Kapingamarangi - Daniel - 11

11:1  Ma go mee hua dela e-hagamaamaa mo-di abaaba au.

11:2  Dagu mee ga-hagi-adu dolomeenei le e-donu.” Tangada-di-langi ga-helekai, “Nia king dogodolu gaa-dagi Persia, nomuli togohaa king le e-maluagina i digaula huogodoo. Dono hai-mee gi-nia mogobuna dagi huogodoo, mee ga-hai-baahi gi tenua go Greece.

11:3  “Di king maaloo ga-gila-aga. Mee gaa-dagi ana henua e-logowaahee, gaa-hai di-ingoo-hua di-mee dela e-hiihai ginai.

11:4  Dono madagoaa e-hai-mee gi ono mogobuna huogodoo, tenua dagi o-maa ga-mooho gaa-hai nia baahi e-haa. Nnuai king ala hagalee nia hagadili ni mee gaa-pono di lohongo o-maa, ge hagalee maaloo be mee.

11:5  “Di king o Egypt la-ga-maaloo. Tagi-dauwa e-dahi o-maa ga-maaloo i-mee, gaa-dagi tenua damana.

11:6  I-muli hua hunu ngadau, di king o Egypt gaa-hai dana hagababa gi-di king o Syria, gaa-wanga dana dama-ahina e-lodo ginai mee. Di hagababa la-digi waalooloo. Di ahina, dono lodo, mo dana dama, mo ana gau hai-hegau ne-hula dalia di ahina deelaa, la-gu-daaligi huogodoo gii-mmade.

11:7  “Digi duai nomuli, tangada o-di ahina deelaa gaa-hai di king. Mee ga-heebagi gi digau-dauwa o-di king Syria, ga-ulu gi-lodo di abaaba digau-dauwa, ga-haga-magedaa digaula.

11:8  Mee gaa-kae nia ada o nadau god mo nia goolo mono silber ala ne-haga-ingoo gi-nia god aalaa gi Egypt. I-muli-hua hunu ngadau o-di noho di aumaalia,

11:9  di king o Syria belee heebagi gi Egypt, gei digi heebagi, guu-hana gi-muli.

11:10  “Nia dama-daane o-di king Syria ga-hagatogomaalia e-hai-tauwa, guu-hai nadau buini-dauwa damana. Di buini-dauwa e-dahi ga-hanadu be-di labagee, e-heebagi gi-di abaaba gau-dauwa o ono hagadaumee.

11:11  Di king o Egypt ga-hagawelewele huoloo, ga-heebagi gaa-kumi di buini-dauwa damana o Syria.

11:12  Mee ga-hagaamu ia i dono maaloo mo dana daaligi ana gau-dauwa dogologo, gei mee hagalee mamaaloo-hua beelaa.

11:13  “Di king o Syria gaa-hana gi-muli ga-hagabudu ana gau-dauwa mada-dogologo i ana gau i-mua. Di madagoaa ma-ga-dau-mai, gei mee ga-hanimoi mo ana gau-dauwa dogologo gu-togomaalia humalia.

11:14  Digau dogologo ga-hai-baahi gi-di king o Egypt. Digau llamu-dauwa mai do henua, go Daniel, ga-hai-baahi gi mee, idimaa digaula ne-mmada gi-di moe, gei digaula ga-haga-magedaa.

11:15  Di king o Syria ga-duuli di waahale dela gu-abaaba maaloo, gaa-kumi di-maa. Digau dauwa Egypt ga-hagalee heebagi, nadau gau-dauwa ala e-maaloo i digaula gu-nadau mahi ai.

11:16  Di king o Syria gaa-hai ana mee ala e-hiihai ginai ang-gi digaula, gei tangada e-hai-baahi gi mee ai. Mee gaa-duu i-lodo Tenua o-di Hagababa, ga-hai-henua gi-di-maa hagatau i-lala dono mogobuna.

