-hai gi-nia gelegele.

2:34  Do madagoaa hua dela e-daumada di-maa, gei di hadu damanaiee ga-doo-iha hua i-deia i-di gowaa helemodu, gaa-nngenge gi-hongo nia babaawae o-maa, gu-oho nia maa gi-momooho hagaligiligi.

2:35  Di madagoaa hua deelaa, gei nia baalanga, nia gelegele, nia baalanga-mmee, nia silber mono goolo gu-momooho ngaadahi, guu-hai be nia lehu ala ma-ga-angiangina i-lodo di madagoaa o-di laa. Nia lehu aalaa gu-iliili huogodoo go di madangi gi-daha gu-hagalee nia mee ne-dubu i-di lohongo ai. Di mee i-golo la-go di hadu damanaiee hua deelaa, guu-tomo guu-hai di gonduu damanaiee dela guu-gahu henuailala hagatau.

2:36  “Deenei dau midi. Dolomeenei gei au ga-hagi-adu tadinga o dau midi.

2:37  Kooe dela go di king e-aamua i-hongo nia king huogodoo. Di God dela i-di langi guu-hai goe gii-dagi nia henua, gu-gowadu gi-di-goe di mogobuna, nia mahi mo-di hagalabagau.

2:38  Mee guu-hai goe di tagi ni digau huogodoo ala e-noho i henuailala, mono manu dolodolo, mono manu mamaangi. Kooe dela go di libogo goolo deelaa.

2:39  I oo muli, tuai henua aamua ga-gila-aga labelaa, malaa, hagalee maaloo be tenua dela nogo king-iei goe, ga-nomuli ga-gila-aga di tolu henua, go tenua baalanga-mmee, dela gaa-dagi henuailala hagatau.

2:40  Nomuli togohaa henua aamua ga-gila-aga, dela e-maaloo gadoo be-di baalanga, ga-haga-mooho mo-di oho nia mee huogodoo. Go mee deelaa ga-hunahuna nia henua aamua ala nomua.

2:41  Goe gu-gidee labelaa bolo nia babaawae mono madaawae, hunu gowaa ne-hai gi-nia gelegele, hunu gowaa ne-hai gi-nia baalanga. Deenei dono hadinga bolo tenua aamua la-ga-duuduu i-gunga. Gei di-maa e-hai ono mahi baalanga i-golo, idimaa nia baalanga la-ne-unugi gi-nia gelegele.

2:42  Nia madaawae ala hunu gowaa e-baalanga, hunu gowaa e-gelegele, dono hadinga bolo hunu madagowaa e-maaloo hunu madagowaa e-paagege.

2:43  Goe gu-gidee labelaa bolo nia baalanga ne-unugi gi nia gelegele. Dono hadinga bolo nia dagi o tenua aamua deelaa e-haga-haga-hai-lodo nadau dama bolo gii-buni, gei digaula hagalee buni gadoo be nia baalanga ala e-deemee di-unugi gi-nia gelegele.

2:44  Di madagoaa hua o-nia king aalaa, gei di God di langi ga-haga-duu-aga dana henua mo dono King dela dono hagaodi ai, gei e-deemee di haga-magedaa. Tenua deelaa gaa-oho nia henua aamua huogodoo, gaa-noho i-golo gaa-hana-hua beelaa.

2:45  Goe gu-gidee labelaa di hadu dela ne-doo-iha i-di gowaa helemodu, ne-doo-iha hua i-deia, ga-nngenge i-di ada-dangada dela ne-hai gi-nia baalanga, baalanga-mmee, nia gelegele, silber mo goolo. Malaa, di God Aamua gu-haga-modongoohia-adu gi-di-goe nia mee ala gaa-hai maalia. Malaa deelaa, au guu-hagi-adu gi-di-goe dau midi la-hagatau mo dono hadinga.”

2:46  King Nebuchadnezzar gaa-bala-loo gi-lala-loo gi-hongo di gelegele mo-di hai bolo nia tigidaumaha mo nia kisakis gi-heia ang-gi Daniel.

2:47  Di king ga-helekai, “Doo God koia e-aamua i-hongo nia god huogodoo, gei go Tagi i-hongo nia king huogodoo. Go Mee dela e-haga-modongoohia nia mee ala e-nngala. Au gu-iloo di mee deenei, idimaa, goe dela guu-mee di-haga-modongoohia-aga di mee ngala deenei.”

2:48  Di king guu-wanga gi Daniel di lohongo aamua, ge guu-wanga gi mee nia wanga-dehuia humalia huoloo e-logowaahee, ge guu-hai a-mee gii-dagi nia guongo o Babylon hagatau, gei e-dagi labelaa digau hagamaamaa di king.

2:49  Di king guu-hai di hiihai o Daniel bolo Shadrach, Meshach mo Abednego e-dagi nia moomee o-di guongo go Babylon. Malaa, Daniel nogo dagi hua igolo i-lodo di hale di king.