CopSahBible2 - Judith - 12

12:1  ⲁϥⲟⲩⲉϩⲥⲁϩⲛⲉ ⲇⲉ ⲉⲧⲣⲉⲩϫⲓⲧⲥ ⲉϩⲟⲩⲛ ⲉⲡⲙⲁ ⲉϣⲁⲩⲕⲱ ⲛϩⲏⲧϥ ⲛⲛⲉϥϩⲛⲟⲩ ⲛϩⲁⲧ ⲁⲩⲱ ⲁϥϫⲟⲟⲥ ⲉⲕⲱ ϩⲁⲣⲱⲥ ⲉⲃⲟⲗ ϩⲛ ⲛϭⲓ ⲛⲟⲩⲟⲟⲙ ⲉϣⲁⲩⲧⲁⲙⲓⲟⲟⲩ ⲛⲁϥ ⲁⲩⲱ ⲉⲥⲱ ⲉⲃⲟⲗ ϩⲙ ⲡⲉϥⲏⲣⲡ

12:2  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ϫⲉ ⲛϯⲛⲁⲟⲩⲱⲙ ⲁⲛ ⲉⲃⲟⲗ ⲛϩⲏⲧⲟⲩ ϫⲉⲕⲁⲥ ⲛⲛⲉϥϣⲱⲡⲉ ⲉⲩϫⲣⲟⲡ ⲁⲗⲗⲁ ⲉⲩⲛⲁⲥⲁϩⲛⲉ ⲛⲁⲓ ⲉⲃⲟⲗ ϩⲛ ⲛⲉⲧⲟⲩⲏϩ ⲛⲥⲱⲓ

12:3  ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲉϣⲱⲡⲉ ϭⲉ ⲉⲩϣⲁⲛⲱϫⲛ ⲛϭⲓ ⲛⲉⲧⲛⲙⲙⲉ ⲉⲛⲛⲁⲉⲓⲛⲉ ⲧⲱⲛ ⲉϥⲉⲓⲛⲉ ⲙⲙⲟⲟⲩ ⲉϯ ⲛⲁ ⲙⲛⲟⲩⲟⲛ ⲅⲁⲣ ⲙⲙⲟⲛ ⲉⲃⲟⲗ ϩⲙ ⲡⲟⲩⲅⲉⲛⲟⲥ

12:4  ⲡⲉϫⲁⲥ ⲛⲁϥ ⲛϭⲓ ⲓⲟⲩⲇⲉⲓⲑ ϫⲉ ⲥⲟⲛϩ ⲛϭⲓ ⲧⲉⲕⲯⲩⲭⲏ ⲡⲁϫⲟⲉⲓⲥ ϫⲉ ⲛⲧⲉⲕϩⲙϩⲁⲗ ⲛⲁϫⲟ ⲉⲃⲟⲗ ⲁⲛ ⲛⲛⲉⲧⲛⲙⲙⲁⲓ ϣⲁⲛϯⲉⲓⲣⲉ ϩⲛ ⲧⲁϭⲓϫ ⲛⲛⲉⲛⲧⲁⲓϣⲟϫⲛⲉ ⲉⲣⲟⲟⲩ

12:5  ⲁⲩⲛⲧⲥ ⲇⲉ ⲛϭⲓ ⲛϩⲙϩⲁⲗ ⲛⲟⲗⲟⲫⲉⲣⲛⲏⲥ ⲉⲧⲉⲥⲕⲏⲛⲏ ⲁⲥⲱⲃϣ ϣⲁⲧⲡⲁϣⲉ ⲛⲧⲉⲩϣⲏ ⲁⲥⲧⲱⲟⲩⲛ ⲇⲉ ⲉϩⲟⲩⲛ ϩⲛⲧⲟⲩⲣϣⲉ ⲛϩⲧⲟⲟⲩⲉ

12:6  ⲁⲥϫⲟⲟⲩ ϣⲁ ⲟⲗⲟⲫⲉⲣⲛⲏⲥ ⲉⲥϫⲱ ⲙⲙⲟⲥ ϫⲉ ⲙⲁⲣⲉⲡⲁϫⲟⲉⲓⲥ ⲟⲩⲉϩⲥⲁϩⲛⲉ ⲉⲧⲣⲉⲩⲕⲱ ⲛⲧⲉⲕϩⲙϩⲁⲗ ⲉⲃⲱⲕ ⲉⲃⲟⲗ ⲉϣⲗⲏⲗ