11:17  “Di king o Syria gaa-hai ana hagamaanadu e-hai-hegau gi ana gau-dauwa huogodoo. Mee gaa-hai dana hagababa gi-di king Egypt, gaa-dugu-anga dana dama-ahina e-lodo ginai mee. Mee gaa-hai beenei belee oho tenua o dono hagadaumee, ge di hagamaanadu a-maa ga-hagalee gila.

11:18  Nomuli gei mee ga-heebagi gi-nia henua i-hongo di tai, gaa-kumi ana henua e-logo. Gei di tagi henua mai i-daha ga-haga-magedaa a-mee ga-hagalawa di hagamuamua o-maa. Mee gaa-huli di hagamuamua di king o Syria gii-hai di mee ni-aana e-hai.

11:19  Di king gaa-hana gi-muli gi dono henua donu, geia ga-haga-magedaa, ge deelaa go di hagalawa o dono mouli.

11:20  “Tuai king ga-gila-aga ga-hagau dana dangada oobidi e-hai nia daangada gi-dagitedi e-haga-menege-aga di maluagina o dono henua. I-lodo di madagoaa bodobodo, di king deelaa ga-daaligi gii-made, hagalee i-mua nia daangada be i-lodo tauwa.”

11:21  Tangada di-langi ga-duudagi-adu ana helekai, “Di king o Syria nomuli la tangada huaidu huoloo. Mee ono mogobuna belee hai di king ai, gei mee ga-hanimoi ge tangada ne-iloo ai, gaa-kae dono mogobuna dagi mai di halahalau dangada.

11:22  Di-ingoo-hua tangada be go tagi aamua hai-mee-dabu Dimaadua ma-ga-hai-baahi gi-mee le e-haga-mmaa gi-daha mo tenua.

11:23  Dana hai ana hagababa gi-nia henua ala i-golo, mee e-halahalau nnenua aalaa, ma e-aha maa mee e-dagi-hua dana henua dulii.

11:24  Mee ga-heebagi gi-nia guongo maluagina ge digi haga-iloo, e-hai nia mee hagalee nogo hai go ono maadua i-mua, gaa-duhe nia goloo ne-kumi i-lodo nia dauwa i ono ehoo. Mee ga-hagamaanadu belee heebagi gi nnenua gu-abaaba mau dangihi, ge dono madagoaa king la-gu-dee-dohu.

11:25  “Mee gaa-hai dana buini dauwa damana e-heebagi gi-di king o Egypt dela ga-hagatogomaalia dana buini damana maaloo e-heebagi. Gei di king o Egypt ga-halahalau ga-hagalee gila.

11:26  Ana gau hagamaamaa gaa-hai a-mee gi-huaidu. Nia gau-dauwa dogologo a-maa ga-daaligi gii-mmade, ge di buini dauwa a-maa ga-hagalee.

11:27  Nia king dogolua aalaa gaa-noho gi-lala i teebele e-dahi e-miami, gei nau hiihai la nia maanadu huaidu, gaa-hai nau kai dilikai i nau mehanga. Meemaa ga-hagalee kae nau mee ala e-hiihai ginai, idimaa di madagoaa e-kae-ai digi dau-mai.

11:28  Di king o Syria gaa-hana gi dono henua mo ana goloo ne-kumi, e-hagamaanadu maaloo bolo e-oho gi-daha taumaha o-nia daangada a God. Mee gaa-hai-anga ma ni-aha ala e-hiihai ginai, gaa-hana gi-muli gi dono henua.

11:29  “Nomuli-mai, gei mee ga-heebagi gi Egypt labelaa, tolongo-nei nia mee ga-kila-mai hai-gee.

11:30  Digau Rome ga-loomoi i nadau wagabaalii ga-hai-baahi gi-mee, gei mee ga-madagu. “Mee ga-hagawelewele huoloo, gaa-huli belee oho taumaha nia daangada a God. Mee ga-daudali nia helekai hagamaamaa digau ne-diiagi taumaha deelaa.

