Kapingamarangi - Leviticus - 22

22:1  Dimaadua ga-helekai gi Moses

22:2  gi-hagi-anga-ina gi Aaron mo ana dama-daane, “Goodou hudee haga-milimilia-ina dogu ingoo dabuaahia, goodou hagalabagau-ina nia tigidaumaha haga-madagu ala ne-hai go digau Israel mai gi-di-Au. Au go Dimaadua.

22:3  Tangada i do madawaawa dela e-milimilia ang-gi di hai-daumaha, ma-ga-hanimoi gi-hoohoo gi-nia mee hai-tigidaumaha haga-madagu o digau Israel ala ne-hai-mai gi-di-Au, malaa, mee gu-deemee di-ngalua labelaa i-di gowaa dudu tigidaumaha deelaa. Taganoho deenei le e-hana-hua beelaa dono hagaodi ai. Au go Dimaadua.

22:4  “Tangada i-di madawaawa Aaron dela e-hai dono magi genegene be e-hai dono magi halihali mai nia uugau i ono goloo daane, la-hagalee gai nia tigidaumaha dabu aanei, gaa-dae-loo gi dono magi la-guu-hili. Tangada i digau hai-mee-dabu le e-milimilia maa mee gaa-bili gi-nia mee ala gu-haga-gulugulua go tuaidina tangada made, be mee e-halihali nia wai goloo-daane,

22:5  be mee guu-bili gi-di manu be tangada milimilia.

22:6  Tangada hai-mee-dabu dela ma-ga-milimilia, le e-milimilia gaa-dae-loo gi-di hiahi, gei mee hagalee gai ana mee mai i-nia tigidaumaha dabu gaa-dae-loo gi mee gu-gaugau ia.

22:7  I-muli-hua di laa ma-ga-ulu, gei mee gu-madammaa, gei mee guu-mee di-gai nia tigidaumaha dabu, ala go ana meegai.

22:8  Mee hagalee gai nia goneiga o-di manu dela ne-made-hua i-deia be ne-daaligi go di manu lodo-geinga, idimaa di mee beenei le e-hai a-mee gi-milimilia. Au go Dimaadua.

22:9  “Digau hai-mee-dabu huogodoo le e-hai gi-daudali agu haganoho ala ne-wanga gi digaula. Digaula ma-ga-hagalee daudali nia maa, digaula gu-ihala gaa-mmade, idimaa digaula gu-de-hagalongo gi agu haganoho dabuaahia. Au go Dimaadua, ko-Au dela ne-hai digaula gii-dabu.

22:10  “Ma go nia madahaanau hua o digau hai-mee-dabu ala e-mee di-gai nia tigidaumaha dabu. Digau ala e-noho i-baahi digau hai-mee-dabu mo digau ala e-ngalua ang-gi digau hai-mee-dabu, le e-deemee di-gai nia mee aanei.

22:11  Gei nia hege tangada hai-mee-dabu, ala ne-hui gi ana bahihadu be ala ne-haanau i-lodo dono hale, le e-mee di-gai nia meegai i tuhongo o tangada hai-mee-dabu.

22:12  Tama-ahina tangada hai-mee-dabu dela guu-hai dono lodo gi tangada dela hagalee tangada hai-mee-dabu, le e-hagalee gai i-nia meegai o tigidaumaha dabu.

22:13  Gei tama-ahina tangada hai-mee-dabu dela guu-made dono lodo be gu-diiagi go dono lodo gei mee ana dama ai, ma-ga-hanimoi gaa-noho i-di hale dono damana le e-mee-hua di-gai nia meegai o tuhongo tangada hai-mee-dabu o dono damana. Go digau hua o-di madahaanau tangada hai-mee-dabu ala e-mee di-gai tuhongo tangada hai-mee-dabu.

22:14  “Maa nia daangada ala hagalee dau gi-di madahaanau o tangada hai-mee-dabu gaa-gai nia tigidaumaha dabu ge de-iloo nadau mee ala e-gai, digaula e-hui ang-gi tangada hai-mee-dabu di hui o tigidaumaha deelaa ge e-hagapuni labelaa ginai dahi baahi e-lima di-maa.

22:15  Digau hai-mee-dabu gi-hudee haga-milimilia-ina nia tigidaumaha dabu

22:16  i-di nadau dumaalia gi digau ala hagalee tau di gai nia maa, idimaa, di mee deenei la-gaa-hai tangada deelaa gii-hala gaa-kae di hagaduadua. Ko-Au go Dimaadua dela ne-haga-dabu nia tigidaumaha aanei.”

