CopSahBible2 - I Samuel - 6

6:1  ⲧⲕⲟⲓⲃⲱⲧⲟⲥ ⲇⲉ ⲛⲉⲥϩⲛⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲛⲥⲁϣϥ ⲛⲉⲃⲟⲧ ⲁⲩⲱ ⲡⲉⲩⲕⲁϩ ⲁϥⲙⲓⲥⲉ ⲉϩⲣⲁⲓ ⲛϩⲉⲛⲡⲓⲛ

6:2  ⲛⲁⲗⲗⲟⲫⲩⲗⲟⲥ ⲇⲉ ⲁⲩⲙⲟⲩⲧⲉ ⲉⲛⲉⲩⲟⲩⲏⲏⲃ ⲙⲛ ⲛⲉⲩⲣⲉϥϣⲓⲛⲉ ⲁⲩⲱ ⲛⲉⲩⲣⲉϥⲙⲟⲩⲧⲉ ⲉⲩϫⲱ ⲙⲙⲟⲥ ϫⲉ ⲟⲩ ⲡⲉⲧⲉⲛⲛⲁⲁⲁϥ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲧⲟⲩⲛⲉⲓⲁⲧⲛ ⲉⲃⲟⲗ ϫⲉ ⲉⲛⲛⲁϫⲟⲟⲩⲥ ⲉϩⲣⲁⲓ ⲉⲡⲉⲥⲙⲁ ϩⲛ ⲟⲩ

6:3  ⲡⲉϫⲁⲩ ⲛⲁⲩ ϫⲉ ⲉϣϫⲉ ⲧⲉⲧⲛⲛⲁϫⲟⲟⲩ ⲛⲧⲱⲧⲛ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲡⲛⲟⲩⲧⲉ ⲙⲡ ⲙⲡⲉⲣϫⲟⲟⲩⲥ ⲉⲃⲟⲗ ⲉⲥϣⲟⲩⲉⲓⲧ ⲁⲗⲗⲁ ϩⲛ ⲟⲩϯ ϯ ⲛⲁⲥ ⲙⲡⲧⲱϣ ⲛⲧⲃⲁⲥⲁⲛⲟⲥ ⲁⲩⲱ ⲧⲉⲧⲛⲛⲁⲙⲧⲟⲛ ⲛⲧⲉⲡϫⲟⲉⲓⲥ ⲕⲱ ⲛⲏⲧⲛ ⲉⲃⲟⲗ ⲉϣⲱⲡⲉ ⲙⲙⲟⲛ ⲛⲧϭⲓϫ ⲙⲡϫⲟⲉⲓⲥ ⲛⲁⲗⲟ ⲁⲛ ϩⲓϫⲱⲧⲛ

6:4  ⲡⲉϫⲁⲩ ⲛⲁⲩ ϫⲉ ⲟⲩ ⲡⲉ ⲡⲧⲱϣ ⲛⲧⲃⲁⲥⲁⲛⲟⲥ ⲉⲧⲉⲛⲛⲁⲧⲁⲁϥ ⲛⲁⲥ ⲡⲉϫⲉⲛⲣⲉϥϣⲓⲛⲉ ⲛⲁⲩ ϫⲉ ⲕⲁⲧⲁ ⲧⲏⲡⲉ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ϯ ⲛⲁⲥ ⲛϯⲟⲩ ⲙⲙⲁ ⲛⲉϩⲙⲟⲟⲥ ⲛⲛⲟⲩⲃ ϫⲉ ⲁⲩⲛⲟⲃⲉ ϣⲱⲡⲉ ⲛϩⲏⲧⲧⲏⲩⲧⲛ ⲙⲛ ⲛⲉⲧⲛⲁⲣⲭⲱⲛ ⲙⲛ ⲡⲕⲉⲗⲁⲟⲥ

