Kapingamarangi - Ephesians - 3

3:1  Deenei tadinga, au go Paul tangada galabudi a Jesus Christ idimaa go goodou digau tuadimee, e-dalodalo gi God.

3:2  Goodou gu-longono bolo God i dono dumaalia ne-dugu-mai tegau deenei bolo gi-heia e-hagahumalia goodou.

3:3  God gu-haga-gila-aga dana hagamaanadu hagammuni gi-di-au. (Gei-au ne-hihi-hua haga-bodobodo di mee deenei,

3:4  gei maa goodou gaa-dau agu mee ala ne-hihi, goodou ga-iloo laa dogu modongoohia di hagamaanadu hagammuni o Christ.)

3:5  I-lodo di madagoaa gu-doo gi-daha, gei nia daangada digi iloo di hagamaanadu hagammuni deenei, gei God gu-haga-gida di-maa dolomeenei, mai i-di Hagataalunga ang-gi ana gau agoago-hagau haga-madagu mo ana soukohp.

3:6  Malaa, deenei di hagamaanadu hagammuni a God: mai di Longo-Humalia, digau tuadimee mo digau o Jew gu-hai-mee ngaadahi gi-nia maluagina o God, guu-hai nia manga o tuaidina hua-e-dahi, gu-hai-mee ngaadahi gi-di hagababa a God ne-hai mai i Jesus Christ.

3:7  Au ne-hai tangada hai-hegau ni-di Longo-Humalia mai di wanga-dehuia a God dela ne-gaamai i ono mogobuna.

3:8  Au tangada i-bahi-i-lala tangada dela mugi-lala-loo nia daangada a God, malaa, God gu-gaamai gi-di-au di madagoaa humalia, e-kae di Longo-Humalia o-di maluagina dee-odi o Christ ang-gi digau tuadimee,

3:9  gei e-hai digau huogodoo gi-gidee-ginaadou di hagamaanadu hagammuni a God dela gu-haga-hai-hegau. God dela ne-hai nia mee huogodoo, nogo benebene dana hagamaanadu hagammuni mai-loo i-mua,

3:10  bolo i-di madagoaa dolomeenei, mai di nohongo-dabu, nia dagi o digau di-langi mo nia mogobuna tenua o-di langi gi-kabee dono iloo i-nia hagadilinga ala.

3:11  God ne-hai di mee deenei bolo gii-tau gi dana hadinga dee-odi dela ne-hagahonu koia mai Jesus Christ go tadau Dagi.

3:12  I tadau buni-anga gi Christ mo tadau hagadonu a-Mee, gidaadou gu-maaloo di hula laa-mua o God i-di hagadagadagagee.

3:13  Au e-dangi-adu gi goodou, bolo goodou hudee madugia i-di-au dela e-hagaduadua i godou gili. Nia mee huogodoo aanei la nia hagahumalia ni goodou.

3:14  I tadinga deenei, au e-dogoduli i-mua Tamana,

3:15  go Mee dela ne-wanga nia ingoo donu o-nia madahaanau huogodoo ala i-di langi mo henuailala.

3:16  Au e-dangi ang-gi God mai di maluagina o-ono madamada gi-gowadu nia mahi, mai i dono Hagataalunga, e-hagamaaloo-aga godou lodo.

3:17  Au e-dalodalo bolo Christ gii-noho i godou lodo mai godou hagadonu. Au e-dalodalo bolo goodou gi-hagamau mai di aloho.

3:18  Gei goodou ngaadahi mo nia daangada a God huogodoo gi-kae-ina di mogobuna maaloo di-iloo di-palaha, looloo, tuuduu, mo-di llala o-di aloho o Christ.

3:19  Uaa, goodou gi-iloo di aloho o-Christ, ma e-aha maa gidaadou e-deemee di-iloo di-maa hagatau. Gei goodou gaa-honu laa i-di hagahonu o God.

3:20  Hagaamuina a God i ono mogobuna e-ngalua i tadau lodo, e-mee di-hagagila nia mee laa-hongo tadau mee ala e-mee di-tangi ge hagamaanadu-ai.

3:21  Di madamada dela i-lodo di nohongo-dabu mo lodo Jesus Christ gi-heia ang-gi God i-nia madagoaa huogodoo, gaa-hana-hua beelaa! Amen.