Kapingamarangi - Leviticus - 8

8:1  Dimaadua ga-helekai gi Moses,

8:2  “Gahia-mai a Aaron mo ana dama-daane gi-di bontai dogu Hale-laa, gei goe gaamai nia gahu gau hai-mee-dabu, nia lolo-dabu, tamaa-kau-daane e-hai tigidaumaha wwede nia huaidu, nia siibi-daane e-lua mo-di gada palaawaa ala digi unugia gi-nia ‘yeast’.

8:3  Gei goe ga-haga-dagabuli digau Israel huogodoo gi-di gowaa deelaa.”

8:4  Moses gu-haga-gila-aga nia mee huogodoo a Dimaadua ne-hagi-anga gi-deia. Malaa, di madagoaa digau Israel ne-dagabuli mai,

8:5  Moses ga-helekai gi digaula, “Dolomeenei gei au gaa-hai di mee Dimaadua ne-hagi-mai bolo au gi-heia.”

8:6  Moses gaa-lahi a Aaron mo ana dama-daane gi-mua digaula, ga-gaugau digaula gi-nia wai.

8:7  Gei mee ga-haga-ulu Aaron gi-di gahu, ga-haga-ulu labelaa gi-di gahu-lloo, gaa-nnoo tuaidina o-maa gi-di tuu nnoo-gahu. Gei mee ga-haga-ulu a-mee gi-di gahu hai-hegau dabu ‘ephod’ gaa-nnoo nia duu o-di-maa gi tuaidina o-maa.

8:8  Mee gaa-gahu tadahada o-maa gi-di mee gahu hadahada, gaa-wanga nia ‘Urim’ mo ‘Thummim’, gi lodo di-maa.

8:9  Mee gaa-wanga gi-hongo di libogo o-maa di goobai mee-gahu, gaa-wanga di baalanga goolo gi-di lae di goobai, deenei di mee e-hagamodongoohia bolo mee gu-haga-dabu, gii-hai be nnelekai Dimaadua ala ne-hagi-anga gi mee.

8:10  Nomuli, gei Moses gaa-kae di lolo-dabu, gaa-llingi gi-hongo di Hale-laa Dimaadua mo nia goloo huogodoo ala i-lodo. Deenei di hai e-haga-dabu nia mee aanei huogodoo gi Dimaadua.

8:11  Mee ga-lingilingi di lolo-dabu deelaa i-nia holongo e-hidu gi-hongo di gowaa dudu tigidaumaha mo nia goloo ala i-baahi di-maa, mo i-hongo di baisin mo-di tua di-maa. Deenei di hai e-haga-dabu labelaa nia mee aanei ang-gi Dimaadua.

8:12  Gei mee ga-hagadabu Aaron i dana llingi nia lolo-dabu gi-hongo di libogo o-maa.

8:13  Nomuli, gei Moses gaa-lahi labelaa nia dama-daane Aaron gi-mua, ga-haga-ulu meemaa gi-nia gahu, gaa-nnoo nia huaidina meemaa gi-nia duu nnoo-gahu, ga-haga-ulu nia goobai gi-hongo nia libogo meemaa, gii-hai be nnelekai Dimaadua ala ne-hagi-anga gi deia.

8:14  Nomuli, gei Moses ga-gaamai dana kau dulii e-hai tigidaumaha wwede nia huaidu. Aaron mo ana dama-daane gaa-dugu nadau lima gi-hongo di libogo di-maa.

8:15  Moses ga-daaligi di-maa gaa-kae ana dodo dulii, ga-daalo dono madaalima gi-lodo nia dodo, gaa-hunu nia madaagoo e-haa o-nia madaaduge o-di gowaa dudu tigidaumaha e-haga-dabu di-maa. Mee gaa-llingi nia dodo ala ne-dubu gi tono di gowaa dudu tigidaumaha. Deenei di hai e-haga-madammaa ge hagadabu di gowaa dudu tigidaumaha.

8:16  Moses gaa-kae nia kiliidi huogodoo ala i-di gili nia mee ala i-lodo di manu, nia gowaa ala e-humalia i-di gili di ade, nia ‘kidney’ mo nia kiliidi ala i-di gili nia maa, gaa-dudu huogodoo i-hongo di gowaa dudu tigidaumaha.

8:17  Gei mee gaa-kae nia mee ala ne-dubu i-di manu, ala go di gili, nia goneiga mo nia geiga, e-dudu i-daha mo-di waahale, gii-hai be nnelekai Dimaadua ala ne-hagi-anga gi-deia.

8:18  Nomuli, gei Moses ga-gaamai dana siibi-daane e-hai-tigidaumaha dudu, gei Aaron mo ana dama-daane gaa-dugu nadau lima gi-hongo di libogo di-maa.

8:19  Moses ga-daaligi di manu deelaa, gaa-hunu nia dodo gi-di gili nia baahi e-haa o-di gowaa dudu tigidaumaha.

8:20  Mee ga-duuduu siibi deelaa, ga-gaugau nia mee ala i-no-lodo mo nia wae gi-nia wai, gaa-dudu di libogo, mo nia kiliidi, mo nia mee huogodoo ala ne-dubu i siibi deelaa i-hongo di gowaa dudu tigidaumaha, gii-hai be nnelekai Dimaadua ala ne-hagi-anga gi deia. Tigidaumaha dudu deenei la dela go tigidaumaha meegai, di hauiha o di-maa le e-haga-tenetene di manawa o Dimaadua.

