CSlElizabeth - Isaiah - 10

10:1  Горе пишущым лукавство: пишущии бо лукавство пишут,

10:2  укланяюще суд убогих, восхищающе суд нищих людий Моих, яко быти им вдовице в расхищение и сироте в разграбление.

10:3  И что сотворят в день посещения? Скорбь бо вам отдалече приидет. И к кому прибегнете, да поможет вам? И где оставите славу вашу,

10:4  еже не впасти в пленение? И под убиеными падут. И во всех сих не отвратися гнев Его, но еще рука Его высока.

10:5  Горе Ассирием, жезл ярости Моея и гнев есть в руку их.

10:6  Гнев Мой послю на язык беззаконен, и своих людий повелю сотворити корысти и пленение, и попрати грады и положити я в прах.

10:7  Сей же не тако помысли и душею не тако возмне: но отступит ум его, и еже потребити языки не малы.

10:8  И аще рекут ему: ты ли еси един князь?

10:9  И речет: не взях ли страны, яже выше Вавилона и Халани, идеже столп создан, и взях Аравию и Дамаск и Самарию?

10:10  Якоже сия взях, и вся княжения возму. Возрыдайте, изваянная во Иерусалиме и в Самарии:

10:11  якоже бо сотворих Самарии и рукотворенным ея, тако сотворю и Иерусалиму и кумиром его.

10:12  И будет, егда скончает Господь вся творя в горе Сиони и во Иерусалиме, наведет на ум великий на князя Ассирийска и на высоту славы очию его.

10:13  Рече бо: крепостию руки моея сотворю, и премудростию разума (моего) отиму пределы языков, и силу их пленю,

10:14  и сотрясу грады населеныя, и вселенную всю оыму рукою моею яко гнездо, и яко оставленая яица возму: и несть, иже убежит мене, или противу мне речет, и отверзет уста и глумит.

10:15  Еда прославится секира без секущаго ею? Или вознесется пила без влекущаго ю? Такожде аще кто возмет жезл, или древо: и не тако.

10:16  Но послет Господь Саваоф на твою честь безчестие, и на твою славу огнь горя возгорится.

10:17  И будет свет Израилев во огнь, и освятит его огнем горящим, и пояст яко сено вещество.

10:18  В той день угаснут горы и холми и дубравы, и пояст от души даже до плотей: и будет бежай, яко бежай от пламене горяща:

10:19  и оставльшиися от них будут в число, и отроча малое напишет я.

10:20  И будет в той день, не приложится ктому останок Израилев, и спасеннии Иаковли не будут ктому уповающе на обидевшыя их, но будут уповающе на Бога Святаго Израилева истиною.

10:21  И обратится останок Иаковль к Богу крепкому.

10:22  И аще будут людие Израилевы яко песок морский, останок их спасется:

10:23  слово бо совершая и сокращая правдою, яко слово сокращено сотворит Господь во всей вселенней.

10:24  Сего ради сия глаголет Господь Саваоф: не бойтеся, людие Мои, от Ассириан, живущии в Сионе, яко жезлом поразит тя: язву бо наводит на тя, еже видети путь Египта.

10:25  Еще бо мало, и престанет гнев, ярость же Моя на совет их:

10:26  и воздвигнет Бог Сил на ня язву, яко язву Мадиамлю на месте Скорби, и ярость Его на путь иже к морю, на путь иже во Египет:

10:27  и будет в той день, отимется иго его от рамене твоего и страх его от тебе, и согниет иго от рамен ваших.

10:28  Приидет бо во град Аггай, и прейдет в Магеддо, и в Махмасе положит сосуды своя.

10:29  И минет дебрь, и приидет во Аггай: страх приимет Раму град Саулов,

10:30  побегнет дщерь Галимля, услышится в Лаисе, услышится во Анафофе.

10:31  И ужасеся Мадемина и живущии во Гивиме.

10:32  Утешайте днесь еже на пути пребыти: утешайте рукою гору дщерь Сионю, и холми, иже во Иерусалиме:

10:33  се Владыка Господь Саваоф смятет славныя со крепостию, и высоции укоризною сокрушатся, и высоцыи смирятся,

10:34  и падут высоцыи мечем, Ливан же с высокими падется.