6:5  ⲁⲩⲱ ϩⲛⲕⲉⲡⲓⲛ ⲛⲛⲟⲩⲃ ⲛⲧⲉⲧⲛⲧⲁⲙⲓⲟⲟⲩ ⲕⲁⲧⲁ ⲡⲓⲛⲉ ⲛⲛⲉⲡⲓⲛ ⲛⲁⲓ ⲉⲧⲧⲁⲕⲟ ⲙⲡⲉⲧⲛⲕⲁϩ ⲛⲧⲉⲧⲛϯⲉⲟⲟⲩ ⲙⲡϫⲟⲉⲓⲥ ϫⲉⲕⲁⲥ ⲉϥⲉϥⲓ ⲛⲧⲉϥϭⲓϫ ⲉⲃⲟⲗ ϩⲓϫⲱⲧⲛ ⲁⲩⲱ ⲉⲃⲟⲗ ϩⲓϫⲛ ⲡⲉⲧⲛⲛⲟⲩⲧⲉ ⲁⲩⲱ ⲉⲃⲟⲗ ϩⲓϫⲛ ⲡⲉⲧⲛⲕⲁϩ

6:6  ⲁⲩⲱ ⲉⲧⲃⲉ ⲟⲩ ⲁⲧⲉⲧⲛϯⲉⲛϣⲟⲧ ⲛⲛⲉⲧⲛϩⲏⲧ ⲛⲑⲉ ⲛⲧⲁⲫⲁⲣⲁⲱ ⲙⲛ ⲛⲉⲣⲙⲛⲕⲏⲙⲉ ϯⲉⲛϣⲟⲧ ⲛⲛⲉⲩϩⲏⲧ ⲙⲏ ⲛⲧⲉⲣⲉϥⲑⲙⲕⲟⲟⲩ ⲙⲡⲟⲩⲕⲱ ⲉⲃⲟⲗ ⲛⲛϣⲏⲣⲉ ⲙⲡ ⲁⲩⲃⲱⲕ

6:7  ⲧⲉⲛⲟⲩ ϭⲉ ⲛⲧⲱⲧⲛ ϫⲓ ⲛⲧⲉⲧⲛⲧⲁⲙⲓⲟ ⲛⲟⲩⲁϭⲟⲗⲧⲉ ⲛⲃⲣⲣⲉ ⲁⲩⲱ ⲉϩⲉ ⲥⲛⲧⲉ ⲛϣⲁⲙⲓⲥⲉ ⲁϫⲛ ⲛⲉⲩϣⲏⲣⲉ ⲛⲧⲉⲧⲛⲛⲟⲩϩϥ ⲛⲛⲁϩⲟⲟⲩ ⲉⲧⲁϭⲟⲗⲧⲉ ⲛⲉⲩϣⲏⲣⲉ ⲇⲉ ⲛⲧⲉⲧⲛⲟⲩⲁⲁⲧⲟⲩ ⲉϩⲣⲁⲓ ⲉⲛⲉⲩⲙⲁ

6:8  ⲁⲩⲱ ⲛⲧⲉⲧⲛϫⲓ ⲛⲧⲕⲟⲓⲃⲱⲧⲟⲥ ⲛⲧⲉⲧⲛⲧⲁⲗⲟⲥ ⲉϩⲣⲁⲓ ⲉϫⲛ ⲧⲁϭⲟⲗⲧⲉ ⲁⲩⲱ ⲛⲉⲥⲕⲉⲩⲏ ⲛⲛⲟⲩⲃ ⲉⲧⲉⲧⲛⲛⲁⲧⲁⲁⲩ ⲛⲁⲥ ϩⲁ ⲧⲃⲁⲥⲁⲛⲟⲥ ⲉⲧⲉⲧⲛⲛⲉⲕⲁⲁⲩ ⲛⲥⲁ ⲟⲩⲥⲁ ⲛⲑⲏⲕⲉ ⲛⲧⲁϭⲟⲗⲧⲉ ⲛⲧⲉⲧⲛϫⲟⲟⲩⲥ ⲉⲃⲟⲗ ⲉⲧⲉⲧⲛϫⲱⲣⲙ ⲙⲙⲟⲥ ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲥ

