Kapingamarangi - Leviticus - 10

10:1  Nia dama-daane Aaron, go Nadab mo Abihu, meemaa ne-kae di-nau boolo, gaa-wanga nia malala akaa ahi gi-lodo, gaa-llingi ginai nia ‘incense’, gaa-dugu ang-gi Dimaadua. Di ahi deenei la hagalee dabu, idimaa Dimaadua la-digi helekai gi meemaa bolo gi-heia di mee deenei.

10:2  Dimaadua ga-hagau dana ahi gaa-dudu meemaa gii-mmade i-di gowaa deelaa i-mua nnadumada o Dimaadua.

10:3  Moses ga-helekai gi Aaron, “Deenei di mee ne-helekai-ai Dimaadua boloo, ‘Digau huogodoo ala e-hai-hegau mai gi-di-Au le e-hai gi-hagalabagau dogu dabuaahia; gei Au ga-hagamodongoohia ogu madamada ang-gi agu daangada.’ ” Gei Aaron guu-duu deemuu.

10:4  Moses ga-gahi-mai a Mishael mo Elzaphan, nia dama-daane Uzziel, tuaahina daane o tamana o Aaron, ga-helekai gi meemaa, “Goolua lloomoi gi kinei, lahia gulu duaahina aanei gi-daha mo-di Hale-laa dabu deenei, lahia gi-daha mo-di waahale.”

10:5  Meemaa ga-lloomoi gaa-kumi nia gahu meemaa, gaa-lahi meemaa gi-daha mo-di waahale, gii-hai be nnelekai Moses.

10:6  Moses ga-helekai gi Aaron mo ana dama-daane Eleazar mo Ithamar, “Goodou hudee hagamagemage-ina nia ngaahulu o godou libogo, be e-hahaahi godou gahu belee hagamodongoohia bolo goodou e-manawa-gee. Maa goodou gaa-hai beenei, gei goodou gaa-mmade, gei Dimaadua ga-hagawelewele gi digau huogodoo. Gei digau Israel huogodoo ala i-golo le e-dumaalia ginai gi-manawa-gee gi meemaa aanei ala ne-mmade i-di ahi dela ne-hagau-mai go Dimaadua.

10:7  Goodou hudee hula gi-daha mo-di bontai di Hale-laa gi-dee-mmade-hua goodou, idimaa goodou gu-haga-dabu gi-nia lolo dabuaahia o Dimaadua.” Gei digaula guu-hai gii-hai be nnelekai Moses.

10:8  Dimaadua ga-helekai gi Aaron,

10:9  “Goe mo au dama-daane hagalee ulu gi-lodo dogu Hale-laa i-muli di-godou inu nia waini be nia wai haga-libaliba dangada. Goodou ma-gaa-hai beenei, gei goodou gaa-mmade. Deenei taganoho dela e-hai gi-haga-gila-aga go do hagadili gi-muli.

10:10  Goodou dugua-gee nia mee ala ang-gi Dimaadua mo godou mee ala e-hai-hegau-ai goodou, mo nia mee ala e-madammaa ang-gi di hai-daumaha mo nia mee ala hagalee madammaa.

10:11  Goodou hagi-anga-ina gi digau Israel nia haganoho huogodoo ala ne-wanga ko-Au gi Moses bolo gi-hagi-adu gi goodou.”

10:12  Moses ga-helekai gi Aaron mo ana dama-daane dogolua ala ne-dubu, go Eleazar mo Ithamar, “Goodou kaina tigidaumaha huwa-laagau dela ne-dubu i tigidaumaha meegai, dela ne-hai ang-gi Dimaadua. Kaina, heia nia palaawaa ala hagalee wanga ginai nia ‘yeast’, gaa-gai nia maa i-baahi di gowaa dudu tigidaumaha, idimaa tigidaumaha deenei le e-dabuaahia.

10:13  Goodou geina nia maa i-di gowaa dabu. Deenei di-godou duhongo mo godou dama mai i tigidaumaha meegai dela ne-hai ang-gi Dimaadua. Deenei di mee Dimaadua ne-hagi-mai gi-di-au.

10:14  Goodou mo godou dama-daane mo godou dama-ahina e-mee labelaa di-gai tadahada mo-di wae o-di manu dela ne-hai di wanga-dehuia mo tuhongo ni digau hai-mee-dabu ang-gi Dimaadua. Goodou ga-gaamai nia maa gi-di gowaa dela e-madammaa ang-gi di hai-daumaha. Idimaa, nia tigidaumaha aanei ala ne-gowadu gi goodou mo godou dama e-hai tuhongo ni goodou mai i-di tigidaumaha hagadaubuni o digau Israel.

10:15  Digaula e-hai gi-gaamai di wae mo tadahada o-di manu i-di madagoaa dela e-tigidaumaha-ai nia kiliidi o-di manu deelaa, e-hai-ai tigidaumaha meegai ang-gi Dimaadua. Nia mee aanei la nia mee ni goodou mo godou dama gaa-hana-hua beelaa, gii-hai be nnelekai Dimaadua.”

10:16  Moses ga-heeu di hai o-di kuudi belee hai tigidaumaha wwede nia huaidu, ga-iloo-laa bolo ma guu-lawa di-dudu. Di mee deenei guu-hai a-mee gi-hagawelewele gi Eleazar mo Ithamar, ga-helekai gi meemaa,

10:17  “Ma ne-aha dela goolua digi geina tigidaumaha wwede nia huaidu i-di gowaa dabu? Di mee deenei la di mee dabuaahia huoloo, gei Dimaadua ne-gowadu di mee deenei gi goolua belee wwede nia huaidu o digau huogodoo.

10:18  Idimaa nia dodo la digi gaamai gi-lodo di Hale-laa dabu, gei goolua ne-belee gai tigidaumaha i-di gowaa deelaa, gii-hai be agu helekai.”

10:19  Aaron ga-helekai gi Moses, “Maa nei bolo au gaa-gai tigidaumaha wwede nia huaidu dangi-nei, Dimaadua le e-manawa-tene ginai? Nia daangada la-gu-gaamai nadau mee ang-gi Dimaadua ala belee hai-tigidaumaha wwede nia huaidu dangi-nei mo nadau mee ala belee hai-tigidaumaha dudu, gei nia huaidu aanei ala gu-hai-mai gi-di-au.”

10:20  Di madagoaa Moses ne-longono nia mee aanei, gei mee gu-manawa-tenetene.