SPVar - Genesis - 32

32:1  וישכם לבן בבקר וינשק לבניו ולבנתיו ויברך אתם וילך וישב לבן למקומו

32:2  ויעקב הלך לדרכו ויפגעו בו מלאכי אלהים

32:3  ויאמר יעקב כאשר ראם מחנה אלהים זה ויקרא שם המקום ההוא מחנים

32:4  וישלח יעקב מלאכים לפניו אל עשו אחיו ארץ שעיר שדה אדום

32:5  ויצו אתם לאמר כה תאמרון לאדני לעשו כה אמר עבדך יעקב עם לבן גרתי ואחר עד עתה

32:6  ויהי לי שור וחמור וצאן ועבד ושפחה ואשלחה להגיד לאדני למצא חן בעיניך

32:7  וישבו המלאכים אל יעקב לאמר באנו אל אחיך אל עשו וגם הלך לקראתך וארבע מאות איש עמו

32:8  ויירא יעקב מאד ויצר לו ויחץ את העם אשר אתו ואת הצאן ואת הבקר והגמלים לשני מחנות

32:9  ויאמר אם יבוא עשו אל המחנה האחד והכהו והיה המחנה הנשאר לפלטה

32:10  ויאמר יעקב אלהי אבי אברהם ואלהי אבי יצחק יהוה האמר אלי שוב ארצך ואל מולדתך ואיטיב עמך

32:11  קטנתי מכל החסדים ומכל האמת אשר עשית את עבדך כי במקלי עברתי את הירדן הזה ועתה הייתי לשני מחנות

32:12  הצילני נא מיד אחי מיד עשו כי ירא אנכי אתו פן יבוא והכני האם על הבנים

32:13  ואתה אמרת היטב איטיב עמך ושמתי את זרעך כחול הים אשר לא יספר מרב

32:14  וילן שם בלילה ההוא ויקח מן הבא בידו מנחה לעשו אחיו

32:15  עזים מאתים ותישים עשרים רחלים מאתים ואילים עשרים

32:16  גמלים מינקות ובניהם שלשים פרות ארבעים ופרים עשרה אתנות עשרים ועירים עשרה

32:17  ויתן ביד עבדיו עדר עדר לבדו ויאמר אל עבדיו עברו לפני ורוח תשימו בין עדר ובין עדר

32:18  ויצו את הראישון לאמר כי יפגשך עשו אחי ושאלך לאמר למי אתה ואנה תלך ולמי אלה לפניך

32:19  ואמרת לעבדך ליעקב מנחה היא שלוחה לאדני לעשו והנה גם הוא אחרינו

32:20  ויצו גם את השני וגם את השלישי וגם את כל ההלכים אחרי העדרים לאמר כדבר הזה תדברון אל עשו במצאכם אתו

32:21  ואמרתם גם הנה עבדך יעקב בא אחרינו כי אמר אכפרה פניו במנחה ההלכת לפני ואחרי כן אראה פניו אולי ישא פני

32:22  ותעבר המנחה על פניו והוא לן בלילה ההוא במחנה

32:23  ויקם בלילה ההוא ויקח את שתי נשיו ואת שתי שפחתיו ואת אחד עשר ילדיו ויעבר את מעבר היבק

32:24  ויקחם ויעברם את הנחל ויעבר את כל אשר לו

32:25  ויותר יעקב לבדו ויאבק איש עמו עד עלות השחר

32:26  וירא כי לא יכל לו ויגע בכף ירכו ותקע כף ירך יעקב בהאבקו עמו

32:27  ויאמר שלחני כי עלה השחר ויאמר לא אשלחך כי אם ברכתני

32:28  ויאמר אליו מה שמך ויאמר יעקב

32:29  ויאמר לא יעקב יאמר עוד שמך כי אם ישראל כי שרית עם אלהים ועם אנשים ותוכל

32:30  וישאל יעקב ויאמר הגידה נא שמך ויאמר למה זה תשאל לשמי ויברך אתו שם

32:31  ויקרא יעקב שם המקום פנואל כי ראיתי אלהים פנים אל פנים ותנצל נפשי

32:32  ויזרח לו השמש כאשר עבר את פנואל והוא צולע על ירכו

32:33  על כן לא יאכלו בני ישראל את גיד הנשא אשר על כף הירך עד היום הזה כי נגע בכף ירך יעקב בגיד הנשא