6:9  ⲛⲧⲉⲧⲛϯϩⲧⲏⲧⲛ ⲉⲡⲉⲥⲙⲟⲉⲓⲧ ⲉⲥⲛⲁⲧⲁⲁⲥ ⲉϩⲣⲁⲓ ⲉⲧⲉⲥϩⲓⲏ ⲕⲁⲧⲁ ⲧⲉϩⲓⲏ ⲛⲃⲁⲓⲑⲥⲁⲙⲩⲥ ⲉϣⲱⲡⲉ ⲥⲉ ⲛⲧⲟϥ ⲡⲉ ⲛⲧⲁϥⲉⲓⲛⲉ ⲛⲁⲛ ⲛⲧⲉⲓⲛⲟϭ ⲛⲕⲁⲕⲓⲁ ⲉⲥⲧⲙⲧⲁⲁⲥ ⲇⲉ ⲉⲡⲥⲁ ⲉⲧⲙⲙⲁⲩ ⲧⲉⲛⲛⲁⲉⲓⲙⲉ ϫⲉ ⲛⲧⲉϥϭⲓϫ ⲧⲉ ⲁⲛ ⲛⲧⲁⲥⲉⲓ ⲉϫⲱⲛ ⲁⲗⲗⲁ ⲟⲩⲁⲡⲁⲛⲧⲏⲙⲁ ⲡⲉ ⲡⲁⲓ ⲛⲧⲁϥⲧⲁϩⲟⲛ

6:10  ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲉⲓⲣⲉ ϩⲓⲛⲁⲓ ⲁⲩϫⲓ ⲛⲧⲉϩⲉ ⲥⲛⲧⲉ ⲛϣⲁⲙⲓⲥⲉ ⲁⲩⲛⲁϩⲃⲟⲩ ⲉϩⲟⲩⲛ ⲉⲧⲁϭⲟⲗⲧⲉ ⲛⲉⲩϣⲏⲣⲉ ⲇⲉ ⲁⲩϫⲟⲟⲩⲥⲟⲩ ⲉϩⲣⲁⲓ ⲉⲡⲉⲩⲙⲁ

6:11  ⲁⲩⲱ ⲁⲩⲕⲱ ⲛⲧⲁⲩ ⲛⲧⲕⲟⲓⲃⲱⲧⲟⲥ ⲉϫⲛ ⲧⲁϭⲟⲗⲧⲉ ⲁⲩⲱ ⲡⲉⲣⲏⲧ ⲛⲧⲁⲩⲉⲣⲏⲧ ⲙⲙⲟϥ ⲙⲙⲁ ⲛⲉϩⲙⲟⲟⲥ ⲛⲛⲟⲩⲃ ⲙⲛ ⲛⲉⲕⲉⲡⲓⲛ ⲛⲛⲟⲩⲃ ⲁⲩⲕⲁⲁⲩ ϩⲛ ⲧⲉⲥⲑⲩⲕⲏ

6:12  ⲛⲉϩⲟⲟⲩ ⲇⲉ ⲁⲩⲙⲟⲟϣⲉ ϩⲛ ⲧⲉϩⲓⲏ ⲁⲩⲧⲁⲁⲩ ⲉⲧⲉϩⲓⲏ ⲛⲃⲁⲓⲑⲥⲁⲙⲩⲥ ⲛⲧⲁⲩⲕⲁⲣⲁⲧⲟⲩ ⲙⲙⲁⲧⲉ ϩⲛ ⲟⲩⲙⲟⲉⲓⲧ ⲛⲟⲩⲱⲧ ⲁⲩⲱ ⲛⲉⲩϩⲟ ⲙⲡⲟⲩⲡⲱϣⲥ ⲉⲟⲩⲛⲁⲙ ⲟⲩⲇⲉ ⲉϩⲃⲟⲩⲣ ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲙⲟⲟϣⲉ ⲉⲩⲟⲩⲏϩ ⲛⲥⲱⲥ ϣⲁ ⲉϩⲣⲁⲓ ⲉⲛⲧⲟϣ ⲛⲃⲁⲓⲑⲥⲁⲙⲩⲥ

6:13  ⲛⲣⲱⲙⲉ ⲇⲉ ⲛⲃⲁⲓⲑⲥⲁⲙⲩⲥ ⲛⲉⲩⲱϩⲥ ⲡⲉ ϩⲛ ⲟⲩⲱϩⲥ ⲛⲥⲟⲩⲟ ϩⲣⲁⲓ ϩⲙ ⲡⲉⲓⲁ ⲁⲩⲱ ⲁⲩϥⲓⲁⲧⲟⲩ ⲉϩⲣⲁⲓ ⲁⲩⲛⲁⲩ ⲉⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲣⲁϣⲉ ⲁⲩⲧⲱⲟⲩⲛ ⲁⲩⲉⲓ ⲉⲃⲟⲗ ϩⲏⲧⲥ

