Azeri - Ezekiel - 43

43:1  او آدام منی شرقه باخان دروازانين يانينا گتئردي.

43:2  من گؤردوم کي، شرق يولوندان ائسرايئل تاريسينين عئزّتي گلئر. اونون سَسي گور آخان سولارين سَسي کئمي ائدي، عئزّتئندن يِر پاريلداييردي.

43:3  گؤردويوم رؤيا او گؤرونتويه بَنزه‌يئردي کي، تاري، شهري محو اتمه‌يه گلدئيي واخت گؤرموشدوم؛ کِبار چايي قيراغيندا گؤردويوم گؤرونتو کئمي. من بو زامان اوزو اوسته يِره ييخيلديم.

43:4  ربّئن عئزّتي شرقه باخان دروازانين يولوندان معبده گئردي.

43:5  روح منی قالديريب ائچَري حيطه گتئردي. من گؤردوم کي، ربّئن عئزّتي معبدي دولدوروب.

43:6  آدام يانيمدا دورارکَن معبددن بئر نفرئن سَسئني اشئتدئم کي، منئمله دانيشيردي.

43:7  او منه بله ددي: «ای بشر اوغلو، تَختئمئن يِري، آياقلاريمين دابانلاري دَيَن، ائسرايئل اؤولادلاري آراسيندا ابدی ياشاياجاغيم يِر بورادير. بوندان سونرا ائسرايئل خالقي ائله پادشاهلاري فاحئشه‌لئکلري ائنَن، اؤلَن پادشاهلارين جَسَدلري ائله بئر داها موقدّس آديمي نجئسله‌مَيه‌جکلر.

43:8  اونلار آستانالاريني آستاناما، قاپيلارينين يان تاختالاريني قاپيمين يان تاختالارينا بئتئشدئردئلر. منئمله اونلارين آراسيندا فقط بئر دووار وار ائدي. اتدئکلري نجئس ائشلري ائله موقدّس آديمي نجئسله‌دئلر. من ده قضبئم ائله اونلاري قيريب تؤکدوم.

43:9  ائندي قوي زئنالاريني، پادشاهلارينين جَسَدلرئني مندن اوزاقلاشديرسينلار، من ده ابده‌جک اونلارين آراسيندا ياشايارام.

43:10  سن، ای بشر اوغلو، بو معبدي ائسرايئل نسلئنه توصئف ات کي، تقصئرلرئندن اوتانسينلار و معبدئن نَقشه‌سئني اؤلچسونلر.

43:11  اگر اتدئکلري بوتون ائشلردن اوتانيرلار، معبدئن شَکلئني، نئظاميني، چئخيش-گئرئش يِرلرئنئ–بوتون شکئل‌لرئني، بوتون قايدالاريني، قورولوشلاريني و قانونلاريني اونلارا بئلدئر. اونلارين گؤزو قاباغيندا بونلاري بئر يِره ياز. قوي بوتون قورولوش و قايدالارينا عمل ادئب اونلاري يرئنه يتئرسئنلر.

43:12  معبدئن قانوني بودور: داغين باشيندا هر طرفدن اونون بوتون اَراضئسي چوخ موقدّس اولاجاق. بلی، معبدئن قانوني بودور.

43:13  قوربانگاهين قول‌آچينان اؤلچولري بله‌دئر. هر قولاچا بئر اوووج علاوه ادئلمئشدئر: قوربانگاهي اَحاطه‌يه آلان خَنده‌يئن درئنلئيي بئر قول‌آچ، اِني بئر قول‌آچ، اطرافينداکي چيخينتي بئر قاريش اولاجاق. قوربانگاهين بويو دا بله‌دئر:

43:14  قوربانگاهين يرده‌کي خَندَقدن آلت چيخينتييا قدرکي حئصّه‌سئنئن بويي ائکي قول‌آچ، اِني بئر قول‌آچ، کئچئک چيخينتيدان بؤيوک چيخينتييا قدرکي حئصّه‌نئن بويي دؤرد قول‌آچ، اِني بئر قول‌آچ،

43:15  قوربانگاهين قوربان يانديريلان اوست حئصّه‌سئنئن بويي دؤرد قول‌آچ اولاجاق. اوست حئصّه‌دن يوخارييا طرف دؤرد بوينوز اوزاناجاق.

43:16  قوربانگاهين اوست حئصّه‌سي دؤردبوجاقلي شَکلئنده اولاجاق. اونون اوزونلوغو اون ائکي، اِني اون ائکي قول‌آچ اولاجاق.

43:17  اوست چيخينتينين دؤرد طرفدن اوزونلوغو و اِني هر بئري اون دؤرد قول‌آچ اولاجاق. اطرافينداکي کنار ياريم قول‌آچ، خَنده‌يئن دؤوره‌سي بئر قول‌آچ اولاجاق. قوربانگاهين پئلّه‌کَنلري شرقه باخاجاق.»

43:18  او آدام منه ددي: «ای بشر اوغلو، پروردئگار رب بله ديئر: "قوربانگاه تئکئله‌جَيي گون، اوستونده يانديرما قوربانلاري گتئرمَک و قان تؤکمَک باره‌ده اولان قايدالار بله‌دئر.

43:19  منه خئدمت اتمک اوچون حوضوروما چيخان، صادوق نسلئندن لاوئلي کاهئنلره گوناه قورباني اولاراق جاوان بئر گاميش ور" پروردئگار رب بله بويورور.

43:20  "گاميشين قانيندان گؤتوروب قوربانگاهين دؤرد بوينوزونا، اوست چيخينتينين دؤرد کونجونه و اطرافينداکي کنارين اوستونه سورت. بلجه قوربانگاهي تمئز ادئب اونون اوچون کفّاره ات.

43:21  گوناه قورباني اولاراق گاميشي گؤتوروب موقدّس مکاندان کناردا، معبدئن تعيئن ادئلمئش يِرئنده ياندير.

43:22  ائکئنجي گون گوناه قورباني اولاراق قوصورسوز بئر اِرکَک کِچي تقدئم ات. قوربانگاه گاميشين قاني ائله تمئز ادئلدئيي کئمي کِچئنئن قاني ائله ده تمئز ادئلسئن.

43:23  پاک اتمک ائشئني قورتاراندان سونرا قوصورسوز جاوان بئر گاميش ائله سورودن قوصورسوز بئر قوچ قوربان گتئر.

43:24  اونلاري ربّئن حوضورونا گتئر. کاهئنلر اونلارين اوستونه دوز سَپئب ربّه يانديرما قورباني اولاراق تقدئم اتسئن.

43:25  يدّي گونون گوناه قورباني اولاراق، هر گون بئر اِرکَک کِچي حاضيرلا. قوصورسوز جاوان بئر گاميشينان سورودن بئر قوچ دا حاضيرلانسين.

43:26  قوي يدّي گون قوربانگاه اوچون کفّاره اتسئنلر، اونو تمئز ادئب تقدئس اتسئنلر.

43:27  يدّي گون تاماملانان سونرا، کاهئنلر سکّئزئنجي گون و اوندان سونرا يانديرما و باريش قوربانلاريزي قوربانگاهين اوستونده تقدئم اتسئنلر. او زامان سئزدن راضي اولاجاغام." پروردئگار رب بويورور.»