Kapingamarangi - Leviticus - 2

2:1  Maa tangada i goodou ga-tigidaumaha ana huwa-laagau ang-gi Dimaadua, geia gi-oloina nia huwa-laagau aalaa gii-hai nia palaawaa, gaa-llingi nia lolo-olib mono ‘incense’ gi-hongo di-maa,

2:2  ga-gaamai gi digau hai-mee-dabu o-di madawaawa Aaron. Tangada i digaula ga-gaamai dono lima e-honu i-nia palaawaa aalaa mono lolo-olib mono ‘incense’ huogodoo, gaa-dudu i-hongo di gowaa dudu tigidaumaha, e-hai-ai di hagamodongoohia bolo nia mee huogodoo la-gu-tigidaumaha ang-gi Dimaadua. Di llamu kala o tigidaumaha meegai deenei le e-haga-tenetene di manawa o Dimaadua.

2:3  Nia palaawaa ala ne-dubu i tigidaumaha la nia mee ni digau hai-mee-dabu. Nia mee aanei la nia mee dabuaahia huoloo, idimaa ma nia mee i-nia meegai ala ne-tigidaumaha ang-gi Dimaadua.

2:4  Maa nia mee ala e-hai-tigidaumaha la nia palaawaa ne-daa, gei nia maa hagalee hai gi-wanga ginai nia ‘yeast’. E-mee hua di-hai nia palaawaa maadolu ala ne-hai gi-nia palaawaa ala e-unugi gi-nia lolo-olib, be-di bagu lahilahi dela ne-hunu gi-nia lolo-olib.

2:5  Maa di mee dela e-hai-tigidaumaha la di bagu ne-dunu gi-di mee dunu bagu, gei di-maa e-hai gii-hai gi-nia palaawaa e-unugi gi-nia lolo-olib, hagalee wanga ginai nia ‘yeast’.

2:6  Ginigini-ina di-maa gii-lligi gaa-llingi nia lolo-olib gi-hongo di-maa i do madagoaa ma-gaa-hai dau tigidaumaha gi-di-maa.

2:7  Maa di mee dela e-hai-tigidaumaha la di bagu ne-dunu gi-di mee-baabaa, gei di-maa e-hai gii-hai gi-nia palaawaa mono lolo-olib.

2:8  Gaamai di-maa e-hai-ai tigidaumaha ang-gi Dimaadua, gaa-wanga gi tangada hai-mee-dabu, gei mee gaa-kae di-maa gi-hongo di gowaa dudu tigidaumaha.

2:9  Tangada hai-mee-dabu gaa-daa ana mee dulii i-di-maa, e-hai-ai di hagamodongoohia bolo nia mee huogodoo la-gu-tigidaumaha gi Dimaadua, gei mee gaa-dudu di-maa i-hongo di gowaa dudu tigidaumaha. Di hauiha kala o tigidaumaha meegai deenei le e-haga-tenetene di manawa o Dimaadua.

2:10  Nia mee ala ne-dubu i-nia mee ala ne-hai-tigidaumaha la nia mee ni digau hai-mee-dabu. Nia mee aanei le e-dabuaahia huoloo, idimaa, ma nia mee ne-daa-mai i-nia meegai ala ne-tigidaumaha ang-gi Dimaadua.

2:11  Nia tigidaumaha palaawaa huogodoo ala e-hai go goodou ang-gi Dimaadua la hagalee unugi gi-nia ‘yeast’, goodou hudee hai-hegau gi-nia ‘yeast’ be nia ‘honey’ i-lodo nia meegai ala e-tigidaumaha ang-gi Dimaadua.

2:12  Tigidaumaha o-nia ‘wheat’ ala ma-gaa-hadi go tangada matagidagi i-nia ngadau huogodoo le e-gaamai gi Dimaadua, malaa, hagalee dudu i-hongo di gowaa dudu tigidaumaha.

2:13  Wanga-ina nia toolo gi-hongo nia tigidaumaha ‘wheat’ huogodoo, idimaa nia toolo la-di hagamodongoohia o-di hagababa i godou mehanga mo God. (Goodou e-hai gi-wanga nia toolo gi-hongo godou tigidaumaha huogodoo).

2:14  Do madagoaa ma-ga-tigidaumaha ang-gi Dimaadua au ‘wheat’ ala ma-gaa-hadi kooe matagidagi i dau gowaa, gei goe tigidaumaha-ina nia golee-‘wheat’ ala ne-dunu i-hongo di ahi be tigidaumaha-ina nia golee-‘wheat’ ala ne-olo.

2:15  Wanga ina gi-hongo di-maa nia lolo-olib mono ‘incense’.

2:16  Tangada hai-mee-dabu gaa-dudu nia mee dulii i-nia ‘wheat’ ala ne-olo mo nia lolo-olib e-hai-ai di hagamodongoohia, ngaadahi mo nia ‘incense’ huogodoo, e-hai-ai tigidaumaha meegai ang-gi Dimaadua.