Kapingamarangi - Leviticus - 15

15:1  Dimaadua gaa-wanga gi Moses mo Aaron nia haganoho aanei

15:2  bolo meemaa gi-hagi-anga-ina gi digau Israel: Di madagoaa taane e-hai dono magi halihali mai nia uugau i ono goloo daane, nia uugau aalaa le e-milimilia.

15:3  ma e-aha ma-ga-halihali hua igolo be gu-hagalee.

15:4  Di ingoo-hua di hada-kii dela ma-gaa-noho be e-kii-iei mee nonua la-gu-milimilia.

15:5  Tangada dela ma-gaa-tale gi-di hada-kii o-maa,

15:6  be e-noho gi-hongo di mee dela guu-noho ginai mee nonua, tangada deelaa e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:7  Tangada dela ma-gaa-tale gi tangada dela e-halihali-mai nia uugau, tangada deelaa e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:8  Tangada dela e-halihali-mai nia uugau ma-gaa-bui ana haawale gi-hongo tangada dela e-madammaa ang-gi di hai-daumaha, tangada deelaa le e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:9  Nia gowaa nohonoho huogodoo mo nia lohongo hongo hoodo mo ‘camel’ ma-gaa-noho ginai tangada dela e-halihali-mai nia uugau la-gu-milimilia.

15:10  Tangada ma-gaa-tale gi-di mee dela guu-noho ginai taane deenei nonua, le e-milimilia gaa-dae-loo gi-di hiahi. Tangada deelaa ma-gaa-kae di mee dela guu-noho ginai taane deenei nonua le e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:11  Taane dela e-halihali nia uugau ma-gaa-bili gi tangada i goodou gei mee digi tono ono lima, geia gi-tuugia ono goloo ga-gaugau ia, geia le e-milimilia gaa-dae-loo gi-di hiahi.

15:12  Di boolo dela ne-hai gi-nia gelegele ma-gaa-bili ginai taane deenei le e-oho gi-daha, gei di boolo dela ne-hai gi-di laagau ma-gaa-bili ginai mee le e-tono.

15:13  Maa taane deenei la-guu-hili dono magi, gei mee e-noho-loo gi hidu nia laangi, ga-tugi-laa ono goloo ga-gaugau ia gi-nia monowai mmaa, gei mee ga-madammaa ang-gi di hai-daumaha.

15:14  I-di walu laangi, gei mee gaa-kae ana mwuroi e-lua be nia dama-mwuroi e-lua gi-di ngudu di bontai di Hale-laa Dimaadua, gaa-wanga nia maa gi tangada hai-mee-dabu.

15:15  Tangada hai-mee-dabu ga-tigidaumaha di mee e-dahi i-nia maa e-hai-ai tigidaumaha wwede nia huaidu gei di mee dela i-golo gaa-hai tigidaumaha dudu. Deenei di hai tangada hai-mee-dabu e-hai-taumaha e-haga-madammaa taane deelaa.

15:16  Taane ma-ga-halihali ono wai mai ono goloo-daane, gei mee e-hai gi-gaugau dono huaidina hagatau, gei mee e-milimilia gaa-dae-loo gi-di hiahi.

15:17  Nia mee ala ne-hai gi-nia mee gahu be nia gili-kau ma-ga-monnono ginai nia wai ala ne-hali-mai i taane, le e-hai gi-gaugau gi-nia wai, gei di-maa e-milimilia gaa-dae-loo gi-di hiahi.

15:18  Taane mo-di ahina le e-hai gi-gaugau i-muli di-nau hai di hiihai o taga-hai-lodo, gei meemaa e-milimilia gaa-dae-loo gi-di hiahi.

15:19  Di madagoaa di ahina ma-gaa-hai dono magi malama, gei mee e-milimilia i-nia laangi e-hidu. Tangada dela ma-gaa-tale gi mee le e-milimilia gaa-dae-loo gi-di hiahi.

15:20  Di-ingoo-hua di-mee dela ma-gaa-noho be e-kii ginai di ahina deenei nonua i dono madagoaa dela e-hai dono magi malama la-gu-milimilia.

15:21  Tangada dela ma-gaa-tale gi-di hada-kii o-di ahina deenei be-di mee dela guu-noho ginai mee nonua, le e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:22  Tangada dela ma-gaa-tale gi-di hada-kii o-di ahina deenei be-di mee dela guu-noho ginai mee nonua, le e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:23  Tangada dela ma-gaa-tale gi-di hada-kii o-di ahina deenei be-di mee dela guu-noho ginai mee nonua, le e-hai gii-tugi ono goloo ge e-gaugau ia labelaa, gei mee e-milimilia gaa-dae-loo gi-di hiahi.

15:24  Taane dela ma-gaa-hai di hiihai o taga-hai-lodo ang-gi di ahina dela e-hai dono magi malama, gei mee gu-milimilia labelaa, e-milimilia i-nia laangi e-hidu, gei di hada-kii dela ga-kii-iei mee nonua la-gu-milimilia labelaa.

15:25  Di ahina ma-ga-halihali ono dodo i-nia laangi e-logo i-daha mo-di madagoaa dela belee hai dono magi-malama, be e-halihali ono dodo gu-diiagi di madagoaa dela belee lawa dono magi malama, gei mee e-milimilia i-di waalooloo o dono halihali ono dodo, gadoo be ia i dono madagoaa dela ma-gaa-hai dono magi malama.

15:26  Di hada-kii dela ma-ga-kii-iei mee nonua be go di mee dela ma-gaa-noho ginai mee nonua i dono madagoaa dela e-hai dono magi beenei le e-milimilia.

15:27  Tangada dela ma-gaa-tale gi-nia mee aanei le e-milimilia, gei mee e-hai gii-tugi ono goloo ge e-gaugau ia, gei mee e-milimilia gaa-dae-loo gi-di hiahi.

15:28  I-muli dono magi halihali ono dodo ma-gaa-lawa, gei mee e-tali-loo gi hidu ono laangi, gei mee ga-madammaa-laa ang-gi di hai-daumaha.

15:29  I-di walu langi, gei mee gaa-kae ana mwuroi e-lua be ana dama-mwuroi e-lua gi tangada hai-mee-dabu dela i-di ngudu di bontai di Hale-laa Dimaadua.

15:30  Tangada hai-mee-dabu ga-tigidaumaha di mee e-dahi e-hai-ai tigidaumaha wwede nia huaidu, gei di mee e-dahi gaa-hai tigidaumaha dudu. Deenei dana hai e-hai taumaha haga-madammaa di ahina deelaa.

15:31  Dimaadua ga-helekai gi Moses bolo gi-hagi-anga-ina gi digau Israel di hai o nadau milimilia, bolo gi-de-hagamilimilia-hua di Hale-laa dela e-duu i tungaalodo nia hale-laa digaula. Digaula ma-ga-haga-milimilia di-maa, gei digaula gaa-mmade.

15:32  Aanei nia haganoho ang-gi taane dela e-magi halihali mai nia uugau, be taane dela e-hali-mai ono wai i ono goloo-daane,

15:33  be-di ahina dela e-hai dono magi malama, be go taane dela ma-gaa-hai di hiihai o taga-hai-lodo ang-gi di ahina dela e-milimilia ang-gi di hai-daumaha.