Site uses cookies to provide basic functionality.

OK
ECCLESIASTES
1 2 3 4 5 6 7 8 9 10 11 12
Prev Up Next
Chapter 3
Eccl Kekchi 3:1  Cuan li ho̱nal nak nacˈulman chixjunil li cˈaˈak re ru saˈ li ruchichˈochˈ aˈin.
Eccl Kekchi 3:2  Cuan li ho̱nal re li yoˈla̱c ut cuan li ho̱nal re li ca̱mc. Cuan xkˈehil li a̱uc, ut cuan ajcuiˈ xcutanquil lix michˈbal li a̱ubil.
Eccl Kekchi 3:3  Cuan li ho̱nal re camsi̱nc ut cuan li ho̱nal re banoc. Cuan xcutanquil li sachoc, ut cuan ajcuiˈ xcutanquil xcuaclesinquil cuiˈchic li ac tˈanenak.
Eccl Kekchi 3:4  Cuan li ho̱nal re ya̱bac, ut cuan li ho̱nal re seˈec. Cuan li ho̱nal re rahil chˈo̱lej, ut cuan xcutanquil li ninkˈei̱c.
Eccl Kekchi 3:5  Cuan xcutanquil li paji̱nc pec, ut cuan xcutanquil re xchˈutubanquil li pec. Cuan li ho̱nal nak naru tixkˈalu rib li junju̱nk, ut cuan ajcuiˈ li ho̱nal nak incˈaˈ naru naxkˈalu rib li junju̱nk.
Eccl Kekchi 3:6  Cuan xcutanquil li sicˈoc, ut cuan li ho̱nal re sachoc. Cuan li ho̱nal re xococ, ut cuan li ho̱nal re tzˈekoc.
Eccl Kekchi 3:7  Cuan li ho̱nal re pejoc tˈicr, ut cuan li ho̱nal re xiti̱nc. Cuan li ho̱nal re a̱tinac, ut cuan li ho̱nal nak incˈaˈ naru a̱tinac.
Eccl Kekchi 3:8  Cuan li ho̱nal re rahoc, ut cuan li ho̱nal re tzˈekta̱na̱nc. Cuan xcutanquil li pletic riqˈuin junak tenamit, ut cuan xcutanquil li cua̱nc saˈ usilal riqˈuin junak tenamit.
Eccl Kekchi 3:9  ¿Ma cuan ta biˈ cˈaˈru naxra li cui̱nk nak naxcamsi rib chi cˈanjelac?
Eccl Kekchi 3:10  La̱in xinqˈue retal nak kˈaxal cau li cˈanjel li quixqˈue li Dios saˈ xbe̱neb li cui̱nk re teˈxba̱nu.
Eccl Kekchi 3:11  Li Dios naxyi̱b chixjunil chi cha̱bil saˈ xkˈehil joˈ naraj aˈan. Xqˈue saˈ li kachˈo̱l xra̱bal ru xnaubal li cˈaˈru ta̱cˈulma̱nk. Abanan incˈaˈ nakatau ru chixjunil li cˈaˈru quixba̱nu chak li Dios saˈ xticlajic toj chalen saˈ rosoˈjic.
Eccl Kekchi 3:12  La̱in ninnau nak li cˈaˈru us tixba̱nu li cui̱nk, aˈan nak ta̱sahokˈ saˈ xchˈo̱l ut tixba̱nu li us nak toj cua̱nk saˈ ruchichˈochˈ.
Eccl Kekchi 3:13  Ut ninnau ajcuiˈ nak yal kama̱tan xban li Dios nak nococuaˈac ut noco-ucˈac ut nakayal xsahil li cˈaˈru nakacˈanjela.
Eccl Kekchi 3:14  Ut ninqˈue ajcuiˈ retal nak chixjunil li naxba̱nu li Dios ta̱cua̱nk chi junelic. Chixjunil li cˈaˈru quixba̱nu incˈaˈ naru xqˈuebal xtzˈakob chi moco naru xjepbal. Li Dios quixba̱nu chi joˈcaˈin re nak chixjunileb teˈxxucua ru.
Eccl Kekchi 3:15  Ma̱cˈaˈ ta̱cˈulma̱nk chi incˈaˈ ta ac xcˈulman junxil. Ma̱cˈaˈ cˈaˈru cuan chi incˈaˈ ta ac cuan ajcuiˈ chak junxil. Li Dios naba̱nun re, nak nacˈulman chi joˈcaˈin.
Eccl Kekchi 3:16  La̱in ninqˈue retal nak saˈ ruchichˈochˈ junes raylal ut ma̱usilal nequeˈxba̱nu saˈ eb li naˈajej li nequeˈrakoc cuiˈ a̱tin. Aran raj nequeˈrakoc a̱tin saˈ ti̱quilal.
Eccl Kekchi 3:17  Joˈcan nak quinye saˈ inchˈo̱l: —Li ani ti̱c xchˈo̱l ta̱rakekˈ a̱tin saˈ xbe̱n xban li Dios, ut ta̱rakekˈ ajcuiˈ a̱tin saˈ xbe̱n li naxba̱nu ma̱usilal xban nak ac xakabanbil li ho̱nal aˈan xban li Dios nak ta̱rakekˈ a̱tin saˈ kabe̱n riqˈuin li cˈaˈru nakaba̱nu ut riqˈuin li cˈaˈru nakacˈul.—
Eccl Kekchi 3:18  Quinye ajcuiˈ saˈ inchˈo̱l: —Li Dios yo̱ chixba̱nunquil reheb chi joˈcan yal re xyalbal rixeb ut re ajcuiˈ xcˈutbal chiruheb nak chanchaneb li xul.—
Eccl Kekchi 3:19  Relic chi ya̱l nak eb li cui̱nk ut eb li xul juntakˈe̱t nequeˈxcˈul. Li xul nacam. Joˈcaneb ajcuiˈ eb li cristian nequeˈcam. Junaj ajcuiˈ li ikˈ naxmusikˈa li xul riqˈuineb li cristian. Moco kˈaxal ta us li cui̱nk chiru li xul xban nak chixjunil li cuan saˈ ruchichˈochˈ ma̱cˈaˈ na-oc cuiˈ.
Eccl Kekchi 3:20  Nak nequeˈcam li xul nequeˈsukˈi chˈochˈ. Joˈcan ajcuiˈ li cristian. Nak nequeˈcam nequeˈsukˈi chˈochˈ. Chˈochˈ oquenakeb ut nak teˈca̱mk, nequeˈsukˈi cuiˈchic chˈochˈ.
Eccl Kekchi 3:21  ¿Ma cuan ta biˈ junak nanaˈoc re chi tzˈakal nak lix musikˈeb li cristian nequeˈxic saˈ choxa ut lix musikˈ li xul nequeˈosoˈ rubel chˈochˈ?
Eccl Kekchi 3:22  Riqˈuin aˈin ninqˈue retal nak li us tixba̱nu li cui̱nk, aˈan nak ta̱sahokˈ saˈ xchˈo̱l riqˈuin lix cˈanjel xban nak aˈan li tento tixba̱nu. Ut ma̱ ani ta̱ru̱k ta̱cˈamok chak re chi rilbal li cˈaˈru ta̱cˈulma̱nk mokon xban nak ac camenak chic.