11:31  Hunu gau i ana gau-dauwa gaa-hai di Hale Daumaha gi-gulugulua ang-gi taumaha. Digaula gaa-dugu nia tigidaumaha o-nia laangi gi de-haihai, ga-haga-duu-aga di ada-mee huaidu haga-manawa-gee dangada.

11:32  Di king ga-wiini-mai nia hagamaamaa digau ala ne-diiagi nadau daumaha mai i ana halahalau dangada, ge digau ala e-manawa-dahi gi God ga-hai-baahi gi digaula.

11:33  Nia dagi kabemee o-nia daangada ga-dumaalia nadau kabemee gi digau dogologo. Di gowaa bodobodo hunu ginaadou gaa-mmade i tauwa be e-dudu gii-mmade, ge hunu gau e-gaiaa gaa-hai digau galabudi.

11:34  Di madagoaa tauwa nogo hai, gei nia daangada a God gaa-kae nadau hagamaamaa dulii, ma e-aha maa digau dogologo la-ne-madalia digaula anga-hua gi nadau hagahumalia.

11:35  Hunu dagi kabemee la-ga-daaligi gii-mmade. Mai di hai deenei, nia daangada la-ga-madammaa ang-gi taumaha. Di hai deenei e-haihai-hua beenei, gaa-dae-loo gi-di hagaodi, go di madagoaa dela ne-haganoho go God.

11:36  “Di king o Syria gaa-hai dana hai dela e-tene ginai. Mee ga-hagaamu ia gaa-hai bolo ia e-aamua i di-ingoo-hua di god, bolo ia i-hongo hogi di God Muginua. Mee gaa-mee di-hai beenei gaa-dae-loo gi dono hagaduadua go God. God gaa-hai-hua gii-hai be dana hai dela gu-hagamaanadu.

11:37  Di king ga-haga-de-iloo-ia di god nogo hai-hegau ginai ono maadua-mmaadua, mo-di god nia ahina nogo aloho-ai. Mee ga-haga-de-iloo nia god huogodoo, i mee e-maanadu bolo ia e-aamua i tei digaula.

11:38  Mee ga-haga-laamua-hua di god dela e-madamada humalia nia abaaba gowaa-dauwa. Mee gaa-wanga nia goolo, silber, nia hadu hagalaagei, mono wanga-dehuia maluagina gi-di god digi daumaha ginai ono maadua-mmaadua.

11:39  Mee ga-hai-hegau gi-nia daangada nogo daumaha gi-di god mai i-daha belee abaaba ana gowaa-dauwa. Mee ga-hagalaamua digau ala e-hai bolo ia di tagi, ga-haga-ngalua digaula i-nia moomee mugi-nua, gaa-wanga nadau gowaa.

11:40  “Di madagoaa hagamuliagina o-di king o Syria ma-ga-hoohoo-mai, di king o Egypt ga-heebagi gi-mee, gei di king o Syria ga-heebagi, e-hai-hegau gi-nia waga dauwa hongo henua, nia hoodo, mono wagabaalii e-logo. Mee gaa-kumi ana henua e-logo, e-hai be-nia wai o-di labagee.

11:41  Mee ga-heebagi hogi gi Tenua o-di Hagababa, ga-daaligi nia madangaholu mana, gei nia henua go Edom, Moab mo nia guongo e-dubu i Ammon gaa-llele gi-daha.

11:42  Mee ga-heebagi gi nnenua huogodoo, Egypt hogi hagalee dugu.

11:43  Mee gaa-kae nia goloo hagalabagau Egypt ala ne-hai gi-nia goolo mo silber, mo nia goloo hui-ngadaa ala i-golo. Mee gaa-kumi Libya mo Ethiopia.

11:44  Nia longo ala e-loomoi i-dua mo ngaaga gaa-hai a-mee gi-madagu, gei mee ga-heebagi giibeni ga-daaligi nia daangada dogologo.

11:45  Mee ga-haga-duu-aga hogi ono hale-laa llauehe i-mehanga di tai mo-di gonduu dela e-duu di Hale Daumaha nonua. Mee gaa-made, gei deai tangada e-hagamaamaa a-mee ai.”