12:7  ⲁⲩⲱ ⲁϥⲟⲩⲉϩⲥⲁϩⲛⲉ ⲛϭⲓ ⲟⲗⲟⲫⲉⲣⲛⲏⲥ ⲛⲉϥⲣⲉϥⲣⲟⲓⲥ ⲉⲧⲙⲕⲱⲗⲩ ⲙⲙⲟⲥ ⲁⲩⲱ ⲁⲥϭⲱ ϩⲛ ⲧⲡⲁⲣⲉⲙⲃⲟⲗⲏ ⲛϣⲟⲙⲛⲧ ⲛϩⲟⲟⲩ ⲉϣⲁⲥⲉⲓ ⲉⲃⲟⲗ ⲕⲁⲧⲁ ⲟⲩϣⲏ ⲉⲡⲓⲁ ⲛⲃⲁⲓⲧⲩⲗⲟⲩⲁ ⲛⲥϫⲟⲕⲙⲉⲥ ϩⲛ ⲧⲡⲁⲣⲁⲉⲙⲃⲟⲗⲏ ϩⲓϫⲛ ⲧⲡⲏⲅⲏ ⲙⲡⲙⲟⲟⲩ

12:8  ⲉⲥϣⲁⲛⲉⲓ ⲇⲉ ⲉϩⲣⲁⲓ ϣⲁⲥⲥⲟⲡⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲥⲟⲟⲩⲧⲛ ⲛⲧⲉⲥϩⲓⲏ ⲉⲩϫⲓⲥⲉ ⲛⲛϣⲏⲣⲉ ⲙⲡⲉϥⲗⲁⲟⲥ

12:9  ⲉⲥϣⲁⲛⲃⲱⲕ ⲇⲉ ⲉϩⲟⲩⲛ ϣⲁⲥϭⲱ ⲉⲥⲧⲃⲃⲏⲩ ϩⲛ ⲧⲉⲥⲕⲏⲛⲏ ϣⲁⲛⲧⲟⲩϫⲓ ⲛⲁⲥ ⲉϩⲟⲩⲛ ⲛⲧⲉⲥⲧⲣⲟⲫⲏ ⲙⲡⲛⲁⲩ ⲛⲣⲟⲩϩⲉ

12:10  ⲁⲥϣⲱⲡⲉ ⲇⲉ ⲡⲙⲉϩϥⲧⲟⲟⲩ ⲛϩⲟⲟⲩ ⲁⲟⲗⲟⲫⲉⲣⲛⲏⲥ ⲉⲓⲣⲉ ⲛⲟⲩϩⲟⲟⲡ ⲉⲛⲉϥϩⲙϩⲁⲗ ⲙⲁⲩⲁⲁⲩ ⲁⲩⲱ ⲙⲡϥⲙⲟⲩⲧⲉ ⲉⲗⲁⲁⲩ ⲉⲧⲉⲭⲣⲓⲁ ⲛⲛⲉⲧϩⲓϫⲛ ⲛⲉⲭⲣⲓⲁ

12:11  ⲡⲉϫⲁϥ ⲇⲉ ⲛⲃⲁⲅⲱⲁⲥ ⲡⲉϥⲥⲓⲟⲩⲣ ⲡⲉⲧϩⲓϫⲛ ⲛⲉϥⲛⲛⲕⲁ ⲧⲏⲣⲟⲩ ϫⲉ ⲃⲱⲕ ⲛⲅⲡⲓⲑⲉ ⲛⲧⲉⲓⲥϩⲓⲙⲉ ⲛϩⲉⲃⲣⲁⲓⲁ ⲧⲁⲓ ⲉⲧϩⲁⲧⲏⲕ ⲉⲧⲣⲉⲥⲉⲓ ϣⲁⲣⲟⲛ ⲛⲥⲟⲩⲱⲙ ⲛⲥⲥⲱ ⲛⲙⲙⲁⲛ

