UrduGeoRoman - Jude - 1

1:1  Yih ḳhat Īsā Masīh ke ḳhādim aur Yāqūb ke bhāī Yahūdāh kī taraf se hai. Maiṅ unheṅ likh rahā hūṅ jinheṅ bulāyā gayā hai, jo Ḳhudā Bāp meṅ pyāre haiṅ aur Īsā Masīh ke lie mahfūz rakhe gae haiṅ.

1:2  Allāh āp ko rahm, salāmatī aur muhabbat kasrat se atā kare.

1:3  Azīzo, go maiṅ āp ko us najāt ke bāre meṅ likhne kā baṛā shauq rakhtā hūṅ jis meṅ ham sab sharīk haiṅ, lekin ab maiṅ āp ko ek aur bāt ke bāre meṅ likhnā chāhtā hūṅ. Maiṅ is meṅ āp ko nasīhat karne kī zarūrat mahsūs kartā hūṅ ki āp us īmān kī ḳhātir jidd-o-jahd kareṅ jo ek hī bār sadā ke lie muqaddasīn ke sapurd kar diyā gayā hai.

1:4  Kyoṅki kuchh log āp ke darmiyān ghus āe haiṅ jinheṅ bahut arsā pahle mujrim ṭhahrāyā jā chukā hai. Un ke bāre meṅ yih likhā gayā hai ki wuh bedīn haiṅ jo hamāre Ḳhudā ke fazl ko toṛ-maroṛ kar aiyāshī kā bāis banā dete haiṅ aur hamāre wāhid āqā aur Ḳhudāwand Īsā Masīh kā inkār karte haiṅ.

1:5  Go āp yih sab kuchh jānte haiṅ, phir bhī maiṅ āp ko is kī yād dilānā chāhtā hūṅ ki agarche Ḳhudāwand ne apnī qaum ko Misr se nikāl kar bachā liyā thā to bhī us ne bād meṅ unheṅ halāk kar diyā jo īmān nahīṅ rakhte the.

1:6  Un farishtoṅ ko yād kareṅ jo us dāyrā-e-iḳhtiyār ke andar na rahe jo Allāh ne un ke lie muqarrar kiyā thā balki jinhoṅ ne apnī rihāishgāh ko tark kar diyā. Unheṅ us ne tārīkī meṅ mahfūz rakhā hai jahāṅ wuh abadī zanjīroṅ meṅ jakaṛe hue roz-e-azīm kī adālat kā intazār kar rahe haiṅ.

1:7  Sadūm, Amūrā aur un ke irdgird ke shahroṅ ko bhī mat bhūlnā, jin ke bāshinde in farishtoṅ kī tarah zinākārī aur ġhairfitrī sohbat ke pīchhe paṛe rahe. Yih log abadī āg kī sazā bhugatte hue sab ke lie ek ibratnāk misāl haiṅ.

1:8  To bhī in logoṅ ne un kā-sā rawaiyā apnā liyā hai. Apne ḳhāboṅ kī binā par wuh apne badanoṅ ko ālūdā kar lete, Ḳhudāwand kā iḳhtiyār radd karte aur jalālī hastiyoṅ par kufr bakte haiṅ.

1:9  In ke muqābale meṅ sardār farishte Mīkāel ke rawaiye par ġhaur kareṅ. Jab wuh Iblīs se jhagaṛte waqt Mūsā kī lāsh ke bāre meṅ bahs-mubāhasā kar rahā thā to us ne Iblīs par kufr bakne kā faislā karne kī jurrat na kī balki sirf itnā hī kahā, “Rab āp ko ḍānṭe!”

1:10  Lekin yih log har aisī bāt ke bāre meṅ kufr bakte haiṅ jo un kī samajh meṅ nahīṅ ātī. Aur jo kuchh wuh fitrī taur par besamajh jānwaroṅ kī tarah samajhte haiṅ wuhī unheṅ tabāh kar detā hai.

1:11  Un par afsos! Unhoṅ ne Qābīl kī rāh iḳhtiyār kī hai. Paisoṅ ke lālach meṅ unhoṅ ne apne āp ko pūre taur par us ġhaltī ke hawāle kar diyā hai jo Bilām ne kī. Wuh Qorah kī tarah bāġhī ho kar halāk hue haiṅ.

