Kapingamarangi - Leviticus - 17

17:1  Dimaadua ga-helekai gi Moses

17:2  bolo gi-hagi-anga-ina gi Aaron mo ana dama-daane mo digau Israel huogodoo nia haganoho aanei:

17:3  Tangada Israel dela ma-ga-daaligi dana kau, be siibi, be-di kuudi belee hai dana tigidaumaha ang-gi Dimaadua i di-ingoo-hua di gowaa i-daha mo-di ngudu di bontai di Hale-laa Dimaadua, la-guu-oho taganoho. Mee guu-llingi gi-daha nia dodo, gei mee gu-hagalee dau bolo tangada ni Dimaadua.

17:4  Tangada Israel dela ma-ga-daaligi dana kau, be siibi, be-di kuudi belee hai dana tigidaumaha ang-gi Dimaadua i di-ingoo-hua di gowaa i-daha mo-di ngudu di bontai di Hale-laa Dimaadua, la-guu-oho taganoho. Mee guu-llingi gi-daha nia dodo, gei mee gu-hagalee dau bolo tangada ni Dimaadua.

17:5  Tadinga o taganoho deenei la-ne-hai belee hai digau Israel gi-gaamai gi Dimaadua nia manu ala e-daaligi go digaula i-lodo-henua. Digaula gi-gaamai nia maa gi tangada hai-mee-dabu i-di ngudu di bontai di Hale-laa, ga-daaligi e-hai-ai tigidaumaha hagadaubuni.

17:6  Tangada hai-mee-dabu gaa-hunu nia dodo gi-di gili di gowaa dudu tigidaumaha dela i-di ngudu di bontai di Hale-laa, gaa-dudu nia kiliidi gii-hai dono hauiha e-haga-tenetene di manawa o Dimaadua.

17:7  Digau Israel gi-hudee de-hagalongo ang-gi Dimaadua i-di nadau daaligi nadau manu i-lodo henua belee hai nadau tigidaumaha ang-gi di balu ada-kuudi. Digau Israel e-hai gi-haga-gila-aga nia haganoho aanei i-nia madagoaa huogodoo.

17:8  Tangada Israel be tangada mai i-daha dela e-noho i-lodo di guongo digau Israel ma-gaa-hai dana tigidaumaha dudu be di-ingoo-hua nia tigidaumaha ala i-golo

17:9  ang-gi Dimaadua i tei gowaa i-daha mo-di bontai di Hale-laa la-hagalee dau bolo tangada ni Dimaadua.

17:10  Tangada Israel be tangada mai i-daha dela e-noho i-lodo di guongo digau Israel ma-gaa-gai nia goneiga ala nia dodo no-lodo, malaa Dimaadua gaa-huli gi-daha mo tangada deelaa ga-hagalee dugu a-mee bolo tangada i ana dama.

17:11  Di mouli o-nia mee huogodoo ala e-mouli la i-lodo nia dodo, deelaa di mee ne-hidi-ai Dimaadua ga-helekai bolo nia dodo huogodoo la-gi-llingia gi-hongo di gowaa dudu tigidaumaha e-daa gi-daha nia huaidu o-nia daangada. Nia dodo la di mouli le e-daa gi-daha nia huaidu.

17:12  Deenei di mee ne-helekai-iei Dimaadua gi digau Israel bolo digaula be digau mai i-daha ala e-noho i-baahi digaula la-gi-hudee geina nia goneiga ala nia dodo no-lodo.

17:13  Tangada Israel be tangada mai i-daha dela e-noho i-lodo di guongo o Israel ma-gaa-kumi nadau manu dolodolo be-di manu mamaangi dela e-madammaa ang-gi di hai-daumaha, digaula gi-llingia nia dodo gi-hongo di gelegele gaa-danu gi-nia gelegele.

17:14  Di mouli nia mee huogodoo ala e-mouli la i-lodo nia dodo, deelaa di mee ne-helekai-iei Dimaadua gi digau Israel bolo digaula gi-hudee geina nia goneiga ala nia dodo no-lodo, gei tangada dela ma-gaa-gai nia maa la-hagalee dau bolo tangada ni Mee.

17:15  Tangada Israel be tangada mai i-daha dela ma-gaa-gai nia goneiga di manu dela ne-made-hua i-deia be ne-daaligi go di manu lodo-geinga le e-hai gi-haga-madammaa ono goloo, ga-gaugau ia, gaa-noho gaa-tali-loo gi-di hiahi i-mua dono madammaa.

17:16  Tangada dela ma-ga-hagalee haga-gila-aga di mee deenei, geia gaa-kae di hagaduadua o-nia mee aanei.