12:12  ⲉⲓⲥ ϩⲏⲏⲧⲉ ⲅⲁⲣ ⲟⲩϣⲓⲡⲉ ⲙⲡⲉⲛϩⲟⲡⲉ ⲉⲛϣⲁⲛⲕⲱ ⲛⲥⲱⲛ ⲛⲟⲩⲥϩⲓⲙⲉ ⲛⲧⲉⲓⲙⲓⲛⲉ ⲉⲙⲉⲛϣⲁϫⲉ ⲛⲙⲙⲁⲥ ϫⲉ ⲉⲛϣⲁⲛⲧⲙⲥⲉⲕⲧⲁⲓ ⲛⲁⲛ ⲥⲉⲛⲁⲥⲱⲃⲉ ⲡⲉ ⲛⲥⲱⲛ

12:13  ⲁⲩⲱ ⲁϥⲉⲓ ⲉⲃⲟⲗ ⲛϭⲓ ⲃⲁⲅⲱⲁⲥ ⲛⲛⲁϩⲣⲙⲡϩⲟ ⲛⲟⲗⲟⲫⲉⲣⲛⲏⲥ ⲁϥⲉⲓ ⲉϩⲟⲩⲛ ϣⲁⲣⲟⲥ ⲡⲉϫⲁϥ ϫⲉ ⲙⲡⲣⲧⲣⲉⲥϫⲛⲁⲁⲩ ⲛϭⲓ ⲧⲉⲓϣⲉⲉⲣⲉ ϣⲏⲙ ⲉⲧⲛⲁⲛⲟⲩⲥ ⲉⲉⲓ ϣⲁ ⲡⲁϫⲟⲉⲓⲥ ⲉϫⲓⲉⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲉⲛⲟⲩϥ ⲛⲉ ⲁⲩⲱ ⲛⲧⲉⲥⲱ ⲛⲙⲙⲁⲛ ⲛⲟⲩⲏⲣⲡ ⲉⲩⲟⲩⲛⲟϥ ⲛⲧⲉϣⲱⲡⲉ ϩⲣⲁⲓ ϩⲙ ⲡⲟⲟⲩ ⲛϩⲟⲟⲩ ⲛⲑⲉ ⲛⲩⲟⲉⲓ ⲛⲛϣⲉⲉⲣⲉ ⲛⲛϣⲏⲣⲉ ⲛⲛⲁⲥⲥⲟⲩⲣ ⲛⲁⲓ ⲉⲧⲁϩⲉⲣⲁⲧⲟⲩ ϩⲙ ⲡⲏⲓ ⲛⲛⲁⲃⲟⲩⲭⲟⲇⲟⲛⲟⲥⲟⲣ

12:14  ⲡⲉϫⲁⲥ ⲛⲁϥ ⲛϭⲓ ⲓⲟⲩⲇⲉⲓⲑ ϫⲉ ⲁⲛⲅ ⲛⲓⲙ ⲁⲛⲟⲕ ϫⲉ ⲉⲓⲉⲟⲩⲱϩⲙ ⲙⲡⲁϫⲟⲉⲓⲥ ϫⲉ ϩⲱⲃ ⲛⲓⲙ ⲉⲧⲛⲁϣⲱⲡⲉ ⲉⲩⲣⲁⲛⲁⲩ ⲛⲛⲉϥⲃⲁⲗ ϯⲛⲁϭⲉⲡⲏ ⲛⲧⲁⲁⲩ ⲁⲩⲱ ⲡⲁⲓ ϥⲛⲁϣⲱⲡⲉ ⲛⲁⲓ ⲉⲩⲧⲉⲗⲏⲗ ϣⲁ ⲡⲉϩⲟⲟⲩ ⲙⲡⲁⲙⲟⲩ

12:15  ⲁⲥⲧⲱⲛⲥ ⲇⲉ ⲁⲥⲕⲟⲥⲙⲓ ⲙⲙⲟⲥ ϩⲛ ⲧⲉⲥϩⲃⲥⲱ ⲁⲩⲱ ϩⲙ ⲡⲕⲟⲥⲙⲟⲥ ⲧⲏⲣϥ ⲛⲧⲉⲥⲙⲛⲧⲥϩⲓⲙⲉ ⲁⲧⲉⲥϩⲙϩⲁⲗ ⲙⲟⲟϣⲉ ϩⲏⲧⲥ ⲁⲩⲡⲱⲣϣ ϩⲁⲣⲟⲥ ⲉϫⲙ ⲡⲕⲁϩ ⲙⲡⲉⲙⲧⲟ ⲉⲃⲟⲗ ⲛⲟⲗⲟⲫⲉⲣⲛⲏⲥ ⲛⲛⲉⲡⲣⲏϣ ⲛⲁⲓ ⲉⲛⲧⲁⲩϫⲓⲧⲟⲩ ⲛⲧⲛⲃⲁⲅⲱⲁⲥ ⲉⲡⲉⲥⲙⲁ ⲉϣⲁⲥϭⲱ ⲛϩⲏⲧϥ ⲙⲙⲏⲛⲉ ⲉⲧⲣⲉⲥⲛⲟϫⲥ ⲉϩⲣⲁⲓ ⲉϫⲱⲟⲩ ⲉⲛⲥⲟⲩⲱⲙ

