CSlElizabeth - Isaiah - 13

13:1  Видение на Вавилона, еже виде Исаиа сын Амосов.

13:2  На горе польней воздвигните знамение, вознесите глас им, не бойтеся, поущайте рукою, отверзите, князи.

13:3  Аз повелеваю, освященни суть: и Аз веду их, исполини идут исполнити ярость Мою радующеся, вкупе и укаряюще.

13:4  Глас языков многих на горах, подобен языков многих, глас царей и языков собравшихся: Господь Саваоф заповеда языку оружеборцу

13:5  приити от земли издалеча, от края основания небесе, Господь и оружеборцы Его, растлити всю вселенную.

13:6  Рыдайте: близ бо день Господень, и сокрушение от Бога приидет:

13:7  сего ради всяка рука разслабеет, и всяка душа человеча убоится,

13:8  и смятутся послы, и болезни приимут я яко жены раждающия: и поскорбят друг ко другу, и ужаснутся, и лице свое яко пламень изменят.

13:9  Се бо, день Господень грядет неизцельный, ярости и гнева, положити вселенную (всю) пусту и грешники погубити от нея.

13:10  Звезды бо небесныя и орион и все украшение небесное света своего не дадят, и помрачится солнце возсиявающее, и луна не даст света своего.

13:11  И заповем всей вселенней злая и нечестивым грехи их, и погублю укоризну беззаконных и укоризну гордых смирю:

13:12  и будут оставшии честнии паче, нежели злато нежженое, и человек честен будет паче, нежели камень, иже от Суфира.

13:13  Разярится бо небо, и земля потрясется от оснований своих, за ярость гнева Господа Саваофа в день, в оньже приидет ярость Его.

13:14  И будут оставшии яко серна бежащая и яко овца заблудившая, и не будет собираяй, яко человеку в люди своя возвратитися, и человек во страну свою побегнет.

13:15  Иже бо аще пленится, поразится, и иже собрани суть, мечем падут.

13:16  И чада их пред ними разбиют, и домы их пленят, и жены их поймут.

13:17  Се, Аз возбуждаю на вы Мидов, иже сребра не вменяют, ниже злата требуют:

13:18  стреляния юношеская сокрушат, и чад ваших не помилуют, ниже пощадят чад твоих очи их.

13:19  И будет Вавилон, иже нарицается славный от царя Халдейска, якоже разсыпа Бог Содому и Гоморру,

13:20  не населится в вечное время, и не внидут в онь чрез многия роды, ниже пройдут его Аравляне, ниже пастуси почиют в нем.

13:21  И почиют тамо зверие, и наполнятся домове шума, и почиют ту сирини, и беси тамо воспляшут,

13:22  и онокентавры тамо вселятся, и вогнездятся ежеве в домех их.