LinVB - Jude - 1

1:1  Ngáí Yúda, mosáleli wa Yézu mpé ndeko wa Yakóbo, nakomélí bínó bato Nzámbe abyángí, baye Nzámbe Tatá akolingaka mpé Yézu Krístu akobátelaka.

1:2  Ngolu, bobóto ná bolingi bwa Nzámbe bótónda o mitéma mya bínó.

1:3  Bandeko ba bolingo, nalingákí míngi kokomela bínó makambo ma libíkí lya bísó bánso. Kasi sikáwa namóní ’te nasengélí kosála yangó mpô ya koléndisa bínó : bóbunda etumba ya boyambi, boye Nzámbe apésí sé mbala yŏ kó na basántu ba yě.

1:4  Bato basúsu basílí bamíkótísí na mayéle o ntéi ya bínó ; etúmbu bakátélí bangó esílí ekomámí út’o kala o Minkandá Misántu. Bangó babóngólí ngrásya ya Nzámbe wa bísó ékóma nzelá ya kosála mabé ; bakowánganaka Yézu Krístu, Motéyi mpé Mokonzi sé mŏ­kó wa bísó.

1:5  Atâ boyébí mambí maye mánso, nalingí kokundolela bínó ’te Mokonzi abimísákí ekólo ya yě o mokili mwa Ezípeti, kasi na nsima abo­mákí baye babóyákí koyamba yě.

1:6  Sé bôngó, bǎnzelú baye babátélí lokúmu la bangó té mpé batíkí esíká bazalákí : Nzámbe akangí bangó na minyolólo sékô o esíká ya molílí makási téé mokolo mwa Likambo linéne.

1:7  Ndéngé yŏ kó bato ba Sódoma, ba Gómora mpé ba mbóka isúsu ya penepene bamípésí na bondúmbá mpé balukí koyébana na baye bazalí na nzóto ya bato té. Bŏ ndakisa o míso ma bato bánso, bazwí etúmbu ya kozíka na móto mwa sékô.

1:8  Baye bakótélí bínó sikáwa bakosálaka sé bôngó : mpô ya ndóto iye bakolótoko bakobébisaka nzóto ya bangó, babóyí bokonzi bwa Nzámbe mpé bakotúkaka bilímo bya nkémbo.

1:9  Atâ ǎnzelú mokúmi Míkael, áwa awélákí ntembe na zábolo mpô ya ebembe ya Móze, abá­ngákí kokitisa yě na nsóni o likambo, kasi alobákí bobélé : « Mokonzi ápésa yŏ etúmbu. »

1:10  Kasi bangó bakotúkaka makambo maye bayébí té. Bayébí sé makambo ma nzóto lokóla nyama izángí mayéle ; makambo maye makosúkela bangó mabé.

1:11  Mawa na bangó ! Balandí bobélé nzelá eye Kain alandáká ; mpô ya lokósó la mbóngo, lokóla Baláme, babúngámí na maloba ma bokósi ; batombókí lokóla Kóre, bôngó bakokúfa lokóla yě.

1:12  Bangó ndé bazalí kotíela bínó libakú o bisíká bokosanganaka mpô ya kolía li­mpáti lya bondeko : bakolíaka téé batóndí, nsóni té. Bazalí lokóla mampata mazángí mái matíndámí na mompepe, lokóla nzeté ibótí té o eleko ya mbuma, ikúfí kokúfa mpenzá mpô bapikólí yangó.

1:13  Sé lokóla mbóngé ya mbú itombókí mpé ikobimisaka fúlu, bakobimisaka makambo ma nsóni. Bazalí lokóla minzóto mibúngí nzelá mikosúka o molílí makási sékô.

1:14  Enok, nkóko wa nsambo o molongó mwa ba­nkóko bandá Adámu asakóláká mpô ya bangó : « Tálá Mokonzi ayéí na basántu ba yě nkóto na nkóto,

1:15  mpô ’te ákáta makambo ma bato bánso. Akotúmbola baye bánso babóyí Nzámbe mpô ya mabé mánso basálí ntángo babóyákí kotósa yě, mpé mpô ya maloba mabé balobákí na yě. »

1:16  Ntángo ínso bazalí kolobaloba mpé komílela, bakolandaka maye mitéma mya bangó milingí, monoko mwa bangó motóndí na maloba ma lofúndo mpé na malété mpô ya kozwa bilóko bya bato ba nkita.

1:17  Kasi bínó, bandeko ba bolingo, bókanisa maloba maye bapóstolo ba Mokonzi wa bísó Yézu Krístu balobákí.

1:18  Bayébísákí bínó : « O mikolo mya nsúka bato basúsu bakomónono, baye bakoseke bínó mpé bakolanda mpósá ya mitéma mya bangó. »

1:19  Bangó bakokabola bato, bakozala sé na mayéle ma nzóto mpé bakozánga Elímo.

1:20  Kasi bínó, bandeko ba bolingo, bópikama o eyamba esántu, bósá­mbela na ngúyá ya Elímo Sántu,

1:21  bóbátela bolingi bwa Nzámbe o mitéma mya bínó, áwa bozalí kozila ’te Mokonzi wa bísó Yézu Krístu akoyókela bínó ngolu mpé akopésa bínó bomoi bwa lobíko.

1:22  Bósílisa ntembe ya baye bazalí kotatabana ;

1:23  bóbíkisa basúsu bázíka na móto té ; bóyókela bato basúsu ngolu, kasi bókéba mpé bóyina atâ bila­mbá bya bangó biye bikómí mbindo mpô ya masúmu ma bangó.

1:24  Oyo akokí kobátela bínó mpô ’te bókwéya té, akokí kokamba bínó epái ya nkémbo ya yě lokóla bato bazángí mabé mpé batóndí na esengo.

1:25  Yě Nzámbe sé mŏ kó azalí Mobíkisi wa bísó na lisálisi lya Mokonzi wa bísó Yézu Krístu. Na yě nkémbo, bokonzi, bokási ná ngúyá út’o libandela, sikáwa mpé o bileko bínso sékô ! Amen.