8:21  Mee ga-duuduu siibi deelaa, ga-gaugau nia mee ala i-no-lodo mo nia wae gi-nia wai, gaa-dudu di libogo, mo nia kiliidi, mo nia mee huogodoo ala ne-dubu i siibi deelaa i-hongo di gowaa dudu tigidaumaha, gii-hai be nnelekai Dimaadua ala ne-hagi-anga gi deia. Tigidaumaha dudu deenei la dela go tigidaumaha meegai, di hauiha o di-maa le e-haga-tenetene di manawa o Dimaadua.

8:22  Nomuli, gei Moses ga-gaamai labelaa siibi dela i-golo, dela belee hai di haga-dabu digau hai-mee-dabu, gei Aaron mo ana dama-daane gaa-dugu nadau lima gi-hongo di libogo di-maa.

8:23  Moses ga-daaligi di-maa gaa-kae ana dodo dulii gaa-hunu gi-hongo di hugu gi-lala talinga gau-donu o Aaron, mo i-hongo di madaalima madua dono lima gau-donu, mo i-hongo di madaawae dono wae gau-donu.

8:24  Nomuli, gei mee ga-lahaga labelaa nia dama-daane Aaron gi-mua, gaa-hunu nia hugu gi-lala nia dalinga gau-donu digaula gi-nia dodo, gaa-hunu nia madaalima mmaadua nia lima gau-donu digaula, mo nia madaawae mmaadua nia wae gau-donu digaula. Gei mee gaa-llingi nia dodo ala ne-dubu gi-nia baahi e-haa o-di gowaa dudu tigidaumaha.

8:25  Mee gaa-kae nia kiliidi o-di manu, nia kiliidi o-di hugu, nia kiliidi o-nia mee ala i-lodo, nia gowaa ala e-humalia i-di ade, nia ‘kidney’ mono kiliidi ala i-di gili nia maa, mo-di wae gau-donu.

8:26  Mee ga-daa gi-daha dana palaawaa e-dahi i-nia palaawaa ala digi hagatanga gi-nia ‘yeast’ ala i-lodo di gada ala ne-haga-dabu ang-gi Dimaadua, mo-di palaawaa e-dahi dela ne-unugi gi-nia lolo, ge dahi bagu baabaa, gaa-dugu nia mee aanei gi-hongo nia kiliidi mo i-hongo di wae gau-donu o-di manu.

8:27  Gei mee gaa-wanga nia meegai huogodoo aanei gi-lodo nia lima o Aaron mo ana dama-daane, e-wanga go digaula gi Dimaadua e-hai di wanga-dehuia hagalabagau.

8:28  Moses ga-daa gi-daha labelaa nia meegai aanei mai i digaula gaa-dudu nia maa i-hongo di gowaa dudu tigidaumaha, e-hai tigidaumaha haga-dabu tangada hai-mee-dabu. Deenei tigidaumaha meegai, gei di hauiha o di-maa le e-haga-tenetene di manawa o Dimaadua.

8:29  Nomuli, gei Moses gaa-kae tadahada o-di manu, gaa-dugu ang-gi Dimaadua e-hai di wanga-dehuia hagalabagau. Deenei tuhongo Moses mai i siibi-daane dela ne-hai-tigidaumaha haga-dabu tangada hai-mee-dabu. Moses guu-hai nia mee huogodoo ala ne-hagi-anga go Dimaadua gi mee.

8:30  Moses gaa-kae ana lolo haga-madagu dulii mo nia dodo dulii o-di manu dela i-hongo di gowaa dudu tigidaumaha, ga-haga-nonnono gi-hongo Aaron mo ana dama-daane mo i-hongo nia gahu digaula. Deenei di hai ne-haga-dabu-ai digaula mo nadau gahu ang-gi Dimaadua.

8:31  Moses ga-helekai gi Aaron mo ana dama-daane, “Goodou kaina nia goneiga o-di manu deenaa gi-mua di bontai di Hale-laa dela e-noho-ai Dimaadua, gaa-dunu, gaa-gai i-di gowaa deelaa, ngaadahi mo nia palaawaa ala i-lodo di gada ne-hai-tigidaumaha haga-dabu tangada hai-mee-dabu, gii-hai be nnelekai Dimaadua.

8:32  Gei goodou gaa-dudu nia goneiga mo nia palaawaa ala ne-dubu.

8:33  I-lodo nia laangi e-hidu gei goodou hagalee hula gi-daha mo-di bontai di Hale-laa, gaa-dae-loo gi godou hegau haga-dabu la-gaa-lawa.

8:34  Dimaadua ne-helekai-mai gi gimaadou bolo gi-heia di-madau mee dela ne-hai dangi-nei, e-daa gi-daha godou huaidu.

8:35  Goodou la-gii-noho i-di ngudu di bontai di Hale-laa i-di boo mo-di aa i-nia laangi e-hidu, e-hai nia mee Dimaadua ala ne-hagi-adu gi goodou. Maa goodou ga-hagalee hai nia mee aanei, gei goodou gaa-mmade. Deenei di mee Dimaadua ne-hagi-mai gi-di-au.”

8:36  Aaron mo ana dama-daane gu-haga-gila-aga nia mee huogodoo ala ne-hagi-anga go Dimaadua gi Moses.