6:14  ⲁⲩⲱ ⲧⲁϭⲟⲗⲧⲉ ⲁⲥⲃⲱⲕ ⲉϩⲟⲩⲛ ⲉⲧⲥⲱϣⲉ ⲛⲱⲥⲏⲉ ⲡⲉⲧϩⲛⲃⲁⲓⲑⲥⲁⲙⲩⲥ ⲁⲩⲁϩⲉⲣⲁⲧⲟⲩ ⲛϭⲓ ⲛⲉϩⲟⲟⲩ ϩⲙ ⲡⲙⲁ ⲉⲧⲙⲙⲁⲩ ⲁⲩⲱ ⲁⲩⲧⲁϩⲟ ⲉⲣⲁⲧϥ ϩⲁⲧⲏⲥ ⲛⲟⲩⲛⲟϭ ⲛⲱⲛⲉ ⲁⲩⲡⲱϩ ⲛⲛⲉϣⲉ ⲛⲧⲁϭⲟⲗⲧⲉ ⲁⲩϩⲁⲣϭⲟⲩ ⲁⲩⲱ ⲛⲁϩⲟⲟⲩ ⲁⲩⲧⲁⲗⲁⲩ ⲉϩⲣⲁⲓ ⲉϫⲱⲟⲩ ⲛϭⲗⲓⲗ ⲙⲙⲁϩ ⲙⲡϫⲟⲉⲓⲥ

6:15  ⲛⲗⲉⲩⲉⲓⲧⲏⲥ ⲇⲉ ⲁⲩϫⲓ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲡⲉⲣⲏⲧ ⲉⲧⲛⲙⲙⲁⲥ ⲙⲛ ⲛⲉⲥⲕⲉⲩⲏ ⲛⲛⲟⲩⲃ ⲉⲧϩⲓϫⲱⲥ ⲁⲩⲕⲁⲁⲩ ϩⲓϫⲛ ⲡⲛⲟϭ ⲛⲱⲛⲉ ⲛⲣⲱⲙⲉ ⲇⲉ ⲛⲃⲁⲓⲑⲥⲁⲙⲩⲥ ⲁⲩⲉⲓⲛⲉ ⲛϩⲉⲛϭⲗⲓⲗ ⲙⲛ ϩⲛⲑⲩⲥⲓⲁ ⲙⲡⲉϩⲟⲟⲩ ⲉⲧⲙⲙⲁⲩ ⲙⲙⲁϩ ⲙⲡϫⲟⲉⲓⲥ

6:16  ⲁⲩⲱ ⲡϯⲟⲩ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲛⲁⲩ ⲉⲣⲟⲟⲩ ⲡⲉ ⲁⲩⲱ ⲁⲩⲕⲟⲧⲟⲩ ⲉϩⲣⲁⲓ ⲉⲁⲥⲕⲁⲗⲱⲛ ⲙⲡⲉϩⲟⲟⲩ ⲉⲧⲙⲙⲁⲩ

6:17  ⲁⲩⲱ ⲛⲁⲓ ⲛⲉ ⲛⲉⲙⲟⲩⲛⲅ ⲛϭⲓϫ ⲙⲙⲁ ⲛϩⲙⲟⲟⲥ ⲛⲛⲟⲩⲃ ⲛⲁⲓ ⲛⲧⲁⲛⲁⲗⲗⲟⲫⲩⲗⲟⲥ ⲧⲁⲁⲩ ⲛⲉⲣⲏⲧ ⲙⲡϫⲟⲉⲓⲥ ϩⲁ ⲧⲉⲩⲃⲁⲥⲁⲛⲟⲥ ⲟⲩⲙⲁ ⲛⲉϩⲙⲟⲟⲥ ϩⲁ ⲁⲍⲱⲧⲟⲥ ⲕⲉⲟⲩⲁ ϩⲁ ⲅⲁⲍⲁ ⲕⲉⲟⲩⲁ ϩⲁ ⲅⲉⲑ ⲕⲉⲟⲩⲁ ϩⲁ ⲁⲥⲕⲁⲗⲱⲛ ⲕⲉⲟⲩⲁ ϩⲁ ⲁⲕⲕⲁⲣⲱⲛ