1:12  Jab yih log Ḳhudāwand kī muhabbat ko yād karne wāle rifāqatī khānoṅ meṅ sharīk hote haiṅ to rifāqat ke lie dhabbe ban jāte haiṅ. Yih ḍare baġhair khānā khā khā kar us se mahzūz hote haiṅ. Yih aise charwāhe haiṅ jo sirf apnī gallābānī karte haiṅ. Yih aise bādal haiṅ jo hawāoṅ ke zor se chalte to haiṅ lekin baraste nahīṅ. Yih sardiyoṅ ke mausam meṅ aise daraḳhtoṅ kī mānind haiṅ jo do lihāz se murdā haiṅ. Wuh phal nahīṅ lāte aur jaṛ se ukhaṛe hue haiṅ.

1:13  Yih samundar kī beqābū lahroṅ kī mānind haiṅ jo apnī sharmnāk harkatoṅ kī jhāg uchhāltī haiṅ. Yih āwārā sitāre haiṅ jin ke lie Allāh ne sab se gahrī tārīkī meṅ ek dāymī jagah maḳhsūs kī hai.

1:14  Ādam ke bād sātweṅ ādmī Hanūk ne in logoṅ ke bāre meṅ yih peshgoī kī, “Dekho, Ḳhudāwand apne beshumār muqaddas farishtoṅ ke sāth

1:15  sab kī adālat karne āegā. Wuh unheṅ un tamām bedīn harkatoṅ ke sabab se mujrim ṭhahrāegā jo un se sarzad huī haiṅ aur un tamām saḳht bātoṅ kī wajah se jo bedīn gunāhgāroṅ ne us ke ḳhilāf kī haiṅ.”

1:16  Yih log buṛbuṛāte aur shikāyat karte rahte haiṅ. Yih sirf apnī zātī ḳhāhishāt pūrī karne ke lie zindagī guzārte haiṅ. Yih apne bāre meṅ sheḳhī mārte aur apne fāyde ke lie dūsroṅ kī ḳhushāmad karte haiṅ.

1:17  Lekin āp mere azīzo, wuh kuchh yād rakheṅ jis kī peshgoī hamāre Ḳhudāwand Īsā Masīh ke rasūloṅ ne kī thī.

1:18  Unhoṅ ne āp se kahā thā, “Āḳhirī dinoṅ meṅ mazāq uṛāne wāle hoṅge jo apnī bedīn ḳhāhishāt pūrī karne ke lie hī zindagī guzāreṅge.”

1:19  Yih wuh haiṅ jo pārṭībāzī karte, jo duniyāwī soch rakhte haiṅ aur jin ke pās Rūhul-quds nahīṅ hai.

1:20  Lekin āp mere azīzo, apne āp ko apne muqaddastarīn īmān kī buniyād par tāmīr kareṅ aur Rūhul-quds meṅ duā kareṅ.

1:21  Apne āp ko Allāh kī muhabbat meṅ qāym rakheṅ aur is intazār meṅ raheṅ ki hamāre Ḳhudāwand Īsā Masīh kā rahm āp ko abadī zindagī tak pahuṅchāe.

1:22  Un par rahm kareṅ jo shak meṅ paṛe haiṅ.

1:23  Bāz ko āg meṅ se chhīn kar bachāeṅ aur bāz par rahm kareṅ, lekin ḳhauf ke sāth. Balki us shaḳhs ke libās se bhī nafrat kareṅ jo apnī harkatoṅ se gunāh se ālūdā ho gayā hai.

1:24  Us kī tamjīd ho jo āp ko ṭhokar khāne se mahfūz rakh saktā hai aur āp ko apne jalāl ke sāmne bedāġh aur baṛī ḳhushī se māmūr karke khaṛā kar saktā hai.

1:25  Us wāhid Ḳhudā yānī hamāre Najātdahindā kā jalāl ho. Hāṅ, hamāre Ḳhudāwand Īsā Masīh ke wasīle se use jalāl, azmat, qudrat aur iḳhtiyār azal se ab bhī ho aur abad tak rahe. Āmīn.