22:17  Dimaadua ga-helekai ang-gi Moses

22:18  gi-hagi-anga-ina gi Aaron mo ana dama-daane mo digau Israel huogodoo nia haganoho aanei: Di madagoaa tangada Israel be tangada mai i-daha dela e-noho i-lodo Israel ma-gaa-hai dana tigidaumaha dudu, belee haga-gila-aga di mee dela gu-hagababa, be e-hai-hua mai i dono hiihai, malaa, di manu la-hagalee hai gii-hai di mee e-milimilia i dono gili.

22:19  Tigidaumaha la-gi-hiihai ginai Dimaadua, la di manu-daane dela ono milimilia ai.

22:20  Maa goodou ga-tigidaumaha di-godou manu dela di mee huaidu i dono gili, Dimaadua la-hagalee hiihai gi-di-maa.

22:21  Tangada dela ma-gaa-hai dana tigidaumaha hagadaubuni ang-gi Dimaadua, belee haga-gila-aga di mee dela gu-hagababa, be e-hai-hua mai i dono hiihai, di manu dela ono milimilia ai, gei Dimaadua ga-hiihai gi-di-maa.

22:22  Goodou hudee tigidaumaha ang-gi Dimaadua nia manu ala e-dee-gida, be e-habehabe, be gu-duuduu nadau gili, be e-magibala, be e-moholehole, be nia lohongo magibala i dono gili. Goodou hudee tigidaumaha-ina nia hagadilinga manu ala beenei i-hongo di gowaa dudu tigidaumaha e-hai-ai godou tigidaumaha meegai.

22:23  Goodou ma-gaa-hai godou tigidaumaha mai i goodou hiihai, e-mee di-hai gi-di manu dela e-dee-dohu dono huaidina. Gei Dimaadua la-hagalee hiihai gi-di-maa maa di mee deenei la tigidaumaha dela e-haga-gila-aga tigidaumaha dela gu-hagababa.

22:24  Goodou hudee hai-tigidaumaha ang-gi Dimaadua i-nia manu ala guu-duugia, be guu-tele, be gu-huaidu, be guu-pala nadau goloo daane. Di mee deenei la-hagalee haga-gila-aga i godou henua.

22:25  Goodou hudee hai-tigidaumaha meegai gi-nia manu ala ne-gaamai go goodou i-baahi digau mai i-daha. Nia manu ala beenei le e-milimilia, gei Dimaadua la-hagalee manawa-tene gi-nia maa.

22:26  Di madagoaa di kau be siibi be-di kuudi ma-ga-haanau, mee hagalee daa gi-daha mo dono dinana, gaa-dae-loo gi-nia laangi e-hidu, gei i-muli nia laangi e-hidu aalaa gei di-maa gu-humalia-hua di hai-tigidaumaha meegai dela e-manawa-tene ginai Dimaadua.

22:27  Di madagoaa di kau be siibi be-di kuudi ma-ga-haanau, mee hagalee daa gi-daha mo dono dinana, gaa-dae-loo gi-nia laangi e-hidu, gei i-muli nia laangi e-hidu aalaa gei di-maa gu-humalia-hua di hai-tigidaumaha meegai dela e-manawa-tene ginai Dimaadua.

22:28  Goodou hudee tigidaumaha di kau mo dana dama, siibi mo dana dama, be-di kuudi mo dana dama i-di laangi e-dahi.

22:29  Di madagoaa goodou ma-gaa-hai di-godou tigidaumaha danggee ang-gi Dimaadua, goodou haga-gila-ina-aga ana haganoho aanei, gei Mee ga-tenetene-adu gi goodou.

22:30  Geina nia maa huogodoo i-di laangi deelaa, hudee dugu mee gi-di laangi dono daiaa.

22:31  Dimaadua ga-helekai boloo, “Goodou haga-gila-ina-aga agu haganoho, Au go Dimaadua.

22:32  Goodou hudee haga-milimilia-ina dogu ingoo dabu. Digau Israel huogodoo gi-dugua Au haga-madagu, Au go Dimaadua dela ne-hai goodou gii-dabu.

22:33  Ma ko-Au dela ne-lahamai goodou gi-daha mo Egypt belee hai Au di God ni goodou. Au go Yihowah.”