6:18  ⲁⲩⲱ ϩⲛⲡⲓⲛ ⲛⲛⲟⲩⲃ ⲕⲁⲧⲁ ⲧⲏⲡⲉ ⲛⲛⲉⲡⲟⲗⲓⲥ [ⲧ]ⲏⲣⲟⲩ ⲛⲛⲁⲗⲗⲟⲫⲩⲗⲟⲥ ⲙⲡϯⲟⲩ ⲛⲥⲁⲧⲣⲁⲡⲏⲥ ϫⲓⲛ ⲟⲩⲛⲟϭ ⲙⲡⲟⲗⲓⲥ ⲉⲥⲟⲣϫ ϣⲁ ⲉϩⲣⲁⲓ ⲉⲛⲕⲱⲙⲏ ⲙⲫⲉⲣⲉⲍⲁⲓⲟⲥ ⲁⲩⲱ ϣⲁ ⲉϩⲣⲁⲓ ⲉⲡⲛⲟϭ ⲛⲱⲛⲉ ⲡⲙⲁ ⲛⲧⲁⲩⲕⲱ ϩⲓϫⲱϥ ⲛⲧⲕⲟⲓⲃⲱⲧⲟⲥ ⲛⲧⲇ[ⲓⲁⲑ]ⲏⲕⲏ ⲙⲡϫⲟⲉⲓⲥ ⲡⲉⲧ[ϩⲛⲧⲥ]ⲱϣⲉ ⲛⲱⲥⲏⲉ ⲡⲉ ⲉⲃⲟⲗ ϩⲛ ⲃⲁⲓⲑⲥⲁⲙⲩⲥ

6:19  ⲛϣⲏⲣⲉ ⲇⲉ ⲛⲓⲉⲭⲟⲛⲓⲁⲥ ⲙⲡⲟⲩⲣⲁϣⲉ ⲉϫⲛ ⲛⲣⲱⲙⲉ ⲛⲃⲁⲓⲑⲥⲁⲙⲩⲥ ϫⲉ ⲁⲩⲛⲁⲩ ⲉⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲁϥⲡⲁⲧⲁⲥⲥⲉ ⲛϩⲏⲧⲟⲩ ⲛϣϥⲉ ⲛⲣⲱⲙⲉ ⲁⲩⲱ ϯⲟⲩ ⲛⲧⲃⲁ ⲛⲣⲱⲙⲉ ⲡⲗⲁⲟⲥ ⲇⲉ ⲁϥⲣϩⲏⲃⲉ ϫⲉ ⲁⲡϫⲟⲉⲓⲥ ⲉⲓⲛⲉ ⲛⲟⲩⲛⲟϭ ⲙⲡⲗⲩⲅⲏ ⲉⲙⲁⲧⲉ ⲉϫⲙ ⲡⲗⲁⲟⲥ

6:20  ⲁⲩⲱ ⲛⲣ[ⲱⲙⲉ] ⲛⲃⲁⲓⲑⲥⲁⲙⲩⲥ ⲡⲉϫⲁⲩ ⲛⲛⲉⲩⲉⲣⲏⲩ ϫⲉ ⲛⲓⲙ ⲡⲉⲧⲛⲁⲙⲟⲟϣⲉ ϩⲓⲑⲏ ⲙⲡϫⲟⲉⲓⲥ ⲡⲁⲓ ⲉⲧⲟⲩⲁⲁⲃ ⲁⲩⲱ ⲉⲣⲉⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲛⲁⲃⲱⲕ ⲉϩⲣⲁⲓ ⲛⲛⲓⲙ ⲛⲥⲗⲟ ϩⲁⲧⲏⲛ

6:21  ⲁⲩϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧⲟⲩ ⲛⲛⲉⲧⲟⲩⲏϩ ϩⲛ ⲕⲁⲣⲓⲁⲑⲓⲁⲣⲓⲙ ⲉⲩϫⲱ ⲙⲙⲟⲥ ⲛⲁⲩ ϫⲉ ⲛⲁⲗⲗⲟⲫⲩⲗⲟⲥ ⲁⲩⲕⲧⲟ ⲛⲁⲛ ⲛⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲙⲏⲉⲓⲧⲛ ⲛⲧⲉⲧⲛϫⲓⲧⲥ ⲉϩⲣⲁⲓ ⲛⲏⲧⲛ