CSlElizabeth - Isaiah - 14

14:1  Скоро идет и не умедлит: и помилует Господь Иакова и изберет паки Израиля, и почиют на земли своей, и пришлец приложится к ним и приложится к дому Иаковлю,

14:2  и поймут их языцы и введут на место их, и наследят и умножатся на земли Божии в рабы и рабыни: и будут пленени пленившии я, и обладани будут обладавшии ими.

14:3  И будет в той день, упокоит тя Господь от болезни и ярости твоея и от работы жестокия, еюже работал еси им.

14:4  И приимеши плачь сей на царя Вавилонска и речеши в той день: како преста истязуяй и преста понуждаяй?

14:5  Сокруши Бог ярем грешников, ярем князей,

14:6  поразив язык яростию, язвою неизцельною, поражаяй язык язвою ярости, еюже не пощаде, почи уповающи.

14:7  Вся земля вопиет со веселием,

14:8  и древа ливанова возвеселишася о тебе и кедр ливанский: отнележе ты уснул еси, не взыде посекаяй нас.

14:9  Ад доле огорчися, срет тя: восташа с тобою вси Исполини обладавшии землею, подвизавшии от престолов своих всех царей языческих.

14:10  Вси отвещают и рекут тебе: и ты пленен еси, якоже и мы: и в нас вменен еси.

14:11  Сниде слава твоя во ад, многое веселие твое: под тобою постелют гнилость, и покров твой червь.

14:12  Како спаде с небесе денница восходящая заутра? Сокрушися на земли посылаяй ко всем языком.

14:13  Ты же рекл еси во уме твоем: на небо взыду, выше звезд небесных поставлю престол мой, сяду на горе высоце, на горах высоких, яже к северу:

14:14  взыду выше облак, буду подобен Вышнему.

14:15  Ныне же во ад снидеши и во основания земли.

14:16  Видевшии тя удивятся о тебе и рекут: сей человек раздражаяй землю, потрясаяй цари,

14:17  положивый вселенную всю пусту и грады ея разсыпа, плененых не разреши.

14:18  Вси царие языков успоша в чести, кийждо в дому своем.

14:19  Ты же повержен будеши в горах, яко мертвец мерзкий со многими мертвецы изсечеными мечем, сходящими во ад.

14:20  Якоже риза в крови намочена не будет чиста, такожде и ты не будеши чист, зане землю Мою погубил еси и люди Моя избил еси: не пребудеши в вечное время, семя злое.

14:21  Уготови чада твоя на убиение грехами отца твоего, да не востанут и наследят землю и наполнят землю ратьми.

14:22  И востану на ня, глаголет Господь Саваоф, и погублю имя их, и останок, и семя: сия глаголет Господь.

14:23  И положу Вавилона пуста, яко вогнездитися ежем, и будет ни во чтоже: и положу и брения пропасть в пагубу.

14:24  Сия глаголет Господь Саваоф: якоже глаголах, тако будет, и якоже совещах, тако пребудет,

14:25  еже погубити Ассириан на земли Моей и на горах Моих: и будут в попрание, и отимется от них ярем их, и слава их от рамен их отимется.

14:26  Сей совет, егоже совеща Господь на всю вселенную, и сия рука на вся языки вселенныя:

14:27  яже бо Бог Святый совеща, кто разорит? И руку Его высокую кто отвратит?

14:28  В лето, в неже умре Ахаз царь, бысть глагол сей:

14:29  не радуйтеся, вси иноплеменницы, сокрушися бо ярем биющаго вы: от семене бо змиина изыдут изчадия аспидов, и изчадия их изыдут змии парящии:

14:30  и упасутся убозии им, нищии же человецы в мире почиют: и потребит гладом семя твое, и останок твой избиет.

14:31  Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет.

14:32  И что отвещают царие языков? Яко Господь основа Сиона, и тем спасутся смиреннии людий Его.