Site uses cookies to provide basic functionality.

OK
ISAIAH
Prev Up Next
Chapter 22
Isai CSlEliza 22:1  Что бысть тебе, яко ныне возлезосте вси на храмины тщетныя?
Isai CSlEliza 22:2  Наполнися град вопиющих, уязвленнии твои не мечьми уязвлени, ниже мертвецы твои умерщвлени ратию:
Isai CSlEliza 22:3  вси князи твои побегоша, и плененнии жестоце суть связани, и крепцыи в тебе далече отбежаша.
Isai CSlEliza 22:4  Сего ради рекох: оставите мене, да горце восплачуся: не належите утешати мя о сокрушении дщере рода моего:
Isai CSlEliza 22:5  яко день мятежа и пагубы и попрания, и смятение от Господа Саваофа: в дебри Сиони скитаются, от мала даже до велика скитаются по горам.
Isai CSlEliza 22:6  Еламите же взяша тулы, и всадницы человецы на конех, и собор ополчения.
Isai CSlEliza 22:7  И будут избранны дебри твоя, наполнятся колесниц, конницы же заступят врата твоя
Isai CSlEliza 22:8  и открыют врата Иудина, и воззрят в той день во избранныя домы града,
Isai CSlEliza 22:9  и открыют сокровенная домов краеградия Давидова, и узрят, яко множайшии суть, и яко отвратиша воду древния купели во град,
Isai CSlEliza 22:10  и яко разориша домы Иерусалимли на утверждение стене градней.
Isai CSlEliza 22:11  И сотвористе себе воду между двема стенама, внутрьуду купели древния, и не воззресте на Сотворившаго ю исперва, и Сограждшаго ю не видесте.
Isai CSlEliza 22:12  И призва Господь, Господь Саваоф в той день плачь и рыдание, и острижение и препоясание во вретища:
Isai CSlEliza 22:13  тии же сотвориша радость и веселие, закалающе телцы и жруще овцы, яко ясти мяса и пити вино, глаголюще: да ямы и пием, утре бо умрем.
Isai CSlEliza 22:14  И откровенна сия суть во ущию Господа Саваофа, яко не оставится вам той грех, дондеже умрете.
Isai CSlEliza 22:15  Сице глаголет Господь Саваоф: иди в кущу ко Сомнану строителю дому и рцы ему:
Isai CSlEliza 22:16  что ты зде, и что тебе зде, яко истесал еси себе зде гроб и сотворил еси себе на высоце гроб, и написал еси себе на камени кущу?
Isai CSlEliza 22:17  Се, ныне Господь Саваоф извержет и сотрет мужа, и отимет утварь твою и венец твой славный,
Isai CSlEliza 22:18  и повержет тя во страну велику и безмерну, и тамо умреши: и положит колесницу твою добрую в безчестие и дом князя твоего в попрание:
Isai CSlEliza 22:19  и извержешися от строителства твоего и от степене твоего.
Isai CSlEliza 22:20  И будет в той день, и призову раба Моего Елиакима сына Хелкиева
Isai CSlEliza 22:21  и облеку его во утварь твою, и венец твой дам ему и державу твою, и строителство твое дам в руце его, и будет яко отец живущым во Иерусалиме и живущым во Иудеи.
Isai CSlEliza 22:22  И дам ему славу Давидову, и обвладеет, и не будет противоглаголющаго: и дам ему ключь дому Давидова на рамо его, и отверзет, и не будет затворяющаго, и затворит, и не будет отверзающаго.
Isai CSlEliza 22:23  И поставлю его князя на месте верне, и будет на престоле славы дому отца своего.
Isai CSlEliza 22:24  И будет уповаяй на него всяк славный в дому отца его, от мала даже до велика: и будут зависяще на нем.
Isai CSlEliza 22:25  В той день, сия глаголет Господь Саваоф, подвигнется человек утвержден на месте верне, и отимется, и падет, и потребится слава, яже на нем, яко Господь глагола.