SPVar - Genesis - 4

4:1  והאדם ידע את חוה אשתו ותהר ותלד את קין ותאמר קניתי איש את יהוה

4:2  ותסף ללדת את אחיו את הבל ויהי הבל רעה צאן וקין היה עבד אדמה

4:3  ויהי מקץ ימים ויבא קין מפרי האדמה מנחה ליהוה

4:4  והבל הביא גם הוא מבכרות צאנו ומחלביהן וישע יהוה אל הבל ואל מנחתו

4:5  ואל קין ואל מנחתו לא שעה ויחר לקין מאד ויפלו פניו

4:6  ויאמר יהוה אל קין למה חרה לך ולמה נפלו פניך

4:7  הלוא אם תטיב שאת ואם לא תטיב לפתח חטאת רבץ ואליך תשוקתו ואתה תמשל בו

4:8  ויאמר קין אל הבל אחיו נלכה השדה ויהי בהיותם בשדה ויקם קין אל הבל אחיו ויהרגהו

4:9  ויאמר יהוה אל קין איה הבל אחיך ויאמר לא ידעתי השמר אחי אנכי

4:10  ויאמר מה עשית קול דם אחיך צעק אלי מן האדמה

4:11  ועתה ארור אתה מן האדמה אשר פצתה את פיה לקחת את דם אחיך מידך

4:12  כי תעבד את האדמה לא תוסף תת כחה לך נע ונד תהיה בארץ

4:13  ויאמר קין אל יהוה גדול עוני מנשא

4:14  הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני

4:15  ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו

4:16  ויצא קין מלפני יהוה וישב בארץ נד קדמת עדן

4:17  וידע קין את אשתו ותהר ותלד את חנוך ויהי בנה עיר ויקרא את שם העיר כשם בנו חנוך

4:18  ויולד לחנוך את עירד ועירד ילד את מחיאל ומחיאל ילד את מתושאל ומתושאל ילד את למך

4:19  ויקח לו למך שתי נשים שם האחת עדה ושם השנית צלה

4:20  ותלד עדה את יבל הוא היה אבי ישב אהל ומקנה

4:21  ושם אחיו יובל הוא היה אבי כל תפש כנר ועגב

4:22  וצלה גם היא ילדה את תובל קין לטש כל חרש נחשת וברזל ואחות תובל קין נעמה

4:23  ויאמר למך לנשיו עדה וצלה שמען קולי נשי למך האזינה אמרתי כי איש הרגתי לפצעי וילד לחברתי

4:24  כי שבעתים יקם קין ולמך שבעים ושבעה

4:25  וידע אדם עוד את אשתו ותלד בן ויקרא את שמו שת כי שת לי אלהים זרע אחר תחת הבל כי הרגו קין

4:26  ולשת גם הוא ילד בן ויקרא את שמו אנוש אז החל לקרא בשם יהוה