12:16  ⲁⲥⲃⲱⲕ ⲇⲉ ⲉϩⲟⲩⲛ ⲛϭⲓ ⲓⲟⲩⲇⲉⲓⲑ ⲁⲥⲛⲟϫⲥ ⲁⲩⲱ ⲁⲡϩⲏⲧ ⲛⲟⲗⲟⲫⲉⲣⲛⲏⲥ ⲡⲱϣⲥ ⲉϩⲣⲁⲓ ⲉϫⲱⲥ ⲁⲩⲱ ⲁⲧⲉϥⲯⲩⲭⲏ ⲕⲓⲙ ⲁϥⲉⲡⲓⲑⲩⲙⲓ ⲅⲁⲣ ⲉⲙⲁⲧⲉ ⲉϣⲱⲡⲉ ⲛⲙⲙⲁⲥ ⲁⲩⲱ ⲛⲛⲉϥϭⲱⲣϭ ⲉⲩⲟⲩⲟⲉⲓϣ ⲉⲧⲣⲉϥⲣϩⲁⲗ ⲙⲙⲟⲥ ϫⲓⲛ ⲙⲡⲉϩⲟⲟⲩ ⲉⲛⲧⲁϥⲛⲁⲩ ⲉⲣⲟⲥ

12:17  ⲡⲉϫⲁϥ ⲛⲁⲥ ⲛϭⲓ ⲟⲗⲟⲫⲉⲣⲛⲏⲥ ϫⲉ ⲥⲱ ⲛⲧⲉϣⲱⲡⲉ ⲛⲙⲙⲁⲛ ⲉⲩⲟⲩⲛⲟϥ

12:18  ⲡⲉϫⲁⲥ ⲛϭⲓ ⲓⲟⲩⲇⲉⲓⲑ ϫⲉ ϯⲛⲁⲥⲱ ⲡⲁϫⲟⲉⲓⲥ ϫⲉ ⲁϥⲁⲓⲁⲓ ⲛϩⲏⲧ ⲙⲡⲟⲟⲩ ⲛϭⲓ ⲡⲁⲱⲛϩ ⲉϩⲟⲩⲉⲛⲉϩⲟⲟⲩ ⲧⲏⲣⲟⲩ ⲙⲡⲁϫⲡⲟ

12:19  ⲁⲥϫⲓ ⲇⲉ ⲁⲥⲟⲩⲱⲙ ⲁⲩⲱ ⲁⲥⲥⲱ ⲙⲡⲉϥⲙⲧⲟ ⲉⲃⲟⲗ ⲛⲛⲉⲧⲁⲧⲉⲥϩⲙϩⲁⲗ ⲥⲃⲧⲱⲟⲩ ⲛⲁⲥ

12:20  ⲁⲩⲱ ⲁϥⲟⲩⲛⲟϥ ⲛϭⲓ ⲟⲗⲟⲫⲉⲣⲛⲏⲥ ⲉⲃⲟⲗ ⲙⲙⲟⲥ ⲁⲩⲱ ⲁϥⲥⲱ ⲛⲟⲩⲏⲣⲡ ⲉⲛⲁϣⲱϥ ⲉⲙⲁⲧⲉ ⲡⲁⲓ ⲉⲧⲉⲙⲡϥⲥⲟⲟϥ ⲉⲛⲉϩ ⲛⲟⲩϩⲟⲟⲩ ⲛⲟⲩⲱⲧ ϫⲓⲛ ⲡⲉϩⲟⲟⲩ ⲉⲛⲧⲁⲩϫⲡⲟϥ