SPVar - Deuteronomy - 8

8:1  כל המצוה אשר אנכי מצוך היום תשמרון לעשות למען תחיון ורביתם ובאתם וירשתם את הארץ אשר נשבע יהוה לאבתיכם

8:2  וזכרת את כל הדרך אשר הוליכך יהוה אלהיך זה ארבעים שנה במדבר למען ענותך לנסותך לדעת אשר בלבבך התשמר מצותיו אם לא

8:3  ויענך וירעבך ויאכלך את המן אשר לא ידעת ולא ידעו אבתיך למען הודיעך כי לא על הלחם לבדו יחיה האדם כי על כל מוצא פי יהוה יחיה האדם

8:4  שמלתך לא בלתה מעליך ורגליך לא בצקה זה ארבעים שנה

8:5  וידעת עם לבבך כי כאשר ייסר איש את בנו יהוה אלהיך מיסרך

8:6  ושמרת את מצות יהוה אלהיך ללכת בדרכיו וליראה אתו

8:7  כי יהוה אלהיך מביאך אל ארץ טובה ורחבה ארץ נחלי מים עינות תהומת יצאים בבקעה ובהר

8:8  ארץ חטה ושערה גפן תאנה ורמון ארץ זית שמן ודבש

8:9  ארץ אשר לא במסכנת תאכל בה לחם לא תחסר כל בה ארץ אשר אבניה ברזל ומהרריה תחצב נחשת

8:10  ואכלת ושבעת וברכת את יהוה אלהיך על הארץ הטובה אשר נתן לך

8:11  השמר לך פן תשכח את יהוה אלהיך לבלתי שמר מצותיו ומשפטיו וחקתיו אשר אנכי מצוך היום

8:12  פן תאכל ושבעת ובתים טובים תבנה וישבת

8:13  ובקרך וצאנך ירבון וכסף וזהב ירבה לך וכל אשר לך ירבה

8:14  ורם לבבך ושכחת את יהוה אלהיך המוציאך מארץ מצרים מבית עבדים

8:15  המוליכך במדבר הגדול והנורא נחש שרוף עקרב וצמאון אשר אין מים המוצא לך מים מצור החלמיש

8:16  המאכילך מן במדבר אשר לא ידעו אבתיך ולמען ענותך ולמען נסותך להיטבך באחריתך

8:17  ואמרת בלבבך כחי ועצם ידי עשה לי את החיל הזה

8:18  וזכרת את יהוה אלהיך כי הוא הנתן לך כח לעשות חיל ולמען הקים את בריתו אשר נשבע לאבתיך לאברהם ליצחק וליעקב כיום הזה

8:19  והיה אם שכח תשכח את יהוה אלהיך והלכת אחרי אלהים אחרים ועבדתם והשתחוית להם העדתי בכם היום כי אבד תאבדון

8:20  כגוים אשר יהוה מאבד מפניכם כן תאבדון עקב לא תשמעון בקול יהוה אלהיכם